Telangana Activists Atmiya Sammelan in Minister Ponnam Residency : తెలంగాణ రాష్ట్రం కోసం పార్లమెంటులో పోరాడిన ఎంపీలు అంతా ఇవాళ హైదరాబాద్‌ మంత్రి పొన్నం ప్రభాకర్ నివాసంలో కలుసుకున్నారు. తెలంగాణ రాష్ట్రం ఏర్పడి పదేండ్లు పూర్తయిన సందర్భంగా అందరూ కలసి ఆత్మీయ సమ్మేళనం నిర్వహించారు. అందుబాటులో ఉన్న నాయకులు అంతా ఈ కార్యక్రమంలో పాల్గొన్నారు.
ఈ సమావేశంలో మాజీ ఎంపీలు ప్రస్తుత శాసనమండలి చైర్మన్ గుత్తా సుఖేందర్ రెడ్డి, ఎమ్మెల్యేలు వివేక్ వెంకట్ స్వామి, కోమటి రెడ్డి రాజగోపాల్ రెడ్డి, ఫైనాన్స్ కార్పొరేషన్ ఛైర్మన్ రాజయ్య, మాజీ ఎంపీ మధుయాష్కీ గౌడ్, అంజన్ కుమార్ యాదవ్, సురేశ్ షెట్కర్ తదితరులు పాల్గొన్నారు. బలరామ్‌ నాయక్‌, సర్వేసత్యనారాయణ, విజయశాంతి, కె. కేశవ్‌రావు తదితరులు అందుబాటులో లేకపోవడంతో ఈ ఆత్మీయ సమ్మేళనంలో పాల్గొనలేదని తెలిసింది.
Minister Ponnam Telangana Activists Meet : ఈ కార్యక్రమంలో కాంగ్రెస్ రాష్ట్ర వ్యవహారాల ఇంఛార్జి దీపాదాస్‌ మున్షీ కూడా పాల్గొన్నారు. ఈ సమావేశంలో ఉద్యమ సమయంలో పార్లమెంటులో ఏవిధంగా పోరాటం సాగించారన్న విషయాలపై స్మరించుకున్నారు. అప్పట్లో సమైఖ్య ఎంపీలు నుంచి ఏవిధంగా దూరంగా ఉండాల్సి వచ్చింది.
తెలంగాణ ఉద్యమాన్ని బలోపేతం చేసేందుకు తామంతా ఏమి చేశాం. అక్కడ చోటు చేసుకున్న అనేక పరిణామాలను ఇవాళ్టి కలయికలో గుర్తు చేసుకోవడం, అభిప్రాయాలను పంచుకోవడం లాంటివి జరిగినట్లు సమాచారం. ఆ తరువాత పొన్నం ప్రభాకర్ నివాసంలోనే నాయకులు అంతా మధ్యాహ్నం భోజనం చేశారు.
Minister Ponnam on State Formation : తెలంగాణ రాష్ట్రంలో ఏర్పడిన కాంగ్రెస్ ప్రభుత్వం ఉద్యమకారులకు ఇచ్చిన హామీలను కచ్చితంగా అమలు చేసి తీరుతుందని బీసీ సంక్షేమ శాఖ మంత్రి పొన్నం ప్రభాకర్ వెల్లడించారు. తెలంగాణ ఆవిర్భావం జరిగి 10 సంవత్సరాలు పూర్తి చేసుకొని 11వ సంవత్సరంలోకి అడుగుపెడుతున్న శుభ సందర్భంగా తెలంగాణ ఉద్యమకారులకు ఆయన వందనాలు తెలిపారు.
తెలంగాణ అమరవీరులకు జోహార్లు అర్పిస్తూ 12వ ఆవిర్భావ దినోత్సవంలోపు కాంగ్రెస్ ప్రభుత్వం చెప్పిన విధంగా అమరవీరుల కుటుంబాలకు రూ.25 వేల పెన్షన్, తెలంగాణ ఉద్యమకారులకు 250 గజాల స్థలం, మేనిఫెస్టోలో చెప్పినట్లు వారిని గౌరవించుకుంటామని వివరించారు. తెలంగాణ ఉద్యమకారుల స్ఫూర్తితో తెలంగాణ ఏర్పడిందన్న భావాన్ని ఎక్కడా వదిలిపెట్టకుండా ముందుకు తీసుకెళ్లతామన్నారు. ఆ ఆత్మగౌరవం దెబ్బతినకుండా, ప్రజలకు ఇబ్బంది లేకుండా భవిష్యత్ పరిపాలన కొనసాగిస్తామన్నారు. ఈమేరకు మరోసారి తెలంగాణ ప్రజలందరికీ రాష్ట్ర ఆవిర్భావ దినోత్సవ శుభాకాంక్షలు తెలియచేశారు.
