Heavy Rain Alert To Telangana For Next Five Days : రాష్ట్రంలోని పలు జిల్లాల్లో భారీ వర్షాలు కురిసే అవకాశముందని హైదరాబాద్ వాతావరణ కేంద్రం తెలిపింది. ఆదిలాబాద్‌, ఆసిఫాబాద్‌, మంచిర్యాల, నిర్మల్‌, పెద్దపల్లి, భూపాలపల్లి, ములుగు, భద్రాద్రి, ఖమ్మం, నల్గొండ, సూర్యపేట జిల్లాలో భారీ వర్షాలు పడతాయని తెలిపింది. మహాబూబాబాద్‌, వరంగల్‌, హన్మకొండ, జనగామ, సిద్దిపేట, యాదాద్రి, రంగారెడ్డి, హైదరాబాద్, మేడ్చల్‌, వికారాబాద్‌, సంగారెడ్డి, మెదక్, మహబూబ్‌నగర్‌, నాగర్‌కర్నూల్‌, వనపర్తి, నారాయణపేట, గద్వాల భారీ వర్షాలు పడతాయని, ఈ జిల్లాలకు వాతావరణ శాఖ ఎల్లో హెచ్చరికలు జారీ చేసింది.
అవసరమైతేనే బయటకు రండి : కాగా సోమవారం రాష్ట్రంలోని పలు జిల్లాల్లో భారీ వర్షాలు పడతాయని ఐఎండీ సూచించింది. భద్రాద్రి, ఖమ్మం, నల్గొండ జిల్లాల్లో భారీ వర్షాలు కురిసే అవకాశముందని తెలిపింది. సూర్యాపేట, వరంగల్‌, రంగారెడ్డి, వికారాబాద్‌, మహబూబ్‌నగర్‌, నాగర్‌కర్నూల్‌, వనపర్తి జిల్లాల్లో వానలు పడతాయని వివరించింది. ఆదివారం నారాయణపేట, గద్వాల్‌ జిల్లాలకు కూడా ఎల్లో హెచ్చరికలు జారీ చేసింది. వర్షాల దృష్యా ఎవరూ బయటకు రావొద్దని, అత్యవసర పరిస్థితుల్లోనే రావాలని సూచించింది. వర్షాల సూచనతో హైదరాబాద్ బల్దీయా రంగంలోకి దిగింది. ట్రాఫిక్ అంతరాయం కలగకుండా రోడ్లపై నీరు ఆగకుండా చర్యలు తీసుకుంటున్నారు. చిన్నపిల్లలు బయటకు రావొద్దని సూచించారు.
ఐదు రోజుల పాటు భారీ వర్షాలు : ఆదివారం పశ్చిమ మధ్య బంగాళాఖాతం దానిని ఆనుకుని ఉన్న నైరుతి బంగాళాఖాతంలో ఎగువ గాలులలో కొనసాగిన ఆవర్తనం పశ్చిమ మధ్య బంగాళాఖాతంలో, తూర్పు- పశ్చిమ గాలి విచ్ఛిన్నతిలో కేంద్రీకృతమై, మధ్య ట్రోపోస్పిరిక్ స్థాయిల వరకు విస్తరించినట్లు హైదరాబాద్ వాతావరణ కేంద్రం ప్రకటించింది. దీని ప్రభావం వల్ల సోమవారం వాయువ్య పరిసర పశ్చిమ - మధ్య బంగాళాఖాతంలో అల్ప పీడనం ఏర్పడే అవకాశం ఉన్నట్లు తెలిపింది. ప్రస్తుతం ఆవర్తనం ప్రభావంతో రాష్ట్రంలో ఐదు రోజుల పాటు భారీ వర్షాలు కురుస్తాయని ప్రకటించింది. పలు జిల్లాలకు ఎల్లో హెచ్చరికలను జారీ చేసింది. అలానే గంటకు 30 నుంచి 40 కిలో మీటర్ల వేగంతో గాలులు వీస్తాయని తెలిపింది.
హైదరాబాద్‌లోని పలు ప్రాంతాల్లో వర్షం - రోడ్లపై పారుతున్న వరద నీరు - Heavy Rain in Hyderabad
