మందుబాబులు చిందేసే వార్త - భారీగా తగ్గిన మద్యం ధరలు

ఏపీలో తగ్గిన మద్యం ధరలు - ఆ మూడు బ్రాండ్లపై ధరలు తగ్గింపు - తగ్గింపు ధరలకు వెంటనే అమల్లోకి తీసుకొచ్చిన ఎక్సైజ్​ శాఖ

Decrease Liquor Prices : మందుబాబులకు గుడ్​న్యూస్​.. కొన్ని మద్యం బాటిల్స్​ క్వార్టర్​పై ఏకంగా రూ.50 తగ్గుతుంది. అదే ఫుల్​ బాటిల్​ అయితే చూసుకొండి ఇక ఏకంగా రూ.100 దాటే ఉంటుంది. దీంతో మద్యం ప్రియులు తెగ సంతోషపడిపోతున్నారు. కానీ ఇది తెలంగాణ రాష్ట్రంలో కాదు.. పక్క రాష్ట్రం ఆంధ్రప్రదేశ్​లో. జగన్​ రెడ్డి సర్కారు ఉన్నప్పుడు మద్యం ధరలను విచ్చల విడిగా పెంచేశారు. కానీ కూటమి ప్రభుత్వం అధికారంలోకి వచ్చిన తర్వాత కొత్త మద్యం పాలసీని తీసుకొచ్చి.. బ్రాండెడ్​ మద్యాన్ని ఏపీలోకి తీసుకొచ్చారు. దీంతో నకిలీ మద్యం(జే బ్రాండ్స్​) పోయి మళ్లీ పాత మద్యం రావడంతో మందుబాబులు సందడి చేసుకుంటున్నారు.

వివరాల్లోకి వెళితే, ఏపీలో మూడు ప్రముఖ మద్యం కంపెనీలు మద్యం ధరలను తగ్గించేందుకు ముందుకు వచ్చాయి. దీంతో అక్కడి ఎక్సైజ్​ శాఖ ఆమోదం తెలిపి వెంటనే ఆ ధరలను అమల్లోకి వస్తున్నట్లు ఉత్తర్వులు జారీ చేసింది. ప్రస్తుతం మార్కెట్​లో ఉన్న మద్యం బాటిళ్లను అదే ధరకు అమ్మి.. ఆ తర్వాత కొత్తగా వచ్చిన మద్యం సీసాలను తగ్గించిన ధరలతో అమ్మనున్నారు. అయితే గత ఐదేళ్లుగా ప్రముఖ బ్రాండ్ల విక్రయాలకు అవకాశం లేదు.. కానీ తాజాగా అన్ని బ్రాండ్లను విక్రయించుకోవడానికి అనుమతిస్తూ ఏపీ రాష్ట్ర ప్రభుత్వం నిర్ణయం తీసుకున్న విషయం తెలిసిందే. ఈ మద్యం బాటిళ్ల ధరలు దాదాపు రూ.50 వరకు తగ్గాయి.

ధరలు తగ్గిన మద్యం బాటిళ్లు :

• రాయల్​ చాలెంజ్​ సెలెక్ట్​ గోల్డ్​ విస్కీ క్వార్టర్​ ధర రూ.230 నుంచి రూ.210 వరకు తగ్గింది. అదే ఫుల్​ బాటిల్​ అయితే రూ.920 నుంచి రూ.840కి తగ్గింది.
• మాన్షన్​ హౌస్​(MH) క్వార్టర్​ ధర 2019లో రూ.110గా ఉంటే వైఎస్సార్​సీపీ ప్రభుత్వం వచ్చిన తర్వాత రూ.300 చేసింది.. దీనిపై విమర్శలు రావడంతో రూ.220కి తగ్గించారు. ఇప్పుడు మళ్లీ ప్రభుత్వం మారడంతో క్వార్టర్​ ధర రూ.220 నుంచి రూ.190కి తగ్గింది. హాఫ్​ ఫుల్​ బాటిల్​ అయితే రూ.440 నుంచి రూ.380కి తగ్గగా, ఫుల్​ బాటిల్​ ధర రూ.870 నుంచి రూ.760కి భారీగా తగ్గింది.
• యాంటీక్విటీ విస్కీ ఫుల్​ బాటిల్​ ధర రూ.1,600 నుంచి రూ.1,400కు తగ్గి మందుబాబుకి రూ.200లకు మిగులుతోంది.

మద్యం ధరలకు ఓ కమిటీ : కూటమి ప్రభుత్వం వచ్చిన తర్వాత మద్యం ధరలపై తీవ్ర స్థాయిలో విమర్శలు రావడంతో ఓ కమిటిని నియమించింది. త్వరలో ఈ కమిటీ అన్ని బ్రాండ్ల కంపెనీలతో ధరలను తగ్గించాలని చర్చలు జరపనుంది. అందుకు అనుగుణంగా కొత్త ధరలు అమల్లోకి వస్తున్నాయి. కానీ కొన్ని ప్రముఖ కంపెనీలు కమిటీ నిర్ణయించక ముందే ధరలను తగ్గిస్తున్నాయి. మరో రెండు ప్రముఖ కంపెనీలు సైతం ధరలను తగ్గించనున్నాయి.