గడ్చిరోలి జిల్లాలో ఎదురుకాల్పులు- నలుగురు మావోయిస్టులు హతం

Four Maoists Killed in Gadchiroli : మహారాష్ట్రలోని గడ్చిరోలి జిల్లాలో మావోయిస్టులు, భద్రతా బలగాలకు మధ్య జరిగిన ఎదురు కాల్పుల్లో నలుగురు మావోయిస్టులు హతమయ్యారు. వీరంతా తెలంగాణ రాష్ట్ర కమిటీకి చెందిన వారిగా అధికారులు గుర్తించారు.

Four Maoists Killed in Gadchiroli : మహారాష్ట్రలోని గడ్చిరోలి జిల్లాలో మావోయిస్టులు, భద్రతా బలగాలకు మధ్య ఎదురు కాల్పులు జరిగాయి. 60 కమాండర్లతో జరిగిన కాల్పుల్లో మావోయిస్టులకు ఊహించని రీతిలో భారీ ఎదురుదెబ్బ తగిలింది. ఈ కాల్పుల్లో నలుగురు మావోయిస్టులు హతమయ్యారు. మరణించిన నలుగురూ తెలంగాణ రాష్ట్ర కమిటీ మావోయిస్టులుగా అధికారులు గుర్తించారు. ఛత్తీస్​గడ్, మహారాష్ట్ర సరిహద్దుల్లో ఎదురుకాల్పులు జరిగినట్లు తెలిపారు.

నలుగురిపై గతంలో పోలీసుశాఖ భారీ రివార్డు ప్రకటించినట్లు వెల్లడించారు. నలుగురు మావోయిస్టులపై గతంలో రూ.36 లక్షల రివార్డు ప్రకటన చేసినట్లు తెలిపారు. చనిపోయిన మావోయిస్టులను వర్గీస్‌, మగ్తూ, కుర్సంగ్‌ రాజు, కుడిమెట్ట వెంకటేశ్​గా అధికారులు గుర్తించారు. ఎదురుకాల్పుల్లో మంచిర్యాల డివిజన్‌ కమిటీ సెక్రటరీ వర్గీస్‌, చెన్నూరు ఏరియా కమిటీ సెక్రటరీ మగ్తూ, ప్లటూన్‌ మెంబర్లు రాజు, వెంకటేశ్‌ మృతి చెందినట్లు చెప్పారు. ఘటనస్థలం నుంచి ఏకే 47, ఒక కార్బైన్​, రెండు పిస్టల్స్​తో సహా పెద్ద మొత్తంలో పేలుడు పదార్థాలు పోలీసులు స్వాధీనం చేసుకున్నారు.