Ipl 2024 Reschedule Matches: 2024 ఐపీఎల్లో రెండు మ్యాచ్ల షెడ్యూల్ మారింది. పలు కారణాల దృష్యా ఏప్రిల్ 17న ఈడెన్ గార్డెన్స్ వేదికగా జరగాల్సిన కోల్కతా నైట్రైడర్స్- రాజస్థాన్ రాయల్స్ మ్యాచ్ను ప్రీపోన్ చేశారు. ఈ మ్యాచ్ను ఏప్రిల్ 16న అదే వేదికలో నిర్వహించనున్నారు. అదే విధంగా అహ్మదాహాద్ నరేంద్రమోదీ స్టేడియంలో ఏప్రిల్ 16న జరగాల్సిన దిల్లీ- గుజరాత్ మ్యాచ్ను మరుసటి రోజు (ఏప్రిల్ 17)కు మార్చారు.
అయితే ఏప్రిల్ 17న శ్రీ రామనవమి పండగ సందర్భంగా కోల్కతా మ్యాచ్ రీషెడ్యూల్ జరిగినట్లు తెలుస్తోంది. కోల్కతాలో రామనవమి ఉత్సవాలు ఘనంగా జరుగుతాయని సమాచారం. దీంతో భద్రత కారణాల దృష్యా కేకేఆర్- రాజస్థాన్ మ్యాచ్ షెడ్యూల్ కంటే ఒకరోజు ముందుకు జరిగినట్లు తెలుస్తోంది.
మరోవైపు బంగాల్ రాష్ట్రంలో ఏప్రిల్ 19న తొలి విడత లోక్సభ ఎన్నికలు జరగనున్నాయి. రాష్ట్రంలోని పలు లోక్సభ నియోజకవర్గాల్లో ఏప్రిల్ 19న పోలింగ్ జరగనుంది. అయితే పోలింగ్కు కేవలం రెండు రోజుల ముందే మ్యాచ్ ఉండడం వల్ల గేమ్ను ఏప్రిల్ 16కు లేదా ఏప్రిల్ 18 తర్వాత నిర్వహించాలని బంగాల్ క్రికెట్ అసోసియేషన్ తెలిపినట్లు తెలుస్తోంది. కానీ, దీనిపై బీసీసీఐ ఎలాంటి వివరణ ఇవ్వలేదు. ఇక ఈ రెండు మ్యాచ్లు మినహా టోర్నమెంట్లో అన్ని గేమ్లు షెడ్యూల్ ప్రకారమే జరగనున్నాయి.
ఇక కోల్కతా ప్రస్తుత సీజన్లో అదరగొడుతోంది. ఇప్పటివరకూ ఆడిన రెండు మ్యాచ్ల్లోనూ విజయం సాధించి 4 పాయింట్లతో పట్టికలో రెండో స్థానంలో కొనసాగుతోంది. గత మ్యాచ్లో రాయల్ ఛాలెంజర్స్ బెంగళూరుపై అద్భుత విజయం సాధించిన కేకేఆర్ రన్రేట్ (1.047) కూడా మెరుగుపర్చుకుంది.
ఆ ఒక్కటీ కలిసొస్తే: అయితే భారీ అంచనాలతో బరిలోకి దిగిన ఆస్ట్రేలియా స్టార్ పేసర్ మిచెల్ స్టార్క్ ఈ సీజన్లో పేలవ ప్రదర్శన కనబరుస్తున్నాడు. అతడు ఆడిన రెండు మ్యాచ్ల్లోనూ వికెట్ లేకుండానే 100+ పరుగులు సమర్పించుకున్నాడు. ఐపీఎల్ చరిత్రలోనే భారీ ధరకు అమ్ముడైన స్టార్క్ ఇలా పేలవ ప్రదర్శనతో కోల్కతాతో పాటు క్రికెట్ ఫ్యాన్స్ను కూడా నిరాశ పర్చుతున్నాడు. ఇకనైనా స్టార్క్ మెరుగైన ప్రదర్శన చేస్తే, కేకేఆర్కు తిరుగుండదని ఫ్యాన్స్ అభిప్రాయపడుతున్నారు.
రాజస్థాన్ మ్యాచ్లో రోహిత్ శర్మనే భయపెట్టేసిన అభిమాని - IPL 2024 RR VS MI
