ఇంటర్​ కాస్ట్​ మ్యారేజ్ చేసుకుంటే రూ.2.50 లక్షలు - ప్రభుత్వ పథకానికి అప్లై చేసుకోండిలా!

-కులాంతర వివాహాలను ప్రోత్సహించేందుకు సర్కారు ఆర్థిక సాయం - నిమిషాల్లోనే దరఖాస్తు చేసుకోవచ్చు

How to Apply for Intercaste Marriage Incentive Award: నేటి జనరేషన్​లో ప్రేమ పెళ్లిళ్లు సర్వసాధారణమయ్యాయి. స్వచ్ఛమైన ప్రేమకు.. కులాలు, మతాలు అడ్డురావని నిరూపిస్తూ చాలా మంది యువత కులాంతర వివాహాలు చేసుకుంటున్నారు. అయితే.. ఇలా కులాంతర వివాహం చేసుకునే వారు ఆర్థికంగా ఇబ్బందులు పడకుండా ఉండేందుకు తెలంగాణ ప్రభుత్వం ఓ పథకాన్ని తీసుకొచ్చింది. ఈ పథకం ద్వారా ప్రభుత్వం నుంచి ఆర్థిక సాయాన్ని పొందవచ్చు. మరి ఆ స్కీమ్​ ఏంటి? అర్హతలు? ఎలా అప్లై చేసుకోవాలి? స్టేటస్​ ఎలా చెక్​ చేసుకోవాలి? అనే వివరాలను ఇప్పుడు తెలుసుకుందాం..

తెలంగాణ ప్రభుత్వం "ఇంటర్​ క్యాస్ట్​ ఇన్సెంటివ్​ స్కీమ్"​ను అమలు చేస్తోంది. సమాజంలో అంటరానితనాన్ని తగ్గించడానికి, కులాంతర వివాహాలను ప్రోత్సహించడానికి ఈ పథకం ప్రవేశపెట్టింది.

ఈ పథకం ప్రయోజనాలు:

• ఈ పథకం కింద కులాంతర వివాహం చేసుకున్న జంటలు ఏకకాలంలో రూ.2.50లక్షల ఆర్థిక సాయాన్ని అందుకుంటారు.
• ఈ స్కీమ్​ కులాంతర వివాహాలకు చట్టపరమైన చెల్లుబాటును అందిస్తుంది.
• కులాంతర వివాహానికి సంబంధించిన చట్టపరమైన రుజువుతో.. జంటలు వివిధ సంక్షేమ పథకాలు, ప్రభుత్వ సేవలను సులభంగా పొందవచ్చు.

అర్హతలు:

• అమ్మాయి, అబ్బాయి తెలంగాణ వాసులై ఉండాలి.
• అమ్మాయిలకు 18, అబ్బాయిలకు 21 సంవత్సరాల వయసు పూర్తై ఉండాలి.
• ఒక భాగస్వామి షెడ్యూల్డ్​ కులానికి(SC) సంబంధించినవారై, మరొకరు ఇతర కులానికి చెందిన వారై ఉండాలి.
• ఈ పథకానికి అప్లై చేసుకునే వారు 2019, అక్టోబర్​ 30 తర్వాత కులాంతర వివాహం చేసుకుని ఉండాలి. వారికి మాత్రమే రూ.2.5లక్షల ఆర్థిక సాయం అందుతుంది. ఒకవేళ ఈ తేదీకన్నా ముందు చేసుకున్న వారికి 50 వేలు మాత్రమే అందుతుంది. వాళ్లు జిల్లా కార్యాలయాల్లో దరఖాస్తు చేసుకోవాలి.
• అమ్మాయి, అబ్బాయి మొదటి పెళ్లికే ఈ స్కీమ్​ వర్తిస్తుంది. రెండు, మూడు పెళ్లిళ్లకు ఈ పథకం వర్తించదు. అలాగే వివాహమైన ఏడాది లోపే దరఖాస్తు చేసుకోవాలి.

అవసరమైన పత్రాలు:

• అమ్మాయి, అబ్బాయి ఆధార్‌ కార్డు
• ఇద్దరూ కలిపి తీసుకున్న జాయింట్‌ బ్యాంకు ఖాతా
• ఇద్దరి కుల, ఆదాయ ధ్రువీకరణ పత్రాలు
• వివాహ రిజిస్ట్రేషన్‌ సర్టిఫికెట్‌, ఫొటోలు
• శాశ్వత, తాత్కాళిక అడ్రస్​ ప్రూఫ్​
• పాస్​పోర్ట్​ సైజ్​ ఫొటోలు
• ఇద్దరు సాక్షుల ఆధార్​ కార్డ్​లు

దరఖాస్తు విధానం: వధూవరులు తెలంగాణ ఈపాస్‌ వెబ్‌సైట్‌ ద్వారా ఆన్‌లైన్‌లో దరఖాస్తు చేసుకోవాల్సి ఉంటుంది. అందుకోసం..

• ముందుగా https://telanganaepass.cgg.gov.in/ అధికారిక వెబ్​సైట్​ను ఓపెన్​ చేయాలి.
• కిందకు స్క్రోల్​ చేసి Marriage Incentive Awards ఆప్షన్​పై క్లిక్​ చేయాలి.
• అనంతరం Inter caste Marriage Incentive Award (SC Development)లో కుడి వైపున ఉన్న Application Registration ఆప్షన్​పై క్లిక్​ చేయాలి. అప్పుడు మీకు కొత్త పేజీ ఓపెన్​ అవుతుంది.
• అందులో వధువు, వరుడుకు సంబంధించిన పర్సనల్​ వివరాలు, పర్మినెంట్​ అడ్రస్, ప్రజెంట్​ అడ్రస్​, ఆదాయ, కుల​ ధ్రువీకరణ పత్రాల వివరాలు, సాక్షుల వివరాలు, పెళ్లి జరిగిన తేదీ, ప్లేస్​, మ్యారేజ్​ రిజిస్ట్రేషన్​ వివరాలు, దంపతుల జాయింట్​ బ్యాంక్​ అకౌంట్​ వివరాలు అన్ని ఎంటర్​ చేయాలి.
• ఆ తర్వాత కావాల్సిన పత్రాలను అప్​లోడ్​ చేయాలి.
• ఎంటర్​ చేసిన వివరాలన్నీ మరొకసారి సరిచూసి Submit ఆప్షన్​పై క్లిక్​ చేయాలి.
• మీ అప్లికేషన్​ సబ్మిట్​ అయిన తర్వాత మీకు ఓ రిసిప్ట్​ వస్తుంది. దానిని ప్రింట్​ తీసి జాగ్రత్తగా భద్రపరచుకోవాలి. ఇలా చేస్తే మీ దరఖాస్తు పూర్తైనట్లు.

స్టేటస్​ చెక్​ చేసుకోవడం ఎలా: ఇంటర్​ క్యాస్ట్​ ఇన్సెంటివ్​ స్కీమ్​కు అప్లై చేసుకున్న వారు మీ అప్లికేషన్​ స్టేటస్​ను వెరిఫై చేసుకోవచ్చు. అందుకోసం..

• ముందుగా https://telanganaepass.cgg.gov.in/ అధికారిక వెబ్​సైట్​ను ఓపెన్​ చేయాలి.
• ఆ తర్వాత Marriage Incentive Awards ఆప్షన్​పై క్లిక్​ చేయాలి. అనంతరం Inter caste Marriage Incentive Awardలో కుడి వైపున ఉన్న Application Print/Status ఆప్షన్​ పై క్లిక్​ చేయాలి. అప్పుడు మీకు కొత్త పేజీ ఓపెన్​ అవుతుంది.
• ఆ తర్వాత మీకు అప్లై చేసే సమయంలో మ్యారేజ్​ ఐడీ ఇస్తారు. దానిని ఎంటర్​ చేయాలి. అది లేకపోతే వధువు ఆధార్​ నెంబర్​ ఎంటర్​ చేసి Get Statusపై క్లిక్​ చేయాలి.
• మీ అప్లికేషన్​ స్టేటస్​ స్క్రీన్​ మీద డిస్​ప్లే అవుతుంది.