Srikar Bharat Century : ఇంగ్లాండ్తో జరగనున్న టెస్టు సిరీస్కు ముందు తుది జట్టులో స్థానం సంపాదించేందుకు పలువురు స్టార్స్ ప్రయత్నిస్తున్నారు. ఇందులో భాగంగా తాజాగా టీమ్ఇండియా వికెట్‌ కీపర్‌ బ్యాటర్‌ శ్రీకర్ భరత్ అహ్మదాబాద్ వేదికగా ఇంగ్లాండ్ లయన్స్తో జరిగిన తొలి అనధికారిక టెస్ట్‌లో అద్భుతమైన సెంచరీతో చెలరేగిపోయాడు. ఓ ప్రాక్టీస్‌ మ్యాచ్, మూడు అనధికారిక టెస్ట్‌ మ్యాచ్‌ల కోసం ఇంగ్లాండ్ లయన్స్ జట్టు ఇండియా టూర్లో ఉన్న సంగతి తెలిసిందే. ఈ క్రమంలో జరిగిన మ్యాచ్‌లోని సెకెండ్‌ ఇన్నింగ్స్‌లో ఆజేయ శతకాన్ని తన ఖాతాలో వేసుకున్నాడు.ఏడో స్ధానంలో బ్యాటింగ్‌కు దిగిన భరత్, 165 బంతుల్లో 15 ఫోర్లతో 116 పరుగులతో చెలరేగిపోయాడు. అయితే ఈ మ్యాచ్ డ్రాగా ముగిసింది.
ఇంగ్లాండ్ లయన్స్ తమ తొలి ఇన్నింగ్స్‌ను 553/8 పరుగుల వద్ద డిక్లేర్‌ చేసింది. ఆ తర్వాత భారత్‌-ఏ జట్టు తమ తొలి ఇన్నింగ్స్‌లో 227 పరుగులకు స్కోర్ చేసి ఆలౌటైంది. ఇక భారత బ్యాటర్లలో రజిత్‌ పాటిదార్‌(151) మంచి స్కోర్ సాధించాడు. అయితే రెండో ఇన్నింగ్స్‌లో మాత్రం భారత్‌-ఎ జట్టు పుంజుకుంది. అలా మ్యాచ్ డ్రాగా ముగిసే సమయానికి సెకెండ్‌ ఇన్నింగ్స్‌లో 5 వికెట్ల నష్టానికి 426 పరుగులు చేసింది. ఇక టీమ్ఇండియా సెకెండ్‌ ఇన్నింగ్స్‌లో కేఎస్ భరత్‌తో పాటు సాయిసుదర్శన్‌(97), మనవ్‌ సుతార్‌(89) సత్తా చాటారు.
మరోవైపు ఇంగ్లాండ్తో జరగనున్న సిరీస్కు సంబంధించిన తుది జట్టును ఇదివరకే మేనేజ్మెంట్ ప్రకటించింది. ఇందులో తొలి రెండు టెస్టుల సిరీస్‌లో స్పెషలిస్టు వికెట్‌ కీపర్‌ కోటాలో శ్రీకర్ భరత్ చోటు దక్కించుకున్నాడు. ఇక అతడితో పాటు యంగ్ వికెట్‌ కీపర్‌ ధృవ్ జురల్‌కు కూడా జట్టులో స్థానం లభించింది. అయితే సౌతాఫ్రికాతో టెస్టు సిరీస్కు వికెట్‌ కీపర్‌గా వ్యవహరించిన కేఎల్‌ రాహుల్‌ ఈ సిరీస్‌లో కేవలం స్పెషలిస్టు బ్యాటర్‌గానే ఆడనున్నట్లు సమాచారం. ఈ క్రమంలో అనాధికారిక టెస్టులో సెంచరీతో సెన్సేషన్ క్రియేట్ చేసిన శ్రీకర్ భరత్‌కు వికెట్‌ కీపర్‌గా తుది జట్టులో చోటు దక్కడం ఖాయమని క్రికెట్ క్రిటిక్స్ అభిప్రాయపడుతున్నారు.
