'వరద వచ్చేలోపు పనులు పూర్తవ్వాలి లేకపోతే ముప్పు' - చకచకా మేడిగడ్డ మరమ్మతు పనులు - Medigadda Barrage Temporary Repairs

Medigadda Repair Works Update : మేడిగడ్డ ఆనకట్టకు జాతీయ డ్యాం సేఫ్టీ అథారిటీ నిపుణుల కమిటీ సూచించిన తదుపరి పరీక్షలను దిల్లీకి చెందిన సెంట్రల్ సాయిల్ అండ్ మెటీరియల్స్ రీసెర్చ్ స్టేషన్ నిర్వహించనుంది. సంస్థ ప్రతినిధులు రేపు బ్యారేజీని పరిశీలించనున్నారు. సీడబ్ల్యూపీఆర్ఎస్, ఎన్జీఆర్ఐ సంస్థలు మిగిలిన రెండు ఆనకట్టల పరీక్షలు చేపట్టనున్నాయి. మేడిగడ్డ ఆనకట్టకు సంబంధించిన పనులన్నీ సమాంతరంగా కొనసాగుతున్నాయి.

Medigadda Barrage Temporary Repairs : మేడిగడ్డ ఆనకట్టకు సంబంధించిన అన్ని పనులు వేగవంతంగా సాగుతున్నాయి. దెబ్బతిన్న సీసీ బ్లాకుల స్థానాల్లో కొత్తవాటిని అమర్చడం, షీట్ ఫైల్స్ ఏర్పాటు ప్రక్రియ కొనసాగుతోంది. ఆనకట్ట ఏడో బ్లాకులో దెబ్బతిన్న పియర్స్ ప్రాంతంలో ఉన్న గేట్ల తొలగింపు ప్రక్రియ కూడా సాగుతోంది. తెరవడానికి వీలు కాని నాలుగు గేట్లను కటింగ్ ద్వారా తొలగించాల్సి ఉంది. 20వ నంబర్ గేట్‌కు సంబంధించిన కటింగ్ ప్రక్రియ చేపట్టారు. ఒక్కో గేటు కటింగ్‌కు మూడు నుంచి నాలుగు రోజుల సమయం పడుతుందని అంచనా వేస్తున్నారు.

నాలుగు గేట్లను ఇదే తరహాలో తొలగించనున్నారు. అటు బ్యారేజ్ ముందు భాగంలో ఏర్పడిన రంధ్రాన్ని పూడ్చే పనులను కూడా ప్రారంభించారు. ముందుగా ఆ ప్రాంతంలో డ్రిల్లింగ్ చేస్తున్నారు. ఈ విధానంలో రంధ్రం పరిమాణంపై ఓ అంచనాకు వస్తారు. ఆ తర్వాత ఇసుకతో గ్రౌంటింగ్ చేస్తారు. రెండు రోజుల్లో గ్రౌటింగ్ ప్రారంభం అవుతుందని అంటున్నారు. వీటితో పాటు అవసరమైన ఇతర పనులను కూడా చేపడుతున్నారు.

మేడిగడ్డను పరిశీలించనున్న సీఎస్ఎంఆర్ఎస్ ప్రతినిధులు : వర్షాలు సమీపిస్తున్న తరుణంలో పనులు వేగవంతం చేయాలని, రాత్రి పగలు చేయాలని నిర్మాణ సంస్థ ఎల్అండ్​టీకి ఇంజినీర్లు స్పష్టం చేశారు. అటు ఎన్డీఎస్ఏ సిఫార్సులకు అనుగుణంగా తీసుకోవాల్సిన చర్యలపై ఈఎన్సీ జనరల్ నేతృత్వంలో ఏర్పాటైన ఇంజినీర్ల కమిటీ సోమవారం మేడిగడ్డతో పాటు అన్నారం ఆనకట్టలను పరిశీలించింది. చేయాల్సిన పనులు, పరీక్షలకు సంబంధించి వారికి సూచనలు చేశారు.

మేడిగడ్డ ఆనకట్టకు నిపుణుల కమిటీ సూచించిన తదుపరి పరీక్షలను దిల్లీకి చెందిన సెంట్రల్ సాయిల్ అండ్ మెటీరియల్స్ రీసెర్చ్ స్టేషన్ నిర్వహించనుంది. సీఎస్ఎంఆర్ఎస్ ప్రతినిధులు రేపు మేడిగడ్డ ఆనకట్టను పరిశీలించనున్నారు. అన్నారం ఆనకట్టకు పుణెలోని సెంట్రల్ వాటర్ అండ్ పవర్ రీసెర్చ్ స్టేషన్ సీడబ్ల్యూపీఆర్ఎస్ పరీక్షలు చేయనుంది. సుందిళ్ల ఆనకట్ట పరీక్షల పనులను నేషనల్ జియోఫిజికల్ రీసెర్చ్ ఇనిస్టిట్యూట్‌ ఎన్జీఆర్ఐకి అప్పగించే అవకాశం ఉంది. వర్షాలను దృష్టిలో పెట్టుకొని వీలైనంత త్వరగా పరీక్షలు పూర్తి చేయాలని భావిస్తున్నారు.