Corn Polymer Bags : ప్లాస్టిక్ ప్రస్తుతం భూగోళానికి పెను ప్రమాదంగా మారింది. దీన్ని నివారించడానికి ప్రభుత్వాలు ఎన్ని ప్రయోగాలు చేసినా అవి సత్ఫలితాలను ఇవ్వడం లేదు. రోజురోజుకూ దీని వాడకం పెరుగుతూనే ఉంది. ఇది భూతాపాన్ని పెంచడమే కాకుండా మానవాళికి, జంతు జాతికి తీవ్ర నష్టాన్ని మిగుల్చుతోంది. అయితే ప్లాస్టిక్ నుంచి పుడమిని రక్షించేందుకు ఎంతో మంది శాస్త్రవేత్తలు ఎన్నో ప్రయోగాలు చేస్తున్నారు. వాటికన్నా మనం చేయవలసిన తక్షణ కర్తవ్యం ఏంటంటే ప్లాస్టిక్ను ఎంత వేగంగా వాడటం మానేస్తామో అంత వేగంగా భూగోళాన్ని రక్షించిన వారిమవుతాం. ఇప్పుడు ప్లాస్టిక్కు ప్రత్యామ్నాయంగా కార్న్ పాలిమర్ వినియోగం వచ్చింది. ఇది సులభంలో భూమిలో కరిగే ప్లాస్టిక్ అన్నమాట.
ఇప్పుడు ఈ కార్న్ పాలిమర్ వినియోగం హైదరాబాద్ నగరమంతా క్రమంగా పెరుగుతోంది. ఈ కార్న్ పాలిమర్ను ఆసుపత్రులు, రెస్టారెంట్లు, వాణిజ్య సంస్థల్లో ఎక్కువగా వినియోగిస్తున్నారు. ఇప్పుడు ప్రతి నెలా సగటున ఒక్కో పరిశ్రమలో లక్ష కేజీల బ్యాగులు విక్రయం జరుగుతున్నాయని సమాచారం.
కానీ ఇక్కడే వచ్చిన పెద్ద చిక్కు ఏంటంటే ప్లాస్టిక్ బ్యాగుల కన్నా ఈ కార్న్ పాలిమర్ ఉత్పత్తి కూడా తక్కువగా ఉంటుంది. అలాగే నగరంలో రోజూ ఉత్పత్తి అయ్యే ప్లాస్టిక్ వ్యర్థాలతో పోల్చితే 10 నుంచి 15 శాతం మాత్రమే కార్న్ పాలిమర్ బ్యాగులు ఉండటం ఆందోళన కలిగిస్తున్నాయి. పాలిమర్ బ్యాగుల ఉత్పత్తి పెరిగితే ప్లాస్టిక్ కాలుష్యం తగ్గే అవకాశం పుష్కలంగా ఉందని నిపుణులు చెబుతున్నారు.
అసలు కార్న్ పాలిమర్ను ఎలా తయారు చేస్తారు :
- మొక్కజొన్న పిండితో కార్న్ పాలిమర్ను తయారు చేస్తారు.
- 180 రోజుల్లో భూమిలో కరిగిపోతుంది.
- కేంద్ర వాయుష్య నియంత్రణ మండలి పలు దశల్లో పరీక్షలు నిర్వహించింది.
- సర్టిఫై చేసి లైసెన్సు జారీ చేసిన తర్వాతే ఉత్పత్తి ప్రారంభం
- జీడిమెట్లలో ఇప్పటికే పదుల సంఖ్యలో బయోడిగ్రేడబుల్ ప్లాస్టిక్ పరిశ్రమలు ఏర్పాటు చేయగా విక్రయాలు క్రమంగా పెరుగుతున్నాయి.
- కాగితం, జ్యూట్, క్లాత్ బ్యాగుల కంటే కార్న్ పాలిమర్ సంచుల వినియోగమే మేలని నిపుణులు సూచిస్తున్నారు.
- కేంద్ర, రాష్ట్ర ప్రభుత్వాలు ఈ తరహా పరిశ్రమలను ప్రోత్సహించాలని పరిశ్రమల నిర్వాహకలు కోరుతున్నారు.
నిత్యం 700 టన్నుల వ్యర్థాలు : గ్రేటర్ పరిధిలో రోజూ సగటున 8 వేల మెట్రిక్ టన్నుల వ్యర్థాలు వెలువడుతున్నాయి. ఏటా 2,26,092 మెట్రిక్ టన్నుల వ్యర్థాలను రీసైక్లింగ్ చేస్తున్నా.. ప్లాస్టిక్ వ్యర్థాలకు రీసైక్లింగ్ వ్యవస్థ అనేది ఎక్కడా లేదు. ప్లాస్టిక్ కవర్స్ నిషేధం ఉన్నా కూరగాయల మార్కెట్లు, మాంసం, దుస్తులు, కిరాణా దుకాణాల్లో ప్లాస్టిక్ క్యారీ బ్యాగ్లను విరివిగా వాడుతున్నారు. ఇలా గ్రేటర్ పరిధిలోనే కోటి క్యారీ బ్యాగ్లు వినియోగిస్తున్నట్లు అంచనా. ఫలితంగా నిత్యం 700 మెట్రిక్ టన్నుల ప్లాస్టిక్ వ్యర్థాలు ఉత్పత్తి అవుతున్నాయన్న మాట.
