కమీషన్​కు కక్కుర్తి పడి బ్యాంకు ఖాతా వివరాలు ఇచ్చేస్తున్నారా? - అయితే మీరు జైలుకే!

దళారుల మోసాలకు బలవుతున్న సామాన్య ప్రజలు - పోలీసుల దర్యాప్తులో బయటపడుతున్న వాస్తవాలు - అద్దె బ్యాంకు ఖాతాలతో అక్రమ లావాదేవీలు

Bank Accounts Misuse News : ఇతరుల బ్యాంకు ఖాతాలు, యూపీఐ ఐడీలను తీసుకుని నేరగాళ్లు తమ వ్యవహారాలను సాఫీగా కొనసాగిస్తున్నారు. పోలీసుల దర్యాప్తులో చివరకు అమాయకులే దొరుకుతున్నారు. విజయవాడకు చెందిన ఓ వస్త్ర వ్యాపారికి ఇటీవల గుజరాత్‌ పోలీసుల నుంచి ఓ నోటీసు వచ్చింది. మీ ఖాతా నుంచి అక్రమ లావాదేవీలు జరిగాయి విచారణ కోసం హాజరుకావాలని ఉంది. అది చూసిన ఆ వ్యాపారి ఆందోళనతో పోలీసులను సంప్రదించాడు.

తన బ్యాంకు ఖాతా స్టేట్‌మెంట్‌ చూసుకోగా రూ. కోట్లలో లావాదేవీలు జరిగినట్లు తెలిసి విస్తుపోయాడు. ఎలా జరిగిందని ఆలోచించగా వ్యాపార పని మీద నాలుగు నెలల కిందట దిల్లీ వెళ్లాడు. అక్కడ పరిచయం ఉన్న ఓ వ్యాపారి కలిశాడు. ఓ గేమింగ్‌ యాప్‌ సంస్థకు ఆర్థిక ఇబ్బందులు ఉన్నాయి. కొన్ని రోజులు నీ బ్యాంకు ఖాతా కావాలని వివరాలు ఇచ్చినట్లు గుర్తొచ్చింది. అలా ఖాతా వివరాలు వెళ్లాయని పోలీసులకు వివరించాడు.

మీ ఖాతాలో పెద్దమొత్తంలో లావాదేవీలు జరిగితే మీకు అంతే స్థాయిలో రుణ అర్హత పెరుగుతుంది. సిబిల్‌ స్కోర్‌ కూడా బాగా ఎగబాకుతుంది. వీటితోపాటు మీకు కమీషన్‌ కూడా వస్తుందని కేటుగాళ్లు పలువురు ఖాతాదారులకు ఆశపెట్టి బ్యాంకు ఖాతాలు తీసుకుని తమ ఆర్థిక లావాదేవీలకు వీరి ఖాతాలను ఉపయోగిస్తున్నారు.

డిజిటల్​ అరెస్టు కేసు : విజయవాడలో ఇటీవల నమోదైన డిజిటల్‌ అరెస్టు కేసులో ఫిర్యాదుదారు నుంచి బదిలీ అయిన బ్యాంకు ఖాతా వివరాలను పోలీసులు గుర్తించారు. పుణెలో నలుగురి పేర్లతో కరెంటు ఖాతా ఉన్నట్లు తేలింది. వారి కోసం గాలించి ఇద్దరిని అదుపులోకి తీసుకుని విజయవాడకు తీసుకువచ్చారు. వారిని విచారణ చేస్తే జరిగిన లావాదేవీలకు వీరికి సంబంధం లేదని తేలింది.

అసలు విషయం : వీరు మరో ఇద్దరు స్నేహితులతో కలిసి పుణె సమీపంలో ఓ హోటల్‌ పెట్టారు. కొన్నాళ్లు బాగానే నడిచాక ఆర్థిక వివాదాలు తలెత్తాయి. చివరకు హోటల్‌ను మూసేశారు. కానీ వ్యాపార అవసరాలకు తెరిచిన కరెంటు ఖాతా మూసివేయలేదు. ఈ నలుగురి వ్యాపారులలో ఒకరి భార్య చార్టర్​ అకౌంటెంట్​గా ఉద్యోగం చేస్తోంది. ఆమె ఈ ఖాతాను ఉపయోగిస్తోంది.

మధ్యవర్తులతోనే : ఇటీవల వీరిలో ఒకరికి మధ్యవర్తిగా ఓంకార్‌ అనే వ్యక్తిగా పరిచయం అయ్యాడు. రాజస్థాన్‌లో జైపూర్‌కు చెందిన ఈ మధ్యవర్తికి దుబాయిలోని వ్యాపారులతో సంబంధాలు ఉన్నాయి. మంచి కమీషన్‌ వస్తుందని మధ్యవర్తి ఆశ చూపడంతో కరెంటు ఖాతా వివరాలు ఇచ్చారు. దుబాయి నుంచి సైబర్‌ నేరగాళ్లు దీనిని నిర్వహిస్తున్నారు. తమ అక్రమ లావాదేవీల కోసం ఈ ఖాతా వినియోగిస్తున్నారు.

దేశవ్యాప్తంగా నమోదైన 190 కేసుల్లో జరిగిన లావాదేవీల్లో సొమ్ము మొత్తం ఇందులోకి మళ్లినట్లు తేలింది. చాలా రాష్ట్రాల పోలీసులు ఈ ఖాతాదారులపై కేసులు నమోదు చేశారు. కేవలం ఒక్క రోజులోనే దాదాపు రూ.5.50 కోట్ల మేర లావాదేవీలు జరిగినట్లు పోలీసులు గుర్తించారు.