Yashasvi Jaiswal Emotional Video: భారత్- ఇంగ్లాండ్ రెండో టెస్టులో తొలి రోజు టీమ్ఇండియా యంగ్ బ్యాటర్ యశస్వి జైశ్వాల్ పూర్తి ఆధిపత్యం చలాయించాడు. స్వదేశంలో టెస్టుల్లో తొలి అంతర్జాతీయ సెంచరీ సాధించాడు. విశాఖపట్టణం పిచ్పై పరుగులు చేయడానికి టీమ్ఇండియా బ్యాటర్లు కష్టపడుతుంటే, జైశ్వాల్ మాత్రం క్రీజులో ఈజీగా స్కోర్ చేశాడు. తొలి రోజు 257 బంతులు ఎదుర్కొన్న యంగ్ బ్యాటర్ 179 పరుగులు చేశాడు. అందులో 17 ఫోర్లు, 5 సిక్స్లు ఉన్నాయి. దీంతో మ్యాచ్లో తొలి రోజు హీరోగా నిలిచాడు. అయితే జైశ్వాల్ వీడియో ఒకటి ప్రస్తుతం సోషల్ మీడియాలో వైరల్గా మారింది. జైశ్వాల్ ఎంతో ఎమోషనల్గా మాట్లాడుతూ లైఫ్లో తను పడిన ఇబ్బందుల గురించి వీడియోలో చెప్పాడు.
'నేను కెరీర్ ప్రారంభంలో ఎన్నో ఇబ్బందులు ఎదుర్కొన్నా. ఓ సమయంలో ఒంటరిగా ఫీలయ్యా. ఎన్నో ప్రయత్నాల తర్వాత ఓ లోకల్ మ్యాచ్లో ఆడే ఛాన్స్ వచ్చింది. అందులో మంచి పెర్ఫార్మెన్స్ ఇస్తే రూ.200, రూ.300 వచ్చేవి. ఒక్కోసారి బ్యాట్ కూడా లేదు. వేరే వాళ్ల కిట్ తీసుకుని ఆడాల్సి వచ్చేది. ఏదైనా సాధించాలని మైండ్లో ఫిక్సైతే అస్సలు వదులొద్దు. ఎలాంటి పరిస్థితుల్లోనైనా దానికోసం ప్రయత్నించాలి. ఫలితం గురించి ఆలోచించకూడదు. అది మన చేతుల్లో లేదు. ప్రజెంట్ గురించే ఆలోచించాలి' అని జైశ్వాల్ తన లైఫ్లో ఎదుర్కొన్న విషయాల గురించి చెప్పాడు. అయితే ఇది పాత వీడియో. జైశ్వాల్ తాజా ఇన్నింగ్స్తో ఈ వీడియో ఇప్పుడు వైరల్ అవుతోంది.
రేపు కూడా ఇలాగే ఆడాలి: జైశ్వాల్ ఇన్నింగ్స్పై పలువురు మాజీలు ప్రశంసలు కురిపిస్తున్నారు. ఈ నేపథ్యంలో మాజీ ప్లేయర్ మహ్మద్ కైఫ్ జైశ్వాల్ ఆటను ప్రసంశించాడు. 'టాస్ గెలిచి బ్యాటింగ్ ఎంచుకున్న టీమ్ఇండియాలో బ్యాటర్లు క్రీజులో సెట్ అవ్వగానే ఔట్ అయ్యారు. గిల్, అయ్యర్ 20-30 పరుగులు చేసినా భారీ ఇన్నింగ్స్ ఆడడంలో విఫలమయ్యారు. కానీ, జైశ్వాల్ అద్భుతంగా ఆడాడు. అతడు వైట్ అండ్ రెబ్ బాల్ క్రికెట్లో బాగా ఆడాడు. స్పిన్, పేస్ బౌలింగ్ను సమర్దంగా ఎదుర్కొంటున్నాడు. అతడు రాజస్థాన్ (ఐపీఎల్)లో ఉన్నప్పుడు కూడా సపోర్ట్ చేశా. అతడు నాగ్పుర్లో సుదీర్ఘంగా ప్రాక్టీస్ చేస్తున్నాడు. దాని ఫలితమే ఇవాళ్టి ఇన్నింగ్స్. రేపు కూడా ఇలాగే ఆడాలని కోరుకుంటున్నా' అని కైఫ్ అన్నాడు.
