మైనర్‌ పాస్‌పోర్టు తరచూ రిజెక్ట్ అవుతోందా? - ఇలా అప్లై చేస్తే వెంటనే వచ్చేస్తుంది

తల్లిదండ్రులు మరణిస్తే రక్త సంబంధీకులు దరఖాస్తు చేయొచ్చు - మైనర్‌ పాస్‌పోర్టుల పెండింగ్‌ సమస్యలకు పరిష్కారాలు వెల్లడించిన హైదరాబాద్‌ ఆర్పీవో స్నేహజ

Passport Issued Problems : మైనర్‌ పాస్‌పోర్టుకు సంబంధించి తల్లిదండ్రుల అంగీకారంతో దాఖలు చేసే దరఖాస్తులు మినహాయిస్తే మనస్పర్థలతో విడిపోయిన, లేదంటే సింగిల్‌ పేరెంట్‌ లేదా తల్లిదండ్రులు మరణించిన సందర్భాల్లో సరైన ధ్రువపత్రాలు సమర్పించలేక ఎక్కువగా తిరస్కరణకు గురవుతున్నాయి. రాష్ట్ర వ్యాప్తంగా గతంలో ప్రతి నెలా 30 నుంచి 40 దరఖాస్తులు పెండింగ్‌లో ఉండేవి. ప్రస్తుతం ఆ సంఖ్య వందల్లోకి ఎగబాకింది. కొందరు తల్లిదండ్రులు కోర్టులో వారి విడాకుల కేసు ఉన్న విషయాన్ని బయటకు చెప్పడం లేదు.

పోలీస్‌ తనిఖీలలో ఇవి వెల్లడవడంతో అనేక ఇబ్బందులు పడుతున్నారు. ఈ నేపథ్యంలో విదేశీ వ్యవహారాల శాఖ మైనర్‌ పాస్‌పోర్టుల జారీకి సంబంధించి పలు మార్గదర్శకాలు జారీ చేసిందని హైదరాబాద్‌ ప్రాంతీయ పాస్‌పోర్టు అధికారి స్నేహజ (ఆర్​పీవో) తెలిపారు. వెబ్‌సైట్ https://www.passportindia.gov.in/ లో పూర్తి వివరాలు లభ్యమవుతాయని వెల్లడించారు. తల్లిదండ్రులు మరణిస్తే నానమ్మ, అమ్మమ్మ లేదా తాత లేదా బంధువులు మైనర్‌ పాస్‌పోర్టు కోసం దరఖాస్తు చేసే అవకాశం ఉందన్నారు. మైనర్‌ పాస్‌పోర్టుల జారీలో అధికారుల దృష్టికి వచ్చిన పలు సమస్యలు, పరిష్కార మార్గాలను ఆమె తెలిపారు.

స్నేహజ (ETV Bharat)

తల్లిదండ్రుల విడాకుల సందర్భంలో..

1. విడాకుల కేసు కోర్టులో పెండింగ్‌లో ఉన్నప్పుడు చేసే మైనర్‌ పాస్‌పోర్టు దరఖాస్తుకు తల్లిదండ్రులిద్దరి అనుమతి తప్పనిసరిగా ఉండాలి. పరస్పర అంగీకారం లేకుండా విడిపోయినప్పుడు కోర్టు అనుమతి ఇచ్చిన తర్వాతే దరఖాస్తు చేసుకోవాలి. కోర్టు అనుమతిస్తే తల్లిదండ్రుల్లో ఎవరిదైనా ఒకరి ధ్రువీకరణతో పాస్‌పోర్టు మంజూరవుతుంది.

2. విడాకులు మంజూరు చేసినప్పుడు న్యాయస్థానం తల్లిదండ్రుల్లో ఒకరికి మైనర్‌ బాధ్యతలు అప్పగిస్తుంది. మరొకరు పిల్లలను కలుసుకునే హక్కులు ఇవ్వకపోతే సింగిల్‌ పేరెంట్‌ సర్టిఫికేట్​తో పాస్‌పోర్టు మంజూరవుతుంది. కోర్టు ఆదేశానికి సంబంధించిన పత్రాలను సమర్పించాలి.

3. పెళ్లయిన తర్వాత బిడ్డ పుట్టగానే తల్లి లేదా తండ్రి వదిలేసి వెళ్లిపోయినప్పుడు, కొన్నేళ్లుగా వారితో సంబంధాలు లేని సందర్భాల్లో బాధ్యత తీసుకున్న తల్లి లేదా తండ్రి విడాకులతో సంబంధం లేకుండా ‘అనెక్జర్‌-సి’లో ఆ విషయాన్ని తెలియజేస్తే సరిపోతుంది. అత్యాచారం, పెళ్లికి ముందే గర్భం దాల్చడం, తండ్రి ఎవరో తెలియని సందర్భాల్లో తల్లి సంరక్షకురాలిగా దరఖాస్తు చేస్తే సరిపోతుంది.

4. తల్లిదండ్రులు చట్టబద్దంగా విడిపోయిన తర్వాత వేర్వేరు పెళ్లిళ్లు చేసుకోవడం, తల్లిదండ్రుల్లో ఒకరు మరణించిన సందర్భాల్లో వేరే తల్లి, లేదా వేరే తండ్రి పేర్లను పాస్‌పోర్టులో చేర్చేందుకు అవకాశం ఉంది. జీవ సంబంధమైన తల్లి లేదా తండ్రి పేరు అవసరం లేదని వారి పేర్లకు బదులుగా మారు తల్లి లేదా మారు తండ్రి పేరు చేర్చాలని పిల్లల బాధ్యత తీసుకున్నవారు తెల్లకాగితంపై రాసి ఇవ్వాల్సి ఉంటుంది.

తల్లిదండ్రులిద్దరూ విదేశాల్లో ఉంటే : తల్లిదండ్రులిద్దరూ విదేశాల్లో ఉంటే పిల్లలను చూసుకునే నాయనమ్మ లేదా తాత లేదంటే సంరక్షకులను నియమించాలి. గార్డియన్‌కు సంబంధించిన వివరాలను ఎంబసీ తప్పనిసరిగా ధ్రువీకరించాల్సి ఉంటుంది. ఈ మేరకు తల్లిదండ్రులిద్దరూ సంతకం చేసి జాయింట్​ అఫిడవిట్, అపెండెక్స్‌-11ను సమర్పించాలి. ఒకవేళ లీగల్‌ గార్డియన్‌ ఉంటే కోర్టు ఉత్తర్వులు ఇచ్చిన పేపర్లను సమర్పించాలి.