Police on Drugs in Telangana : నెల రోజుల నుంచి రాష్ట్రవ్యాప్తంగా మాదక ద్రవ్యాలపై స్పెషల్ ఆపరేషన్ చేపట్టిన ఎక్సైజ్ పోలీసులు, తాజాగా హైదరాబాద్లో 54 కేజీల గంజాయి సప్లై చేస్తున్న నిందితులను అరెస్ట్ చేశారు. నిందితుల నుంచి మాదక ద్రవ్యాలను స్వాధీనం చేసుకుని వారిని అదుపులోకి తీసుకున్నట్లు చెప్పారు. గంజాయి విలువ సుమారు రూ.10 లక్షల వరకు ఉంటుందని తెలిపారు. ఈ సందర్భంగా ఎక్సైజ్ ఎన్ఫోర్స్మెంట్ డైరెక్టర్ కమలాసన్ రెడ్డి మీడియాతో మాట్లాడారు.
ముఖ్యమంత్రి రేవంత్ రెడ్డి ఆదేశాలతో డ్రగ్స్ నియంత్రణకు ఎక్సైజ్ శాఖ తీవ్రంగా కృషి చేస్తోందని కమలాసన్ రెడ్డి తెలిపారు. గత కొన్ని రోజులుగా మాదకద్రవ్యాల నిరోధానికి స్పెషల్ ఆపరేషన్లు నిర్వహిస్తున్నామని, ప్రత్యేక ఆపరేషన్లో భాగంగా పెద్ద ఎత్తున గంజాయి స్వాధీనం చేసుకున్నట్లు చెప్పారు. ధూల్పేట్లో గతంలో నాటు సారా తయారయ్యేదని, దాన్ని పూర్తిగా నియంత్రించినట్లు వివరించారు. ధూల్పేట్లో నాటు సారా స్థానంలో గంజాయి హబ్గా మారిందని చెప్పారు.
ధూల్పేట్లో పట్టుబడిన 15 మంది నిందితులు : దీంతో కొద్దిరోజులుగా ధూల్పేట్లో ఎక్సైజ్ పోలీసులు, లా అండ్ ఆర్డర్ పోలీసులతో ప్రత్యేక సోదాలు నిర్వహిస్తున్నట్లు కమలాసన్ రెడ్డి తెలిపారు. ఇప్పటి వరకు ధూల్పేట్లో జరిపిన సోదాల్లో 15 మంది నేరస్థులను గుర్తించినట్లు చెప్పారు. జీహెచ్ఎంసీ పరిధిలో ఎక్కడ గంజాయి పట్టుబడినా దాని మూలాలు ధూల్పేట్లోనే బయట పడుతున్నట్లు గుర్తించామని చెప్పారు. మాదక ద్రవ్యాల నిరోధానికి ప్రత్యేకంగా 1000 మంది పోలీసులతో శిక్షణ ఇచ్చామని తెలిపారు.
పట్టుబడ్డ నిందితులకు శిక్షలు పడేవిధంగా కేసు విచారణ చేస్తున్నామని ఎక్సైజ్ ఎన్ఫోర్స్మెంట్ డైరెక్టర్ కమలాసన్ రెడ్డి పేర్కొన్నారు. ఆగస్టు 31లోపు ధూల్పేట్ను గంజాయి రహిత ప్రాంతంగా మార్చాలని లక్ష్యం పెట్టుకున్నట్లు చెప్పారు. కేవలం అక్కడే కాకుండా సమాంతరంగా మిగతా ప్రాంతాల్లో కూడా దృష్టి పెడుతున్నట్లు వివరించారు. మరోవైపు సోదాలలో భాగంగా పోలీసులు, నార్కోటిక్ బ్యూరో పోలీసుల సహకారం తీసుకుంటున్నామని తెలిపారు.
'ధూల్పేట్లో జరిపిన సోదాల్లో 15 మందిని పట్టుకున్నాం. ఎక్కడ గంజాయి పట్టుబడినా దాని మూలాలు ధూల్పేట్లోనే బయట పడుతున్నాయి. ఆగస్టు 31లోపు ధూల్పేట్ను గంజాయి రహిత ప్రాంతంగా మార్చాలని లక్ష్యం పెట్టుకున్నాం'- కమలాసన్ రెడ్డి, ఎక్సైజ్ ఎన్ఫోర్స్మెంట్ డైరెక్టర్
ఈ తండ్రీకొడుకులు డ్రగ్ స్మగ్లర్స్ - మధ్యప్రదేశ్ నుంచి హైదరాబాద్కు 'మత్తు' రవాణా
