కోరిక తీర్చమంటూ బలవంతం - ప్రతిఘటించడంతో మహిళపై అత్యాచారం - ఆపై కాల్వలో పడేసిన యువకులు

కోరిక తీర్చమంటూ నలుగురు యువకులు మహిళపై బలవంతం - ప్రతిఘటించడంతో పొదల్లోకి లాక్కెళ్లి సామూహిక అత్యాచారం - ఆపై మహిళను కాల్వలో పడేసిన నిందితులు

Gang Rape of Nursery Worker in East Godavari District : వారిది నిరుపేద కుటుంబం. ఆ దంపతులు ఉపాధి కోసం ఒడిశా నుంచి ఏపీలో తూర్పుగోదావరి జిల్లాకు వలస వచ్చారు. నర్సరీల్లో కూలి పనులు చేసుకుంటూ జీవనం సాగిస్తున్నారు. వీరికి ఓ కుమారుడు, దివ్యాంగురాలైన కుమార్తె ఉన్నారు. ఈ నేపథ్యంలో ఎప్పటికలాగానే కూలి పనుల కోసం నర్సరీకి వెళ్లిన మహిళపై నలుగురు వ్యక్తులు సామూహిక అత్యాచారం చేశారు. ఆపై కాల్వలో పడేసి హతమార్చారు. ఈ దారుణమైన ఘటన తూర్పుగోదావరి జిల్లా కడియంలో చోటుచేసుకోగా ఆలస్యంగా వెలుగులోకి వచ్చింది. అత్యాచారానికి పాల్పడిని నలుగురిని పోలీసులు అరెస్టు చేసి రిమాండ్​కు తరలించారు.

ఏపీలో తూర్పుగోదావరి జిల్లా కడియం మండలంలో 43 ఏళ్ల మహిళపై నలుగురు యువకులు సామూహిక అత్యాచారం చేశారు. పోలీసులు తెలిపిన వివరాల ప్రకారం ఒడిశా రాష్ట్రానికి చెందిన దంపతులు చాలా కాలంగా కడియం మండలంలో నివాసం ఉంటున్నారు. వీరికి ఓ కుమారుడు, దివ్యాంగురాలైన కుమార్తె ఉన్నారు. నర్సరీల్లో కూలీ పనులు చేసుకుంటూ జీవనం సాగిస్తున్నారు. గత నెల 15న కూడా ఆ మహిళ నర్సరీలో పనులు ముగించుకొని ఇంటికి వెళ్తున్న సమయంలో ఆదే గ్రామానికి చెందిన వెలుబుడి ప్రవీణ్, దేవర ఏసు, లోకిన జయప్రసాద్, ఇతర ప్రాంతానికి చెందిన దాసరి సురేష్​లు కోరిక తీర్చమంటూ బలవంతం చేశారు.

కాల్వలో మహిళ మృతదేహం : ఈ నేపథ్యంలో ఆమె ప్రతిఘటించడంతో సమీపంలోని పొదల్లోకి లాక్కెళ్లి అత్యంత పాశవికంగా అత్యాచారం చేశారు. ఆమె ప్రాణాలతో ఉందో లేదో అని కూడా తెలియని పరిస్థితుల్లో ఈ దారుణానికి ఒడిగట్టారు. ఆపై అదేరోజు రాత్రి 9 గంటలకు మహిళలను పంటకాల్వలో పడేశారు. అప్పటికే ఆమె చనిపోయారా ? లేదా బతికే ఉన్నారని అన్నది పోస్టుమార్టమ్​ రిపోర్టులో తెలియాల్సి ఉంది. బాధిత మహిళ రాత్రి అయినా ఇంటికి రాకపోవడంతో ఆమె కుటుంబసభ్యలు గత నెల 16న కడియం పోలీసులకు ఫిర్యాదు చేశారు. ఈ మేరకు దర్యాప్తు చేపట్టిన పోలీసులు, గత నెల 17న ఆలమూరు మండలం చొప్పెళ్ల వద్ద కాల్వలో మహిళ మృతదేహాన్ని గుర్తించారు.

నల్లపూసల దండ, కాలి పట్టీ, పొట్ట భాగంలో శస్త్రచికిత్స ఆనవాళ్ల ఆధారంగా కుటుంబసభ్యలు మహిళను నిర్ధారించారు. ఈ నేపథ్యంలో గత 31న పోలీసులు దేవర ఏసును అదుపులోకి తీసుకుని విచారించగా ఈ దారుణం వెలుగు చూసింది. నిందితులంతా 19 నుంచి 26 ఏళ్ల లోపు వయసు వారేనని పోలీసులు తెలిపారు. వారిని అరెస్టు చేసి రిమాండ్​కు తరలించినట్లు వివరించారు. అత్యాచారానికి పాల్పడిన నిందితులు గంజాయికి బానిసలై నిత్యం మద్యం మత్తులో ఉండేవారని పోలీసుల విచారణలో స్థానికులు తెలిపారు.

దయనీయ పరిస్థితుల్లో మహిళ కుటుంబం : మహిళ మృతితో ఆమె కుటుంబీకుల పరిస్థితి దయనీయంగా మారింది. దివ్యాంగురాలైన కుమార్తెకు ఆమె నిత్యం సపర్యలు చేసి అనంతరం నర్సరీలోని పనికి వెళ్లేవారు. ఇప్పుడామె మృతి చెందడంతో దివ్యాంగురాలైన కుమార్తె పరిస్థితి ప్రశ్నార్థకంగా మారింది. ఈ దారుణానికి పాల్పడిన నిందితులను ప్రభుత్వం కఠినంగా శిక్షించి తమను ఆదుకోవాంటూ బాధితులు విజ్ఞప్తి చేస్తున్నారు.