Ind vs Sa Final 2024: 2024 టీ20 వరల్డ్కప్ తుది సమరానికి సమయం ఆసన్నమైంది. మరి కొన్ని నిమిషాల్లో టైటిల్ ఫైట్ ప్రారంభం కానుంది. బర్బడోస్ వేదికగా భారత్- సౌతాఫ్రికా జట్లు టీ20 వరల్డ్కప్ ట్రోఫీ కోసం తలపడనున్నాయి. ఈ నేపథ్యంలో టీమ్ఇండియాకు మద్దతుగా నిలిచేందుకు అభిమానులు పెద్ద సంఖ్యలో బర్బడోస్ స్టేడియం వద్దకు చేరుకుంటున్నారు. పెద్ద సంఖ్యలో టీమ్ఇండియా ఫ్యాన్స్ మైదానం వద్దకు చేరుకోవడం వల్ల బర్బడోస్ ప్రాంతం కోలాహలంగా మారింది.
టీమ్ఇండియా జెర్సీలు ధరించి, భారత జాతీయ పతాకంతో స్టేడియం వద్ద సందడి చేస్తున్నారు. ప్లకార్డులు, ప్లేయర్ల ఫొటోలు పట్టుకొని 'జీతేగా బై జీతేగా ఇండియా జీతేగా', 'భారత్ మాతా జీ కై' అంటూ పెద్ద ఎత్తున నినాదాలు చేశారు. భారత్ ఈసారి కచ్చితంగా వరల్డ్కప్ టైటిల్ గెలుస్తుందని ధీమా వ్యక్తం చేస్తున్నారు. ఆటకు వర్షం అంతరాయం కలిగించవద్దని కోరుకుంటున్నారు. క్రికెట్ దిగ్గజం సచిన్ తెందూల్కర్ డైహార్డ్ ఫ్యాన్ సుధీర్ కూడా బర్బడోస్కు చేరుకున్నారు. భారత్ 2007నాటి విజయాన్ని ఈరోజు రిపీట్ చేస్తుందని అశించారు.
ఫైనల్‌లో భారత్ గెలిస్తే రోహిత్ శర్మ నెలకొల్పే రికార్డులు
- ఈ మ్యాచ్‌లో భారత్ గెలిస్తే కెప్టెన్ రోహిత్ శర్మ పలు రికార్డులు తన ఖాతాలో వేసుకుంటాడు.
- అంతర్జాతీయ టీ20ల్లో రోహిత్ ఇప్పటివరకు 61 మ్యాచ్‌లకు సారథ్యం వహించాడు. ఇందులో భారత్ 49 మ్యాచ్‌ల్లో గెలిచింది.
- ఈ మ్యాచ్‌లో భారత్ గెలిస్తే 50 విజయాలు సాధించిన తొలి కెప్టెన్‌గా రోహిత్ రికార్డుల్లోకెక్కుతాడు.
- అంతేకాకుండా ఓటమి అనేదే లేకుండా (100 శాతం విజయాలు) టీ20 ప్రపంచ కప్ సాధించిన తొలి కెప్టెన్‌గానూ రికార్డు సృష్టిస్తాడు.
- రెండుసార్లు టీ20 ప్రపంచ కప్ అందుకున్న తొలి భారత ఆటగాడిగానూ హిట్‌మ్యాన్‌ నిలుస్తాడు. 2007లో భారత్ టీ20 ప్రపంచ కప్ సాధించిన జట్టులో రోహిత్ సభ్యుడిగా ఉన్నాడు.
