ఒలింపిక్స్​లో మను బాకర్​ విజయాల వెనక రానా - Paris Olympics 2024

Paris Olympics 2024 Manu Bhaker : భారతదేశం గర్వించేలా ఒలింపిక్స్​లో రెండు పతకాలు సాధించి మను బాకర్ చరిత్ర సృష్టించింది. దీంతో మను ఇంట్లో పాటు ఆమె స్వగ్రామంలో సంబరాలు జరుగుతున్నాయి. అయితే మను విజయానికి కారణం రానా అని తెలిసింది. పూర్తి వివరాలు స్టోరీలో

Paris Olympics 2024 Manu Bhaker : ఒకే ఒలింపిక్స్‌లో రెండు పతకాలు సాధించి మను బాకర్ చరిత్ర సృష్టించడంతో హరియాణ సూరజ్‌కుండ్‌లోని మను బాకర్ ఇంట్లో సంబరాలు అంబరాన్నంటాయి. 10 మీటర్ల ఎయిర్ పిస్టల్ మిక్స్‌డ్ టీమ్ ఈవెంట్‌లో సరబ్‌జోత్‌తో కలిసి మనూ పతకం సాధించింది. ఈ విజయం అనంతరం మను బాకర్ ఇంటికి బంధువులు, శ్రయాభిలాషులు ఆమెకు శుభాకాంక్షలు చెబుతున్నారు.

అయితే ఒలింపిక్స్‌లో మను బాకర్ అద్భుత ప్రదర్శన వెనక ఓ వ్యక్తి ఉన్నారు! ఆయనే మను బాకర్‌ కోచ్‌ జస్పాల్‌ రానా. తన కోచ్‌ జస్పాల్‌ రాణాను చూస్తే తనకు ఎంతో ధైర్యం వస్తుందని, అందుకే ఫైనల్‌ జరిగేటప్పుడు ఆయన్ను తప్ప ఇంకెవర్నీ చూడొద్దని గట్టిగా నిర్ణయించుకున్నానని కాంస్య పతకం సాధించిన అనంతరం మను బాకర్‌ వ్యాఖ్యానించింది. జస్పాల్‌ తన తండ్రిలాంటి వారని భావోద్వేగానికి గురైంది.

రాణా రాకతో ఆత్మ విశ్వాసం - పారిస్‌లో తన కుమార్తె సాధించిన దాని వెనక కోచ్‌ జస్పాల్‌ రానా ఉన్నాడని మను బాకర్ తండ్రి రామ్ కిషన్ తెలిపారు. "రాణాతో జట్టు కట్టిన తర్వాత మను బాకర్ ఆత్మ విశ్వాసం రెట్టింపు అయింది. ఇప్పుడు మను పూర్తి ఆత్మ విశ్వాసంతో ఉంది. తను విజయం సాధించిన తర్వాత నేను చాలా సేపు మాట్లాడలేకపోయాను. ఇది భారత్‌కు దక్కిన పెద్ద విజయం. జస్పాల్ రాణా ఒక గొప్ప షూటర్. అతనితో కలిసి పని చేస్తున్నప్పటి నుంచి బాకర్​లో ఆత్మవిశ్వాసం పెరిగింది. మంచి ఫలితాలు వస్తున్నాయి. మను ప్రయత్నం, జస్పాల్ ఆశీర్వాదం. విజయానికి దోహదపడ్డాయి." అని రామ్ కిషన్ అన్నారు. "దేశానికి రెండు కాంస్య పతకాలు దక్కాయి. మను అంచనాలను అందుకుంది. సరబ్‌జోత్‌ లేకుండా రెండో కాంస్య పతకం దక్కేది కాదు. సరబ్‌జోత్‌ అసలు ఒత్తిడిలో ఉన్నట్లే కనిపించలేదు" అని మను బాకర్‌ తండ్రి రామ్‌ కిషన్‌ పేర్కొన్నారు.

Thank you @dubey_ips sir https://t.co/nWCyd1PhZt

— Manu Bhaker🇮🇳 (@realmanubhaker) July 30, 2024

నా ప్రార్థనలు ఫలించాయి - "నా కూతురు విజయం సాధించాలని నేను పూజలు చేస్తూనే ఉన్నాను. నా పూజలు ఫలించాయి. నా కుమార్తె రెండో పతకం గెలిచిందన్న వార్త తెలుసుకున్న తర్వాత నా గుండె ఆగినంత పనైంది. నేను ఈ మ్యాచ్‌ను చూడలేదు. కాని విజయం సాధించాలని ప్రార్థిస్తున్నాను. మా ఇరుగుపొరుగు వచ్చి మను మరో పతకం సాధించిందని చెప్తేనే ఇంట్లో టీవీ ఆన్‌ చేశాం. ఆ సంతోషవార్తతో నాకు గుండె ఆగినంత పనైంది. కాస్త నీరు ఇవ్వమని నా భర్తను అడిగాను" అని మను బాకర్ తల్లి సుమేధ తెలిపారు. అదే నా జీవితంలో టర్నింగ్‌ పాయింట్‌ - కోచ్‌ జస్పాల్‌ రాణాతో తనకున్న అనుబంధాన్ని మను బాకర్ గుర్తు చేసుకుంది. “2023లో ఒకరోజు కోచ్‌ నాతో మాట్లాడుతూ, జీవితంలో ఏం చేద్దామనుకుంటున్నావని అడిగారు. వెంటనే తెలియదని సమాధానం ఇచ్చాను. ఒకట్రెండు సంవత్సరాల్లో షూటింగ్‌ను వదిలేసి పై చదువుల కోసం విదేశాలకు వెళ్లొచ్చు అన్నాను. దానికి కోచ్‌ నుంచి వచ్చిన స్పందన ఎంతగానో మోటివేట్ చేసింది’’ అని మను వెల్లడించింది. ‘‘నువ్వు ప్రపంచస్థాయి బెస్ట్‌ షూటర్‌వని నమ్ముతున్నాను. ఇక తర్వాత నీ ఇష్టం. నిర్ణయం నీదే’’అని కోచ్‌ చెప్పిన మాటలు తనపై బలమైన ప్రభావం చూపాయని మను బాకర్ కాంస్యం గెలిచిన తర్వాత వెల్లడించింది. ’’మీరు నా స్థానంలో ఉంటే ఏం చేస్తారు?’’ అని నేను వెంటనే కోచ్‌ను అడిగాను. అప్పుడు కోచ్‌ చెప్పిన మాటలు నాలో మరింత కసిని పెంచాయి. ‘‘ఒలింపిక్స్ పతకమా, ఇంకోటా అని చూడకుండా, వెనక్కి తిరిగి చూడటం మానేసి, నా కల నెరవేరేవరకు నిర్విరామంగా శ్రమిస్తాను అని కోచ్‌ నాకు బదులిచ్చారు’’ అని మను చెప్పింది.లైవ్‌ క్వార్టర్​ ఫైనల్​కు అడుగు దూరంలో భారత హాకీ టీమ్​ - ఐర్లాండ్​పై విజయం - PARIS OLYMPICS 2024