Telangana Formation Day Celebrations 2024 : తెలంగాణ రాష్ట్ర అవతరణ దశాబ్ది ఉత్సవాల ముగింపు వేడుకలను వైభవంగా నిర్వహించేందుకు ప్రభుత్వం అన్ని ఏర్పాట్లు చేస్తోంది. జూన్ 2న ఉదయం, సాయంత్రం ఉత్సవాలు జరగనున్నాయి. ఆ రోజు ఉదయం తొమ్మిదిన్నర గంటలకు గన్పార్కులో అమరవీరుల స్థూపం వద్ద ముఖ్యమంత్రి రేవంత్ రెడ్డి నివాళులు అర్పిస్తారు. ఉదయం 10 గంటలకు సికింద్రాబాద్ పరేడ్ మైదానంలో జరగనున్న కార్యక్రమానికి ముఖ్యమంత్రి హాజరై జెండా ఆవిష్కరిస్తారు. అనంతరం పోలీసు బలగాల పరేడ్, మార్చ్ ఫాస్ట్, వందన స్వీకార కార్యక్రమాలు ఉంటాయి.
Telangana Decade Celebrations Chief Guest : అదే వేదికపై 'జయ జయహే తెలంగాణ' రాష్ట్ర అధికార గీతాన్ని జాతికి అంకితం చేస్తారు. వేడుకల్లో సోనియా గాంధీ, సీఎం రేవంత్ రెడ్డి ప్రసంగిస్తారు. పోలీసు సిబ్బందికి, ఉత్తమ శకటాలకు అవార్డులను ప్రదానం చేసి ఫొటో సెషన్లో పాల్గొంటారు. సాయంత్రం ట్యాంక్ బండ్పై ఉత్సవాలు జరుగుతాయి. అక్కడ తెలంగాణ హస్తకళలు, ఉత్పత్తులు, ఫుడ్స్టాల్స్ ఏర్పాటు చేయనున్నారు.
Telangana Decade Celebrations Schedule : సాయంత్రం ఆరున్నరకు సీఎం రేవంత్ రెడ్డి ట్యాంక్బండ్కు చేరుకొని అక్కడి స్టాళ్లను సందర్శిస్తారు. సుమారు 700 మంది కళాకారులతో తెలంగాణ కళారూపాల కార్నివాల్ నిర్వహిస్తారు. అనంతరం 70 నిమిషాల పాటు సాంస్కృతిక, నృత్య ప్రదర్శనలు ఉంటాయి. ఆ తర్వాత సుమారు 5 వేల మంది జాతీయ జెండాలతో ట్యాంక్ బండ్పై భారీ ఫ్లాగ్ వాక్ నిర్వహిస్తారు.
ఫ్లాగ్ వాక్ జరుగుతుండగా పదమూడున్నర నిమిషాల 'జయ జయహే తెలంగాణ' పూర్తి నిడివి గీతాన్ని విడుదల చేస్తారు. కవి అందెశ్రీ, సంగీత దర్శకుడు ఎం.ఎం. కీరవాణిని సన్మానిస్తారు. రాత్రి 8 గంటల 50 నిమిషాల నుంచి 10 నిమిషాల పాటు హుస్సేన్ సాగరం మీదుగా ఆకాశంలో రంగులు విరజిమ్మేలా బాణాసంచా కార్యక్రమం నిర్వహిస్తారు.
Invitation to Former CM KCR : మరోవైపు మాజీ ముఖ్యమంత్రి కె. చంద్రశేఖర్ రావును జూన్ 2వ తేదీన నిర్వహించనున్న తెలంగాణ దశాబ్ది ఉత్సవాలకు సీఎం రేవంత్ రెడ్డి ఆహ్వానించారు. వ్యక్తిగతంగా లేఖ రాయడంతో పాటు వేడుకలకు ఆహ్వానాన్ని కూడా ఆయనకు పంపారు.
Telangana Decade Celebration 2023 : ఘనంగా ముగిసిన రాష్ట్ర దశాబ్ది వేడుకలు
