గొంతెండుతోంది - తాగునీటి సమస్య తీర్చరా సారూ ! - Drinking Water Problem in Ongole

Drinking Water Problem in Ongole: వేసవి కాలం వచ్చిందంటే చాలు ఎక్కడ చూసినా తాగునీటి ఎద్దడి తీవ్రమవుతుంది. సుమారు మూడు లక్షల జనాభా కలిగిన ఉన్న ఒంగోలు పట్టణంలో నిత్యం తాగునీటి సమస్యలతో కాలనీ వాసులు అనేక అవస్థలు పడుతున్నారు. గత ప్రభుత్వంలో ఏర్పాటు చేసిన తాగునీటి పథకాలు వైఎస్సార్సీపీ సర్కారు అటకెక్కించడంతో తాగునీరు లేక జనాలు అల్లాడుతున్నారు. వారానికి ఒకసారి మాత్రమే మంటినీటి ట్యాంకర్లు వస్తున్నాయని కాలనీవాసులు ఆవేదన వ్యక్తం చేస్తున్నారు.

Drinking Water Problem in Ongole : నగర పాలక సంస్థ ఒంగోలులో తాగునీటి సమస్యకు పరిష్కారం లభించడం లేదు. తాగునీటి కోసం గత ప్రభుత్వం 120 కోట్ల రూపాయలతో ప్రారంభించిన అమృత పథకం (Amrut Scheme) పనులు మధ్యలోనే ఆగిపోయాయి. గత ప్రభుత్వ హయాంలో ప్రారంభించిన అదనపు తాగునీటి పథకాన్ని వైఎస్సార్సీపీ ప్రభుత్వం అటకెక్కించింది. అమృత పథకంలో 120 కోట్ల రూపాయలతో చేపట్టిన పనులు మధ్యలో ఆగిపోయాయి. ఇది పూర్తయితే గుండ్లకమ్మ నుంచి పట్టణ వాసులకు సమృద్దిగా తాగునీరు అందించే అవకాశం ఉండేది. కానీ ప్రస్తుత ప్రభుత్వం ఈ పథకం ఊసే ఎత్తడం లేదు.

పట్టణంలో 90 వేల గృహాలకు 3.10 లక్షల జనాభాకు నిత్యం తాగునీరు అందించాల్సి ఉంటుంది. నాగార్జున సాగర్‌ నుంచి వచ్చే కృష్ణా నది నీటిని పట్ణణంతో పాటు, చుట్టుప్రక్కల ఉన్న విలీన గ్రామాలకు కూడా అందివ్వాలి. రోజూ నీటిని సరఫరా చేసే సామర్థ్యం లేక మూడు, నాలుగు రోజులకు ఒక సారి ఇస్తున్నారు.

పట్టణంలో వివిధ ప్రాంతాల్లో ఉన్న 14 ఓవర్‌ హెడ్‌ ట్యాంకుల నుంచి ప్రస్తుతానికి నీటిని పంపిణీ చేస్తారు. మరో 10 ట్యాంకులు అవసరాలు ఉన్నా, ఆ దిశగా ఈ ఐదేళ్లు వైఎస్సార్సీపీ ప్రభుత్వం ప్రయత్నించడం లేదు. పేర్లమాన్యం ప్రాంతంలో దాదాపు ఎనిమిదేళ్ల క్రితం నిర్మించిన ట్యాంకుకు పైపు కనక్షన్లు ఇవ్వకపోవడం వల్ల వృథాగా పడి ఉంది. అదే విధంగా ముక్తినూతలపాడులో 7 లక్షల లీటర్ల సామర్థ్యం గల ఓవర్‌ హెడ్‌ ట్యాంకు నిర్మాణం చేపట్టినా, దానికి గుండ్లకమ్మ నుంచి ఇవ్వాల్సిన పైపు లైను ఏర్పాటు చేయలేదు.

"నీటి సమస్యతో చాలా ఇబ్బందులు పడుతున్నాము. తాగునీటి పంపులు ఉన్నాయి. కానీ అందులో రెండు బిందెలు కంటే ఎక్కువ రావు. అవి కూడా రెండు, మూడు రోజులకు ఒకసారి వస్తుంటాయి. 5, 6 రోజులకు ఒకసారి ట్యాంకర్ వస్తుంది. ఒక ఇంటికి రెండు డ్రమ్ములు నీటినే నింపుకొవాలి. అధికారులు స్పందించి మా నీటి సమస్యను తీర్చాలని కోరుతున్నాం."- మహిళలు

అమృత పథకం క్రింద పట్టణంలో నిర్మించిన ట్యాంకులు ఎక్కడికక్కడ నిలిచిపోయాయి. పలు చోట్ల పైపు లైన్లు వేయకుండా వదిలేసారు. తుప్పల్లో గొట్టాలు పడి ఉన్నాయి. తాగునీటి పథకాలు పెరగకపోవడం వల్ల పట్టణంతో పాటు, చుట్టూ ఉన్న కాలనీలు కేసవరాజుగుంట, శ్రీరామ నగర్‌, ఆంధ్ర కేసరి నగర్‌, రాజీవ్‌ కాలనీ, సమతా నగర్‌, కొప్పోలు, నేతాజీ కాలనీ, మథర్‌ తెరిసా కాలనీ తదితర ప్రాంతాల్లో నిత్యం తాగునీటికి యాతనే. కుళాయిల ద్వారా తాగునీటిని సరఫరా కానీ కొన్ని ప్రాంతాలకు ట్యాంకర్ల ద్వారా పంపిణీ చేస్తున్నారు. ట్యాంకర్లు కూడా సక్రమంగా రావడం లేదని వాపోతున్నారు.

సాగర్‌ నుంచి నీటిని మళ్లించడం, అమృత పథకంలో చేపట్టిన తాగునీటి పథకాన్ని పూర్తి చేయడం, వంటి కార్యక్రమాలు చేపడితే గానీ పట్టణ వాసులకు తాగునీటి ఇబ్బందులు తొలగవు.