AP Ex MLA Pinnelli Ramakrishna Reddy Arrest : ఈవీఎం ధ్వంసం, అడ్డుకున్నవారిపై దాడి కేసుల్లో వైఎస్సార్సీపీ మాజీ ఎమ్మెల్యే పిన్నెల్లి రామకృష్ణారెడ్డి వేసిన ముందస్తు బెయిల్ పిటిషన్లను ఏపీ హైకోర్టు కొట్టేయడంతో పోలీసులు ఆయనను అరెస్టు చేశారు. నరసరావుపేటలో ఆయనను అదుపులోకి తీసుకున్నారు. అక్కడి నుంచి ఎస్పీ కార్యాలయానికి తరలించారు. ఎస్పీ కార్యాలయం నుంచి మాచర్ల కోర్టుకు పోలీసులు తరలించే అవకాశం ఉన్నట్లు సమాచారం.
పిన్నెల్లి పిటిషన్ను కొట్టేసిన హైకోర్టు : అంతకు ముందు పిన్నెల్లి రామకృష్ణారెడ్డి వేసిన బెయిల్ పిటిషన్లను హైకోర్టు కొట్టేసింది. అరెస్ట్ నుంచి రక్షణ కోరుతూ 4 ముందస్తు బెయిల్ పిటిషన్లు పిన్నెల్లి హైకోర్టులో వేశారు. ఈవీఎం ధ్వంసం కేసులో పిన్నెల్లిపై పోలీసులు కేసు పెట్టారు. పోలీసుల తరఫున స్పెషల్ కౌన్సిల్గా న్యాయవాది ఎన్. అశ్వినీకుమార్ వాదించారు. ఫిర్యాదురారు శేషగిరిరావు తరఫున న్యాయవాది పోసాని వెంకటేశ్వర్లు వాదించారు.
పిన్నెల్లి అరాచకం: ఎన్నికల పోలింగ్ రోజు పాల్వయిగేటు పోలింగ్ బూత్‌లో పిన్నెల్లి రామకృష్ణారెడ్డి ఈవీఎంను ధ్వంసం చేయడంతో పాటు అడ్డుకోబోయిన టీడీపీ ఏజెంట్‌ నంబూరి శేషగిరిరావుపై దాడి చేసి, హత్యాయత్నానికి పాల్పడారు. దీనిపై ప్రశ్నించిన చెరుకూరి నాగశిరోమణి అనే మహిళను దుర్భాషలాడి బెదిరించారు. అలాగే పోలింగ్ మరుసటిరోజు పిన్నెల్లి, ఆయన తమ్ముడు వెంకట్రామిరెడ్డి అనుచరులతో కలిసి కారంపూడిలో విధ్వంసం సృష్టించారు.
సీఐ టీపీ నారాయణస్వామిపై దాడిచేసి గాయపరిచారు. వీటన్నింటి మీదా పోలీసులు కేసులు నమోదు చేశారు. అయితే ముందస్తు బెయిల్ కోసం పిన్నెల్లి రామకృష్ణారెడ్డి దాఖలు చేసిన నాలుగు పిటిషన్లు జూన్‌ 20న హైకోర్టులో వాదనలు ముగియగా ధర్మాసనం బుధవారం తీర్పు వెలువరించింది. ముందస్తు బెయిల్ నిరాకరించిన నేపథ్యంలో పిన్నెల్లిని పోలీసులు అరెస్టు చేశారు.
