Heavy Traffic Issues in Hyderabad : అత్యవసరమని కారు లేదా బైక్తో రోడెక్కితే చాలు ట్రాఫిక్. అందులో ఇరుక్కున్నామంటే గంటల తరబడి నరకయాతన అనుభవించాల్సిందే. దీనికి పగలు, రాత్రి అనే తేడానే లేదు. ఇలా ట్రాఫిక్ ఉన్నప్పుడు అక్కడ పోలీసు కనిపించడు. ఈ రద్దీని పర్యవేక్షించాల్సిన అధికారులే అటువైపు కన్నెత్తి చూడటం లేదు. ఇప్పుడు ఈ సమస్య హైదరాబాద్ మహానగరంలో అతిపెద్ద సమస్యగా మారింది. ఆఫీసుకు వెళ్లాలన్నా, అత్యవసర పనికి, విద్యార్థులు స్కూల్, కళాశాలకు వెళ్లాలన్నా ట్రాఫిక్ ఇబ్బందులను చవిచూస్తూ ముందుకు సాగాల్సి వస్తోంది.
Public Facing Problems Due To Traffic Jam in Hyderabad : ఎన్నికలకు ముందు ఉన్న ట్రాఫిక్ అదనపు సీపీ విశ్వప్రసాద్ ఎన్నికల కోడ్ సమయంలో బదిలీ అయ్యారు. ఇన్ఛార్జిపై అదనపు భారం పడటంతో పర్యవేక్షణ భారంగా మారింది. కీలకమైన ఈ పోస్ట్ మూడు నెలల నుంచి ఖాళీగానే ఉంది. మారుతున్న అవసరాలకు తగినట్లుగా ట్రాఫిక్ పోలీసు సిబ్బందిని పెంచకపోవడంతో ట్రాఫిక్ క్రమబద్ధీకరణ సమస్యగా మారినట్లు తెలుస్తోంది.
నగరంలో 25 లక్షలు పైనే వాహనాలు : గతంలో గ్రేటర్ పరిధిలో నిత్యం 25 లక్షల వాహనాలు రోడ్లపైకి వచ్చేవి. ఇప్పుడు ఆ సంఖ్య 20 శాతం పెరిగినట్లు ట్రాఫిక్ పోలీసులు అంచనా వేస్తున్నారు. వాహనాల సంఖ్య పెరగడం, ఇతర రాష్ట్రాలు, ప్రాంతాల నుంచి కూడా అధిక సంఖ్యలో వాహనాలు నగరంలోకి వస్తున్నాయి. దీంతో వాహనాల సంఖ్య రెట్టింపు అయింది. అదే విధంగా విద్యా సంవత్సరం ప్రారంభం కావడంతో స్కూల్, కాలేజీ బస్సులు రోడ్లపైకి ఎక్కువగా వస్తున్నాయి. దీంతో ఇంకా వాహన రద్దీ పెరిగే అవకాశం ఉంది. మరోవైపు ప్రముఖుల వాహనాలు, ప్రొటోకాల్ అని చెప్పి తరచూ ట్రాఫిక్ను నిలిపి వేస్తున్నారు.
నిబంధనలు అతిక్రమిస్తున్న ప్రైవేట్ వాహనాలు : ప్రైవేట్ బస్సులు, లారీలు, భారీ వాహనాలు యథేచ్ఛగా నిబంధనలు అతిక్రమిస్తున్నాయి. ఇలా గతంలో నిబంధనలు పాటించని వాహనాలను పోలీసులు స్వాధీనం చేసుకునేవారు. ప్రైవేట్ వాహనదారులు చలాన్లు వేయడం వల్ల పట్టించుకోవడం లేదు. ఈ ఏడాది ఐదు నెలల వ్యవధిలోనే మూడు పోలీసు కమిషనరేట్ల పరిధిలో 40లక్షల ఘటనల్లో వాహనదారులు నిబంధనలు ఉల్లంఘించినట్లుగా అధికారులు గుర్తించారు. వారందరిపై పోలీసులు కేసులు నమోదు చేశారు.
రోడ్లకు ఇరువైపులా వాహనాలు నిలుపుదల : ట్రాఫిక్కు ప్రధాన సమస్యగా రోడ్లపై ఇరువైపులా వాహనాలు నిలపటమే కారణంగా తెలుస్తోంది. ముఖ్యంగా నగర శివారు ప్రాంతాలు, నగరంలోనూ ఈ సమస్య ఎక్కువగా ఉంది. కీలకమైన ఎల్బీనగర్, ఉప్పల్, నాగోల్, దిల్సుఖ్నగర్, అబిడ్స్, తార్నాక, నారాయణగూడ, బంజారాహిల్స్, చాదర్ఘాట్, సికింద్రాబాద్, జూబ్లీహిల్స్, గచ్చిబౌలి, మాదాపూర్, మియాపూర్, కూకట్పల్లి మార్గాల్లో వేలాది వాహనాలు రోడ్లుకు ఇరువైపులా నిలిపి ఉంచుతున్నారు.
రోజుకు సగటున 20 వాహనాలు మొరాయింపు : నగరంలోని మూడు కమిషనరేట్ల పరిధిలో రోజూ సగటున 20 వాహనాలు ఇంధనం లేక, మరమ్మతులకు గురై మొరాయింపునకు గురవుతున్నాయి. ఒకవేళ రద్దీ ప్రాంతాలు, పై వంతెనలపై వాహనాలు నిలిచిపోతే ట్రాఫిక్ సిబ్బందికి సుమారు 1 గంట నుంచి రెండు గంటల సమయం పడుతుంది వాటిని తొలగించడానికి. ఈ సమస్యలతో పాటు చీకటి పడితే చాలు వచ్చే సమస్యగా ప్రైవేట్ బస్సులు తయారయ్యాయి. ఇతర జిల్లాలు, రాష్ట్రాలకు ప్రయాణికులను తీసుకెళ్లే ఈ బస్సులు మియాపూర్, కేవీహెచ్బీ, ఎస్సార్నగర్, లక్డీకాపూల్, అమీర్పేట, అబిడ్స్, కాచిగూడ, అత్తాపూర్, ఉప్పల్, దిల్సుఖ్నగర్, ఎల్బీనగర్, మెహిదీపట్నం, వనస్థలిపురం ప్రాంతాల్లో గంటల తరబడి నిలపడం వల్ల ట్రాఫిక్ సమస్య తీవ్రమవుతుంది.
సీఎం బస్సు యాత్రా మజాకా - ఎక్కడికక్కడ ట్రాఫిక్ ఆంక్షలు - jagan bus yatra traffic diversions
