MSK Prasad Interview ETV Bharat: 2024 ఐపీఎల్ కోసం బ్రాడ్కాస్టింగ్ ఛానెల్ స్టార్ స్పోర్ట్స్ ప్రమోషన్స్ ప్రారంభించింది. ఈ నేపథ్యంలో బుధవారం (ఫిబ్రవరి 7) హైదరాబాద్లోని ఓ కాలేజీలో ప్రమోషన్స్ నిర్వహించింది. ఈ ఈవెంట్కు బీసీసీఐ సెలక్షన్ కమిటీ మాజీ ఛైర్మన్ ఎంఎస్కే ప్రసాద్ (MSK Prasad), మాజీ ప్లేయర్ ఇర్ఫాన్ పఠాన్ హాజరయ్యారు. ఈ క్రమంలో ఎమ్ఎస్కే ప్రసాద్ ఈటీవీ భారత్తో మాట్లాడారు. రానున్న ఐపీఎల్ సీజన్లో సన్రైజర్స్ హైదరాబాద్ విజయావకాశాలతోపాటు మరికొన్ని ఇంట్రెస్టింగ్ విషయాలు ఈటీవీ భారత్తో షేర్ చేసుకున్నారు.
ఐపీఎల్ 2024లో సన్రైజర్స్ హైదరాబాద్ ఛాంపియన్గా నిలుస్తుందని ఎంఎస్కే ప్రసాద్ అన్నారు. హైదరాబాద్ జట్టుకు గతంలో రెండు టైటిళ్లు అందించిన కెప్టెన్లు ఆస్ట్రేలియాకే చెందినవాళ్లని గుర్తుచేశారు. 'వరల్డ్కప్ విన్నింగ్ కెప్టెన్ ప్యాట్ కమిన్స్ను సన్రైజర్స్ కొనుగోలు చేసింది. ఈ సీజన్లో ఎస్ఆర్హెచ్కు కమిన్సే నాయకత్వం వహించే ఛాన్స్ ఉంది. ఇక ట్రావిస్ హెడ్, గ్లెన్ ఫిలిప్, వానిందు హసరంగ రాకతో జట్టు స్ట్రాంగ్గా ఉంది. కచ్చితంగా ఈసారి జట్టు మంచి ప్రదర్శన కనబరుస్తుంది. ఇక గతంలోనూ హైదరాబాద్కు ఆస్ట్రేలియన్ ప్లేయర్లు ఆడమ్ గిల్క్రిస్ట్, డేవిడ్ వార్నర్ టైటిళ్లు అందించారు. ఈసారి కమిన్స్ సన్రైజర్స్కు కెప్టెన్ అవుతాడనుకుంటున్నా. కమిన్స్ నాయకత్వంలో హైదరాబాద్ కప్పు గెలవాలి అని ఆశిద్దాం' అని అన్నారు.
ఇక ఐపీఎల్ ద్వారా ఎందరో మంది యువ ఆటగాళ్లకు అనేక అవకాశాలు వస్తున్నాయని ఎమ్ఎస్కే అన్నారు. ప్రస్తుతం టీమ్ఇండియాలో రాణిస్తున్న యశస్వి జైశ్వాల్, శుభ్మన్ గిల్, రింకూ సింగ్, ముకేశ్ కుమార్ లాంటి ప్లేయర్లంతా అలా జాతీయ జట్టులోకి వచ్చిన వాళ్లేనని పేర్కొన్నారు. ప్రస్తుత క్రికెట్ ప్రపంచాన్ని ఐపీఎల్ శాసిస్తుందని ఓ ప్రశ్నకు సమాధానంగా చెప్పారు.
నేనూ విరాట్ అభిమానినే: కోహ్లీ ఈ సీజన్లో ఎలా అడే ఛాన్స్ ఉంది? అన్న ప్రశ్నకు, 'నేను కూడా విరాట్ అభిమానినే' అని ఎమ్ఎస్కే రిప్లై ఇచ్చారు. 'కోహ్లీ ఏ సీజన్ ఆడలేదో చెప్పండి. కోహ్లీ అన్ని సీజన్లు బాగా ఆడాడు. కోహ్లీ అంటే కోహ్లీయే. 2016 సీజన్లో 973 పరుగులు చేసి విరాట్ ఓ రికార్డు క్రియేట్ చేశాడు. అది నా భూతో నా భవిష్యత్. నాకు తెలిసి ఆ రికార్డు బ్రేక్ చేయడం చాలా కష్టం. ప్రతీ సీజన్లో విరాట్ 100కి 200 శాతం కమిట్మెంట్తో ఆడతాడు. కానీ, వాళ్లకు ఏదో కలిసిరావట్లేదు. కప్పు గెలవలేకపోతున్నారు. అందరిలాగే విరాట్కు నేనూ పెద్ద ఫ్యాన్. ఈసారి వాళ్లు కూడా బాగా ఆడాలని ఆశిద్దాం' అని ఈటీవీ భారత్తో అన్నారు.
Ishan Kishan Parents Interview : 'అతడితో ఇషాన్ను పోల్చొద్దు.. ఏ ప్లేస్లోనైనా ఆడగలడు'
'SRHలో ఉండడం చాలా హ్యాపీ- నా కెరీర్లో ఇది కొత్త ఫేజ్'- ఈటీవీ భారత్తో జయదేవ్ ఉనద్కత్!
