'ప్రతి మూడో శనివారం స్వచ్ఛాంధ్రప్రదేశ్‌ - రాష్ట్ర పునర్నిర్మాణంలో కలెక్టర్‌ల బాధ్యత కీలకం'

కలెక్టర్‌ల సదస్సు రెండో రోజు ముగింపులో సీఎం చంద్రబాబు దిశానిర్దేశం - రాష్ట్ర పునర్‌నిర్మాణంలో కలెక్టర్ల బాధ్యత ఎంతో ఉందన్న సీఎం

Collectors Conference: గడచిన ఆరు నెలల్లో విధ్వంసం నుంచి వికాసం వైపు ప్రయాణించామని ముఖ్యమంత్రి చంద్రబాబు స్పష్టం చేశారు. రాష్ట్ర పునర్‌ నిర్మాణంలో జిల్లా కలెక్టర్‌ల బాధ్యత చాలా ఉందన్నారు. కలెక్టర్‌ల సదస్సు రెండో రోజు ముగింపులో సీఎం వారికి దిశానిర్దేశం చేశారు. స్పీడ్ ఆఫ్ డూయింగ్ గవర్నెర్స్ ఉండాలని, ప్రజల్లో సానుకూల దృక్పథం కల్పించేలా పాలన సాగించాలని సూచించారు. ప్రజలు సంతోషంగా ఉండాలన్నదే అంతిమ లక్ష్యమని తేల్చి చెప్పారు.

రాష్ట్రం ప్రగతి దిశగా అడుగులు వేస్తోందని, గడిచిన ఆరు నెలల్లో ఆ దిశగా ప్రభుత్వం చర్యలు తీసుకొందని CM చంద్రబాబు అన్నారు. రాష్ట్రం పునర్నిర్మాణంలో కలెక్టర్ లు, ఉద్యోగుల పాత్ర కీలకమన్న ఆయన, ప్రజా సమస్యలపై తక్షణ స్పందన ఉండాలన్నారు.జిల్లా కలెక్టర్ ల సదస్సు రెండో రోజున ముగింపు ప్రసంగంలో సీఎం వివిధ విషయాలపై దిశానిర్దేశం చేశారు. సమస్యలతో ప్రజలు కార్యాలయాలకు వస్తున్నారంటే ఎక్కడో పరిపాలనలో లోపాలు ఉన్నాయని సంకేతంగా భావించాలని సూచించారు. సవాళ్లను అవకాశాలుగా మలచుకొని ముందుకు సాగాలన్నారు.

ఆర్థికేతర సమస్యలన్నీ పరిష్కారం కావాలి: ఆర్థికేతర సమస్యల్ని సత్వరం పరిష్కారం చేయాలని, ఒక వేళ పరిష్కారం కాకపోతే ఎందుకు అవ్వలేదో రికార్డులో పెట్టాలన్నారు. ప్రభుత్వానికి గుక్క తిప్పుకోలేని ఆర్థిక ఇబ్బందులు ఉన్నా ఆత్మస్థైర్యం ఉందని వ్యాఖ్యానించారు. సూపర్ సిక్స్​లో కొన్ని అమలు చేశామని ఇంకా కొన్ని అమలు చేయాల్సి ఉందన్నారు. విధుల్లో వినూత్నంగా ఆలోచన చేయాలని సూచించారు.

ప్రతి మూడో శనివారం స్వచ్ఛాంధ్ర కార్యక్రమం: అన్న క్యాంటీన్లు, పింఛన్లు, దీపం పథకాలు అమలు చేస్తున్నామన్న చంద్రబాబు, పనులు చేయడం ఒక ఎత్తు అయితే దానిని ప్రజల్లోకి తీసుకెళ్లడం మరింత ముఖ్యమని అన్నారు. అధికారులు, ప్రజా ప్రతినిధులు ప్రజా సేవకులే గాని పెత్తందారులు కాదని గుర్తుంచుకోవాలన్నారు. ప్రతి నెల మొదటి తేదీన ప్రజల సేవలో కార్యక్రమం పెట్టామని, మూడో శనివారం స్వచ్ఛాంధ్ర కార్యక్రమాన్ని నిర్వహిస్తామని తెలిపారు.

అందరికి అందుబాటులో ఉంటా: ప్రజల ప్రాణాలు, ఆస్తుల రక్షణకు మొదటి ప్రాధాన్యత ఇవ్వాలని, కలెక్టర్​లు, ఎస్పీలకు సీఎం ఆదేశాలు జారీ చేశారు. మహిళల పట్ల అసభ్యంగా ప్రవర్తిస్తే ఎవరినీ వదిలిపెట్టవద్దన్నారు. వ్యవసాయానికి ప్రాధాన్యత ఇవ్వాలని, రైతులకు ఏ ఒక్క సమస్య రానివ్వకుండా చూడాలని సీఎం కలెక్టర్లకు స్పష్టం చేశారు. ఇరిగేషన్ ప్రాజెక్టుల్నింటిని పూర్తి చేస్తామని వంశధార పోలవరానికి కనెక్టవిటీ ఇస్తే గేమ్ ఛేంజర్ అవుతుందన్నారు. సమస్యను పరిష్కరించేందుకు తాను ఎప్పుడూ ముందుంటానన్న ముఖ్యమంత్రి చంద్రబాబు, టీం లీడర్​గా అందరికి అందుబాటులో ఉంటానని కలెక్టర్లకు చెప్పారు.