Joe Root Test Records: ఇంగ్లాండ్ స్టార్ బ్యాటర్ జో రూట్ టెస్టుల్లో మరో అరుదైన ఘనత అందుకున్నాడు. టెస్టుల్లో అత్యధిక పరుగులు బాదిన ఆరో బ్యాటర్గా రికార్డ్ సాధించాడు. ప్రస్తుతం శ్రీలంకతో జరుగుతున్న మూడో మ్యాచ్లో రూట్ ఈ మైలురాయి అందుకున్నాడు. రెండో ఇన్నింగ్స్లో 11 పరుగుల వ్యక్తిగత స్కోర్ వద్ద రూట్ ఫీట్ సాధించాడు. ఈ క్రమంలో శ్రీలంక దిగ్గజం కుమార సంగక్కర (12400 పరుగులు)ను రూట్ (12402 పరుగులు) అధిగమించాడు. కాగా, టెస్టుల్లో ఇప్పటివరకు 146 మ్యాచ్లు ఆడిన రూట్ 12402 పరుగులు చేశాడు. అందులో 34 సెంచరీలు, 64 హాఫ్ సెంచరీలు ఉన్నాయి. ఇక సుదీర్ఘ ఫార్మట్ క్రికెట్లో క్రికెట్ దిగ్గజం సచిన్ తెందూల్కర్ (15921 పరుగులు) టాప్లో ఉన్నాడు.
టెస్టుల్లో అత్యధిక పరుగుల వీరులు
| ప్లేయర్ | జట్టు | మ్యాచ్లు | పరుగులు | సెంచరీలు |
| సచిన్ తెందూల్కర్ | భారత్ | 200 | 15921 | 51 |
| రికీ పాంటింగ్ | ఆస్ట్రేలియా | 168 | 13378 | 41 |
| జాక్ కలీస్ | సౌతాఫ్రికా | 166 | 13289 | 45 |
| రాహుల్ ద్రవిడ్ | భారత్ | 164 | 13288 | 36 |
| అలిస్టర్ కుక్ | ఇంగ్లాండ్ | 161 | 12474 | 33 |
| జో రూట్ | ఇంగ్లాండ్ | 146 | 12402 | 34 |
ఇక ఈ ఇన్నింగ్స్లో రూట్ 12 పరుగులకే పెవిలియన్ చేరాడు. అయితే మరో 83 పరుగులు బాదితే కుక్ను కూడా రూట్ అధిగమించి టెస్టుల్లో అత్యధిక పరుగులు బాదిన ఐదో బ్యాటర్గా అవతరిస్తాడు. ఇంగ్లాండ్ వచ్చే నెలలోనే పాకిస్థాన్తో టెస్టు సిరీస్ ఆడనున్న నేపథ్యంలో రూట్ త్వరలోనే ఆ మైలురాయి కూడా అందుకోవడం లాంఛనమే.
టెస్టుల్లో రూట్ మార్క్
కాగా, కొంతకాలంగా సుదీర్ఘ ఫార్మాట్ క్రికెట్లో రూట్ అదరగొడుతున్నాడు. టెస్టుల్లో తనదైన మార్క్ చూపిస్తూ పరుగుల వరద పారిస్తున్నాడు. ఇదే సిరీస్లో టెస్టుల్లో అత్యధిక సెంచరీలు బాదిన ఇంగ్లాండ్ క్రికెటర్గా కుక్ (33) ను అధిగమించి టాప్లో నిలిచాడు. ఇక ప్రస్తుత సిరీస్లోనూ అత్యధిక పరుగులు బాదిన బ్యాటర్గా కొనసాగుతున్నాడు. రూట్ 6 ఇన్నింగ్స్లో 75 సగటుతో 375 పరుగులు చేశాడు. ఇందులో 2 శతకాలు ఉన్నాయి.
ఇక మ్యాచ్ విషయానికొస్తే, సెకండ్ ఇన్నింగ్స్లో ఇంగ్లాండ్ 156 పరుగులకే ఆలౌటైంది. జెమ్మి స్మిత్ (67 పరుగులు) హాఫ్ సెంచరీతో రాణించగా, డాన్ లారెన్స్ (35 పరుగులు) ఆకట్టుకున్నాడు. శ్రీలంక బౌలర్లలో లహిరు కుమార 4, విశ్వ ఫెర్నాండో 3, అశిత ఫెర్నాండో 2, మిలాన్ రత్నయకె 1 వికెట్ దక్కించున్నారు. దీంతో శ్రీలంక టార్గెట్ 219 పరుగులు అయ్యింది.
ప్రతి పరుగుకు ఓ కథ ఉంటుంది: జో రూట్ - Joe Root Test
కోహ్లీ - రూట్‌లో బెస్ట్ ఎవరు? గణాంకాలు ఏం చెబుతున్నాయ్? - Virat Kohli vs Joe Root
