ఈటీవీ పేరుతో ఫేక్‌ వీడియోల వ్యాప్తి - హైదరాబాద్‌ సైబర్‌ క్రైమ్ పోలీసులకు ఫిర్యాదు చేసిన యాజమాన్యం - etv complaints Hyderabad Cybercrime

ETV Complaints on Fake Videos : తెలుగు నేలపై నిఖార్సైన వార్తలకు నమ్మకమైన బ్రాండ్‌ ఈటీవీ. ఎన్నికల వేళ ఈటీవీ విశ్వసనీయతను అడ్డుపెట్టుకుని కొందరు ఫేక్‌ ఫెలోస్‌, తప్పుడు వీడియోలను సోషల్‌ మీడియాలో తిప్పుతున్నారు. ఈ దుష్ప్రచారానికి తెగించిన నకిలీ ముఠాలపై చర్యలు తీసుకోవాలని ఈటీవీ యాజమాన్యం, హైదరాబాద్‌ సైబర్‌ క్రైమ్ పోలీసులకు ఫిర్యాదు చేసింది.

ETV Complaints on Fake Videos : ఎన్ని ఛానళ్లు పుట్టుకొచ్చినా, తెలుగు వారు ఈటీవీ (ETV) తెరపై చూస్తే తప్ప వార్తల్ని నమ్మరు. ప్రేక్షకుల్లో అంతటి విశ్వసనీయత సంపాదించుకున్న సంస్థ ఈటీవీ. ఇప్పుడు కొందరు మాయగాళ్లు ఈటీవీ ఆంధ్రప్రదేశ్‌ పేరుతో ఫేక్‌ వీడియోలు సృష్టిస్తున్నారు. కీలకమైన ఎన్నికల సమయంలో తప్పుడు వార్తలను వ్యాప్తి చేస్తున్నారు. ఏపీలో మళ్లీ వైఎస్ఆర్ కాంగ్రెస్ అధికారంలోకి వస్తుందని ఇంటెలిజెన్స్‌ రిపోర్ట్‌ ఇచ్చిందంటూ, ఈటీవీ స్క్రీన్‌ను పోలిన ఒక వీడియోను సృష్టించి సామాజిక మాధ్యమాల్లో పోస్టు చేశారు.

ETV Complaints HYD Cyber crime : ఈటీవీతో పాటు ఏకంగా కేంద్ర నిఘా వ్యవస్థనూ బద్నాం చేసేందుకు బరి తెగించారు. తెలుగుదేశం సూపర్‌ సిక్స్‌ మేనిఫెస్టో రద్దు అని ఒకటి, చంద్రబాబు తీరుపై జనసేన ఆగ్రహం అంటూ మరొక వీడియోను ఈటీవీ ఏపీ లోగోతో పాటు, ఛానల్‌ తాజా సమాచారం ప్రసారం చేసే సమయంలో వాడే మ్యూజిక్‌తో సోషల్‌ మీడియాలో సర్క్యులేట్ చేస్తున్నారు. ఫేస్‌బుక్‌, ట్విటర్, వాట్సప్‌, ఇన్‌స్టాగ్రామ్‌ వంటి సామాజిక మాధ్యమాల్లో అప్‌లోడ్ చేశారు.

ఈటీవీ పేరుతో వ్యాప్తి చేస్తున్న ఫేక్‌ వీడియోలపై ఈటీవీ ఆంధ్రప్రదేశ్ యాజమాన్యం, హైదరాబాద్‌లోని సైబర్‌ క్రైమ్ (Cyber crime) పోలీసులకు ఫిర్యాదు చేసింది. తప్పుడు వార్తలు వ్యాపింపజేసిన వారి సోషల్‌ మీడియా ఖాతాల వివరాలు, ఐపీ అడ్రస్‌లు గుర్తించి ఆధారాలు అందజేసింది. ఛానల్‌ పేరును దుర్వినియోగం చేసిన వారిపై, కఠిన చర్యలు తీసుకోవాలని ఈటీవీ యాజమాన్యం పోలీసులను కోరింది.

ఫేక్​ గాళ్లపై పోలీసుల నజర్ : ఈటీవీ ఫిర్యాదు మేరకు ఫేక్‌ న్యూస్ ప్రచారం చేస్తున్న వాళ్లపై పోలీసులు దృష్టి సారించారు. ఈటీవీ అందజేసిన ఫేస్‌బుక్‌, ట్విటర్, వాట్సప్‌, ఇన్‌స్టాగ్రామ్ లింకులను, స్క్రీన్‌ షాట్లను, పోస్టు చేసిన వారి ప్రొఫైళ్లపై పోలీస్ అధికారులు కన్నేశారు. వారు ఎక్కడ్నుంచి పోస్టు చేశారు? దానిని ఎవరు క్రియేట్ చేశారు? ఎవరు వ్యాప్తిలోకి తెచ్చారు? అనే దానిపై ఫోకస్​ పెట్టారు. దీనిపై వెంటనే చర్యలు ఉంటాయని తెలుస్తోంది. ఆ అకౌంట్స్‌ వివరాలపై సామాజిక మాధ్యమాలకు కూడా ఫిర్యాదులు పంపినట్టు తెలుస్తోంది.

CBN Reacts on Fake Videos : మరోవైపు ఈవీడియోలపై చంద్రబాబు నాయుడు(CBN) స్పందించారు. వైసీపీ సోషల్ మీడియా తప్పుడు వీడియోలతో గందరగోళం సృష్టిస్తోందని ఆయన ఆరోపించారు. ఈటీవీ విశ్వసనీయత దెబ్బతీసేలా, ఆ ఛానల్ పేరుతో ఫేక్ వీడియోలు చేస్తోందని మండిపడ్డారు. ఫేక్ ప్రచారం పట్ల అప్రమత్తంగా ఉండాలని, సమర్థంగా తిప్పికొట్టాలని టీడీపీ కార్యకర్తలకు చంద్రబాబు నాయుడు పిలుపునిచ్చారు.