Pro Kabaddi 2024 Final: 2024 ప్రొ కబడ్డీ టైటిల్ను పుణెరి పల్టన్ పట్టేసింది. శుక్రవారం హైదరాబాద్ గచ్చిబౌలి ఇండోర్ స్టేడియంలో జరిగిన ఫైనల్ ఫైట్లో పుణెరి పల్టాన్- హరియాణా స్టీలర్స్‌ తలపడ్డాయి. ఈ మ్యాచ్లో పుణెరి 28-23 తేడాతో నెగ్గి పీకేఎల్ సీజన్ 10 ఛాంపియన్గా నిలిచింది. రైడింగ్‌లో పంకజ్‌ మోహితె (9), మోహిత్‌ గోయత్‌ (5), ట్యాక్లింగ్‌లో గౌరవ్‌ ఖత్రి (4), ఆల్‌రౌండ్‌ ప్రదర్శనతో కెప్టెన్‌ అస్లాం ముస్తాఫా (4) అదరగొట్టి, హరియాణాపై పైచేయి సాధించారు. ఫలితంగా పుణెరి తొలిసారి పీకేఎల్ ఛాంపియన్గా నిలిచింది.
అయితే హరియాణా జట్టు మ్యాచ్ను ఘనంగానే ఆరంభించింది. ప్రారంభంలోనే 3-0తో ఆధిక్యంలోకి దూసుకెళ్లింది. కానీ, మోహిత్‌ను పట్టేసి పాయింట్ల ఖాతా తెరిచిన హరియాణా జోరు ప్రదర్శించింది. తొలి 12 నిమిషాల్లో ఇరు జట్లు కలిపి 11 పాయింట్లు సాధించగా ఇందులో 8 ట్యాక్లింగ్‌లో వచ్చినవే కావడం విశేషం. డిఫెండర్‌ మహమ్మద్రెజాను రైడర్‌ శివమ్‌ ఔట్‌ చేయడం వల్ల హరియాణా 6-6 తో స్కోరు సమం చేసింది.
ఆ తర్వాత అసలు గేమ్ స్టార్ట్ అయ్యింది. ఒక్కో పాయింట్ కోసం ఇరుజట్లు నువ్వానేనా అన్నట్లు తలపడ్డాయి. రెండు జట్ల స్కోర్లు దగ్గరగా ఉండడం వల్ల, రిస్క్ చేయకుండా డూ ఆర్‌ డై రైడ్‌లో మాత్రమే పాయింట్ సాధించేందుకు ప్రయత్నించాయి. ఈ క్రమంలో రైడింగ్కు వెళ్లిన పుణెరి ప్లేయర్ పంకజ్‌ రైడింగ్కు వెళ్లి 4 పాయింట్లు సాధించాడు. అప్పటి నుంచి లీడ్ను కాపాడుకున్న పుణెరి 5 పాయింట్ల తేడాతో గెలుపొందింది. దీంతో హరియాణా రన్నరప్తో సరిపెట్టుకోవాల్సి వచ్చింది. హరియాణాలో శివమ్‌ (6) ఒక్కడే చెప్పుకోదగ్గ ప్రదర్శన చేశాడు.
పీకేఎల్లో పలు రికార్డులు
- విజేతగా నిలిచిన పుణెరి రూ.3కోట్ల నగదు బహుమతి అందుకుంది.
- రన్నరప్ హరియాణా రూ.1.8కోట్లు సొంతం చేసుకుంది.
- పీకేఎల్ టైటిల్ నెగ్గిన ఓడో జట్టుగా పుణెరి పల్టాన్ నిలిచింది.
- పట్నా పరైట్స్ అత్యధికంగా ((2016లో 3వ, 4వ సీజన్, 2017) మూడుసార్లు ఛాంపియన్గా నిలిచింది.
- జైపుర్‌ పింక్‌ పాంథర్స్‌ (2014, 2022) రెండు సార్లు టైటిల్ నెగ్గింది.
- యు ముంబా (2015), బెంగళూరు బుల్స్‌ (2018), బెంగాల్‌ వారియర్స్‌ (2019), దబంగ్ దిల్లీ (2021) ఒక్కోసారి టైటిల్ విజేతలుగా నిలిచాయి.
