జీహెచ్​ఎంసీ సమ్మర్​ క్యాంప్స్​ షురూ - 44 క్రీడల్లో 37 రోజుల పాటు పిల్లలకు శిక్షణ - GHMC Summer Coaching Camps

GHMC Focus Summer Camps in Hyderabad : విద్యా సంవత్సరం పొడవునా ఎప్పుడూ పాఠాలు, పరీక్షలంటూ పుస్తకాలతో కుస్తీ పట్టి విద్య నేర్చుకోవడానికే పరిమితమైన విద్యార్థులకు వేసవి సెలవుల్లో కాస్త ఆటవిడుపు కోసం నగరపాలక సంస్థ ప్రత్యేక శిక్షణ శిబిరాలు ఏర్పాటు చేసింది. బాల బాలికల్లో దాగిన ప్రత్యేక నైపుణ్యాలు వెలికితీసేందుకు, క్రీడల పట్ల ఆసక్తి పెంచేందుకు ప్రయత్నిస్తోంది. 6 నుంచి 16 ఏళ్ల పిల్లల కోసం సుమారు 40 క్రీడల్లో సల్పకాల శిక్షణకు హైదరాబాద్ నగరపాలక సంస్థ ప్రత్యేక కార్యాచరణ సిద్ధం చేసింది. స్వల్ప రుసుముతో పలు క్రీడల్లో శిక్షణ ప్రారంభిస్తోంది.

GHMC Summer Coaching Camps for Children : సమ్మర్ అంటేనే పిల్లలకు కొత్త కోర్సులు నేర్చుకోవడానికి ప్రత్యేక సమయం అని చెప్పవచ్చు. వేసవిలోనే వివిధ సంస్థలు ప్రత్యేక కార్యక్రమాలను నిర్వహిస్తుంటారు. రెండు నెలల సమయాన్ని వృథా చేసుకోకుండా ఉండేందుకు, భవిష్యత్​కు ఉపయోగపడే విధంగా కొత్త కోర్సులను నేర్చుకునేందుకు వేసవి ఎంతగానో ఉపయోగపడుతుంది. తల్లిదండ్రులు తమ పిల్లల్లో క్రీడా నైపుణ్యాన్ని పెంపొందించేందుకు పిల్లలకు ఇష్టమైన అంశాల్లో శిక్షణ ఇప్పిస్తుంటారు.

ముఖ్యంగా హైదరాబాద్ నగరంలో ఇలాంటి వాటి పట్ల ప్రజలు ఎక్కువగా మక్కువ చూపిస్తుంటారు. అందుకే గత కొన్నేళ్లుగా జీహెచ్​ఎంసీ ప్రత్యేక సమ్మర్ క్యాంప్​లను ఏర్పాటు చేస్తోంది. ఈ ఏడాది కూడా 6 నుంచి 16 సంవత్సరాల వయసు గల పిల్లల్లో క్రీడా నైపుణ్యాన్ని పెంపొందించేందుకు 37 రోజుల పాటు ప్రత్యేక సమ్మర్ క్యాంపులు ప్రారంభించింది. ఎంపిక చేసిన కొన్ని ప్రత్యేక క్రీడ ప్రాంగణాల్లో క్రీడలు నిర్వహిస్తూ పిల్లలను ప్రోత్సహిస్తున్నారు.

GHMC Summer Camp Events : ఏటా హైదరాబాద్ నగరంలో వివిధ రకాల క్రీడల్లో ప్రత్యేక సమ్మర్ కోచింగ్ క్యాంప్​లను ఏర్పాటు చేశారు. ఈ ఏడాది కూడా 44 క్రీడల్లో సమ్మర్ క్యాంప్​లు నిర్వహిస్తున్నామని జీహెచ్​ఎంసీ కమిషనర్ రొనాల్డ్​రాస్ పేర్కొన్నారు. క్యాంప్​లకు అవసరమైన స్పోర్ట్ మెటీరియల్​ను ఆయన పరిశీలించారు. ఈ క్యాంప్ కోసం ప్రత్యేకంగా ట్రెయినేర్స్​ను ఏర్పాటు చేశారు. ఉదయం 6 నుంచి 9 వరకు, సాయంత్రం 3 నుంచి 6 గంటల వరకు శిక్షణ ఇస్తారు.

సమ్మర్​ కోచింగ్​ క్యాంప్​ కోసం 10 నుంచి 100 రూపాయల దాకా రుసుములు వసూలు చేస్తారు. ఆన్​లైన్ ద్వారా నగదు చెల్లించాల్సి ఉంటుంది. షటిల్, బాల్ బ్యాడ్మింటన్, బాస్కెట్ బాల్, బాక్సింగ్, క్రికెట్, ఫుట్ బాల్, కరాటే, టేబుల్ టెన్నిస్, వాలీబాల్, యోగా, క్యారమ్, చెస్, స్విమ్మింగ్ వంటి అంశాల్లో శిక్షణ ఇస్తారు. ప్రత్యేకంగా వేసవి కాలంలో నిర్వహించే సమ్మర్ క్యాంప్స్​ వల్ల పిల్లల క్రీడల పట్ల ఆసక్తి పెరగటమే కాకుండా శారీరకంగా మానసికంగా అభివృద్ధి చెందటానికి ఇవి ఎంతగానో ఉపయోగపడతాయి.

పిల్లలు ఇలా సమ్మర్‌లో క్యాంప్​లో చేరితే ఉత్సాహంగా కొత్తగా ఏమైనా నేర్చుకుంటారని, దీని వల్ల వారు శారీరకంగా, మానసికంగా దృఢంగా తయారవుతారని నిపుణులు చెబుతున్నారు. మరోవైపు హైదరాబాద్‌ క్రికెట్‌ ఆసోసియేషన్‌ ఆధ్వర్యంలో ఏప్రిల్ 20 నుంచి మే 20 తేదీ వరకు 30 రోజుల పాటు ఉచిత క్రికెట్‌ శిక్షణ ఇవ్వనున్నారు. హైదరాబాద్‌తోపాటు ఉమ్మడి జిల్లాల ప్రాతిపదికన క్యాంప్స్‌ నిర్వహిస్తున్నట్లు హెచ్‌సీఏ ప్రెసిడెంట్‌ జగన్‌మోహన్‌ రావు తెలిపారు.