Chandrababu on Mega Parent Teacher Meeting : దేశ చరిత్రలోనే మొదటిసారిగా రాష్ట్ర పాఠశాల విద్యాశాఖ ఒకేరోజు 44,000ల పైచిలుకు పాఠశాలల్లో మెగా పేరెంట్స్- టీచర్స్ సమావేశాలు నిర్వహించారు. బాపట్ల పురపాలక ఉన్నత పాఠశాలలో జరిగిన పేరెంట్స్- టీచర్స్ సమావేశానికి సీఎం చంద్రబాబు ముఖ్య అతిథిగా హాజరయ్యారు. ఈ సందర్భంగా కీలకోపన్యాసం చేశారు. ప్రభుత్వ పాఠశాలలో చదివే ప్రతి విద్యార్థికి ఉజ్వల భవిష్యత్త్ అందించేలా 20 ఏళ్ల ప్రణాళికను రూపొందించాలని చంద్రబాబు నిర్దేశించారు. బాపట్ల పురపాలక ఉన్నత పాఠశాలలో పదో తరగతి విద్యార్థులు, వారి తల్లిదండ్రులతో మంత్రి లోకేశ్‌తో కలిసి ఆయన ముఖాముఖి మాట్లాడారు. పిల్లలూ బాగున్నారా అని ఆప్యాయంగా పలకరించారు. సమావేశానికి తండ్రుల కన్నా తల్లులే ఎక్కువ మంది వచ్చారని నవ్వుతూ చెప్పారు. పదో తరగతి చదువుతున్న మీనాక్షి అనే విద్యార్థిని, ఆమె తండ్రితో ముఖ్యమంత్రి మాట్లాడారు.
ముఖ్యమంత్రి : ఏమ్మా నీ పేరేంటి? పాఠశాలకు ఆగస్టులో సరిగా రాలేదు. అక్టోబర్లో ఎందుకు హాజరు కాలేదు?
- విద్యార్థిని : సార్‌ నా పేరు మీనాక్షి. పదో తరగతి చదువుతున్నా. టైఫాయిడ్‌ రావటంతో హాజరు కాలేదు.
ముఖ్యమంత్రి : (విద్యార్థిని తండ్రిని ఉద్దేశించి) నీ పేరేంటి? ఎంత మంది పిల్లలు?
- తండ్రి : సార్‌ నా పేరు శివకిషోర్‌. లారీ డ్రైవర్‌గా పని చేస్తున్నాను. మాకు ఇద్దరు పిల్లలు. అబ్బాయి సురేష్, అమ్మాయి మీనాక్షి.
ముఖ్యమంత్రి : అబ్బాయి ఏం చేస్తున్నాడు?
- తండ్రి : మా అబ్బాయి ఐదో తరగతితో చదువు మానేశాడు. డ్రైవర్‌గా పని చేస్తున్నాడు.
ముఖ్యమంత్రి : మధ్యలో చదువు ఎందుకు మానేశాడు? కౌన్సెలింగ్‌ చేయలేదా? ఇప్పుడు వయస్సు ఎంత?
- తండ్రి : చెడు స్నేహాల వల్ల చదువు మధ్యలో ఆపేశాడు. చదువుకోమని ఎంత చెప్పినా మా మాట వినలేదు. ప్రస్తుతం 21 సంవత్సరాల వయస్సు. అమ్మాయిని బాగా చదివిస్తాను సార్‌.
ముఖ్యమంత్రి : అమ్మా భవిష్యత్లో ఏమవుతావు? వ్యవసాయంపై ఎందుకు ఆసక్తి చూపుతున్నావు?
- విద్యార్థిని : వ్యవసాయ విద్య చదివి వ్యవసాయాధికారిని అవుతాను. పురుగుమందుల అవశేషాలున్న ఆహారం తినడం వల్ల ఆరోగ్యం దెబ్బతింటోంది. సేంద్రియ సాగుతో పురుగుమందులు, రసాయన ఎరువులు లేకుండా పంటలను పండించి ప్రజలకు నాణ్యమైన ఆహారం అందించాలని ఉంది.
ముఖ్యమంత్రి : ఏపీలో జీరో బడ్జెట్‌ ప్రకృతి వ్యవసాయ ప్రయోగం జరుగుతోంది. పంటల సాగులో డ్రోన్ల ద్వారా జీవ రసాయన మందులు పిచికారీ చేస్తున్నారు. ఆ పరిజ్ఞానం తెలుసుకుంటే నీకు ఉపయోగపడుతుంది.
- విద్యార్థిని : ప్రకృతి వ్యవసాయం, డ్రోన్‌ సాంకేతికత గురించి తెలుసుకుని పంటలు సాగు చేస్తాను.
ముఖ్యమంత్రి : మీ అమ్మాయి పరీక్షల మార్కులు, హాజరు వివరాలను వాట్సప్‌ ద్వారా పంపిస్తాం. పిల్లల భవిష్యత్ కోసం సమావేశానికి రావాలి. తల్లిదండ్రుల సమావేశం నిర్వహణ ఎలా ఉంది?
- తండ్రి : ఉపాధ్యాయులు తల్లిదండ్రులతో సమావేశాన్ని ఏర్పాటు చేయడం, మా పిల్లల చదువులో లోటుపాట్లను తెలియజేయటం బాగుంది సార్‌.
ముఖ్యమంత్రి : మీనాక్షీ మీ నాన్న డ్రైవర్‌గా పని చేస్తున్నారు. బాగా చదివితే మంచి స్థాయికి ఎదుగుతావు. నీ భవిష్యత్ బాగుంటుంది. అమ్మానాన్నలను కూడా బాగా చూసుకోగలవు.
హీరోలు సినిమాల్లో కాదు ఉపాధ్యాయుల్లోనూ ఉన్నారు: పవన్‌ కల్యాణ్
డ్రగ్స్‌ వ్యతిరేక పోరాటం పాఠశాలల నుంచే ప్రారంభం కావాలి : సీఎం చంద్రబాబు
