RGV Seeking Time For Investigation in Social Media Case : సినీ దర్శకుడు రామ్గోపాల్ వర్మ పోలీసుల విచారణకు గైర్హాజరయ్యారు. అప్పటి టీడీపీ అధినేత, ప్రస్తుత ఏపీ సీఎం చంద్రబాబు, లోకేశ్, జనసేన అధినేత పవన్ కల్యాణ్లను కించపరుస్తూ సామాజిక మాధ్యమాల్లో వర్మ పోస్టులు పెట్టారంటూ ఆయనపై ఏపీలోని మద్దిపాడు పోలీస్స్టేషన్లో కేసు నమోదైంది. టీడీపీ మద్దిపాడు మండల ప్రధాన కార్యదర్శి ముత్తనపల్లి రామలింగం ఫిర్యాదు మేరకు కేసు నమోదు చేసి దర్యాప్తు చేపట్టిన పోలీసులు, రాంగోపాల్ వర్మను విచారణకు రావాల్సిందిగా ఆదేశించారు. ఈ నేపథ్యంలో నేడు ఒంగోలు గ్రామీణ సీఐ కార్యాలయంలో ఆర్జీవీ విచారణకు హాజరు కావాల్సి ఉండగా, ఆయన గైర్హాజరయ్యారు. ఈ విషయంపై మద్దిపాడు పోలీసులకు వర్మ వాట్సప్ మెసేజ్ చేశారు. విచారణకు హాజరయ్యేందుకు తనకు 4 రోజుల సమయం కావాలని అందులో కోరినట్లు సమాచారం.
వారం రోజుల క్రితం (నవంబర్ 13న) ఎస్సై శివ రామయ్య ఆధ్వర్యంలోని పోలీసుల బృందం హైదరాబాద్లోని జూబ్లీహిల్స్లో రామ్ గోపాల్‌వర్మ ఇంటికి వెళ్లి ఆయనకు నోటీసులు ఇచ్చారు. ఈ క్రమంలో నోటీసులు అందుకున్న ఆర్జీవీ అరెస్టు నుంచి రక్షణ కల్పించాలంటూ ఏపీ హైకోర్టును ఆశ్రయించారు. మద్దిపాడు పోలీసులు నమోదు చేసిన కేసులు కొట్టి వేయాలని కోరారు. నవంబర్ 19న విచారణకు హాజరు కావాలంటూ మద్దిపాడు పోలీసులు నోటీసులు ఇచ్చారని వర్మ తరఫు న్యాయవాది కోర్టుకు తెలిపారు. విచారణకు హాజరయ్యేందుకు మరి కొంత సమయాన్ని ఇచ్చేలా పోలీసులను ఆదేశించాలని కోరారు.
గడువు పొడిగింపు కోసం అభ్యర్థన : ఈ సందర్భంగా వర్మ తరఫు న్యాయవాది అభ్యర్థనను న్యాయస్థానం తోసిపుచ్చింది. కేసు విషయంలో అరెస్ట్పై ఆందోళన ఉంటే బెయిల్ పిటిషన్ దాఖలు చేసుకోవాలని సూచించింది. విచారణకు గడువు పొడిగింపు కోసం పోలీసుల ముందు అభ్యర్థన చేసుకోవాలని, కోర్టులో కాదని స్పష్టం చేసింది. ఈ నేపథ్యంలో విచారణకు హాజరయ్యేందుకు 4 రోజుల సమయం కావాలని రామ్గోపాల్ వర్మ మద్దిపాడు పోలీసులకు వాట్సాప్ మెసెజ్ చేసినట్లు సమాచారం. మరోవైపు తెలుగు రైతు ఉపాధ్యక్షుడు నూతలపాటి రామారావు సైతం వర్మపై ఫిర్యాదు చేసి తగిన చర్యలు తీసుకోవాలని పోలీసులను కోరారు.
ఆ పోస్టులు పెట్టినందుకు రాంగోపాల్ వర్మకు నోటీసులు - విచారణకు హాజరు కావాలన్న పోలీసులు
రామ్గోపాల్ వర్మపై వరుసగా కేసులు నమోదు - కొంపముంచిన సోషల్ మీడియాలో పోస్టులు
