రంజీ సంబరానికి రంగం సిద్ధం- ఈసారి కొంచెం కొత్తగా!

Ranji Trophy 2024 25 : రంజీ ట్రోఫీ 2024- 25 సీజన్​కు రంగం సిద్ధమైంది. అక్టోబర్ 11న ఈ టోర్నీ ప్రారంభం కానుంది.

Ranji Trophy 2024 25 : రంజీ ట్రోఫీ 2024- 25 సీజన్​కు సమయం ఆసన్నమైంది. ఈ ప్రతిష్ఠాత్మకమైన డొమెస్టిక్ టోర్నీకి శుక్రవారం (అక్టోబర్ 11) రంజీ ట్రోఫీకి తెరలేవనుంది. తొలిరోజు హైదరాబాద్​ జట్టు గుజరాత్​తో తలపడనుంది. యంగ్ బ్యాటర్ తిలక్ వర్మ నేతృత్వంలో సత్తా చాటేందుకు హైదరాబాద్ సిద్ధమైంది. అటు తిలక్​ కూడా ఈ సీజన్​లో తనదైన మార్క్ వేయాలని భావిస్తున్నాడు. మరోవైపు ఆంధ్ర జట్టు విదర్భతో పోటీ పడనుంది. ఈ మ్యాచ్​ నాగ్​పుర్​ వేదికగా జరగనుంది. స్టార్ ప్లేయర్లు హనుమ విహారి, వికెట్ కీపర్ శ్రీకర్ భరత్ టీమ్ఇండియాలో రీ ఎంట్రీ కోసం కష్టపడనున్నారు.

కాస్త కొత్తగా: గత సీజన్లలో రంజీ టోర్నమెంట్‌ ఒకే దశలోనే జరిగేది. అయితే ఈ సారి రంజీ ట్రోఫీని రెండు దశల్లో నిర్వహించనున్నారు. అక్టోబర్ 11 నుంచి నవంబర్ 13 మధ్య తొలి దశ, ఫిబ్రవరి 26 నుంచి మార్చి 2 వరకు రెండో దశ జరగనుంది.

Mumbai 42nd Title: కాగా, 2024 రంజీ సీజన్​లో ముంబయి విజేతగా నిలిచింది. దీంతో 42వ సారి టైటిల్ దక్కించుకుంది. ఈ క్రమంలో ఇప్పటివరకు అత్యధిక (42)సార్లు రంజీ ట్రోఫీని కైవసం చేసుకున్న జట్టుగా ముంబయి రికార్డు కొట్టింది.

Can. Not. Wait! ⏳

The prestigious #RanjiTrophy starts tomorrow 🤗

Get ready for some high-voltage action as India's premier First-Class Tournament gets underway 🔥@IDFCFIRSTBank pic.twitter.com/JQIolj9wcY

— BCCI Domestic (@BCCIdomestic) October 10, 2024

బరిలోకి సూర్య
టీమ్ఇండియా టీ20 కెప్టెన్ సూర్యకుమార్ యాదవ్ కూడా ఈ రంజీలో ఆడనున్నట్లు తెలుస్తోంది. బంగ్లాదేశ్​తో సిరీస్ తర్వాత తాను రంజీకి అందుబాటులో ఉండనున్నట్లు ముంబయి క్రికెట్ అసోసియేషన్​కు సమాచారం ఇచ్చాడట. దీంతో అక్టోబర్ 18న ప్రారంభమయ్యే ముంబయి- మహారాష్ట్ర మ్యాచ్​లో సూర్య ఆడే ఛాన్స్ ఉన్నట్లు సమాచారం.

ఫార్మాట్ ఇదే?
రంజీ ట్రోఫీలో 38 జట్లు ఉన్నాయి. వీటిని ఐదు (ఎలైట్, ప్లేట్) గ్రూపులుగా విభజించారు. ఎలైట్ A, B, C, D. ఈ నాలుగు గ్రూపుల్లో ఒక్కోదానిలో ఎనిమిది జట్లు ఉంటాయి. ప్లేట్ గ్రూప్‌లో ఆరు జట్లు ఉంటాయి. ఈ క్రమంలో ఓ టీమ్‌ తమ గ్రూపులోని ప్రతి ఇతర జట్లతో ఆడుతుంది. ప్రతి గ్రూప్‌కి సొంత పాయింట్ల పట్టిక ఉంటుంది. ప్రతి ఎలైట్ గ్రూప్‌ నుంచి తొలి రెండు స్థానాల్లో నిలిచిన జట్లు నాకౌట్‌ స్టేజ్‌కి చేరుకొంటాయి. ఇందులోనే క్వార్టర్, సెమీ ఫైనల్స్ ఉంటాయి. ఈ స్టేజీలను దాటిన టీమ్‌లు తదుపరి దశకు వెళ్తాయి. ప్లేట్ గ్రూప్‌లో మొదటి రెండు జట్లు తర్వాత సీజన్‌లో ఎలైట్ గ్రూప్‌కి అర్హత సాధిస్తాయి. ఎలైట్ గ్రూపుల్లో చివర నిలిచిన రెండు జట్లను ప్లేట్ గ్రూప్‌లో చేరుస్తారు.