India Vs England 4th Test : రాంచీ వేదికగా ఇంగ్లాండ్‌తో జరిగిన నాలుగో టెస్టులో టీమ్ఇండియా విజయం సాధించింది. ఇంగ్లీష్ జట్టు నిర్దేశించిన 192 పరుగులను ఐదు వికెట్లు కోల్పోయి చేధించింది. నాలుగో రోజును 40/0 స్కోరుతో ప్రారంభించిన భారత్‌ వరుసగా వికెట్లు కోల్పోయినప్పటికీ లక్ష్యచేధనలో సక్సెస్ సాధించింది. ఇక భారత జట్టులో రోహిత్ శర్మ (55), యశస్వీ జైస్వాల్ (37) రాణించగా, ధ్రువ్ జురెల్ (39*) ఎప్పటిలాగే కీలక ఇన్నింగ్స్ ఆడి జట్టును ఆదుకున్నాడు. ఇక జురెల్తో పాటు శుభ్మన్ గిల్ (52*) జట్టుకు భారీ స్కోర్ను అందించాడు. అర్ధశతకంతో రాణించాడు. ఆరో వికట్ సమయానికి ధ్రువ్, గిల్ 72 పరుగుల పార్ట్నర్షిప్ను జోడించారు.
మరోవైపు యంగ్ ప్లేయర్లు సర్ఫరాజ్‌ ఖాన్, రజత్‌ పటీదార్ డకౌట్లుగా పెవిలియన్ బాట పట్టారు. రవీంద్ర జడేజా (4) కూడా ఎక్కువ పరుగులు చేయలేకపోయాడు. ఇక ఇంగ్లాండ్ బౌలర్లలో షోయబ్‌ బషీర్‌ 3 వికెట్లతో రాణించగా, టామ్‌ హార్ట్‌లీ, జోరూట్ చెరో వికెట్ను ఖాతాలో వేసుకున్నారు. ఇక రెండు ఇన్నింగ్స్‌ల్లోనూ కీలకంగా ఉన్న ధ్రువ్ జురెల్‌ను 'ప్లేయర్‌ ఆఫ్‌ ది మ్యాచ్' అవార్డు వరించింది.
మ్యాచ్ సాగిందిలా :
నాలుగో రోజులో ఓవర్‌ నైట్‌ 40/0 స్కోరుతో లక్ష్యఛేదనను ప్రారంభించిన టీమ్ఇండియా తొలుత మంచి ఫామ్లోనే కనిపించింది. అయితే యశస్వి జైస్వాల్ కొట్టిన బాల్ను అండర్సన్‌ సూపర్ డైవ్లో ముందుకు దూకి అందుకొన్నాడు. దీంతో తొలి వికెట్ సమయానికి ఓపెనర్లు 84 పరుగులు జోడించినట్లైంది. మొదటి వికెట్ పడ్డాక ఆచితూచి ఆడిన రోహిత్ శర్మ కాసేపటికీ హాఫ్ సెంచరీ చేసి వెనుతిరిగాడు. దీంతో లంచ్ బ్రేక్ సమయానికి 118/3 స్కోరుగా నమోదైంది. అయితే బ్రేక్ తర్వాత షోయబ్‌ బషీర్‌ ఒకే ఓవర్‌లో రవీంద్ర జడేజా, సర్ఫరాజ్‌ ఖాన్ ఔటై పెవిలియన్కు చేరుకున్నారు. అయితే ఇంగ్లాండ్ స్పిన్నర్లు వేసిన బంతులను కట్టుదిట్టంగా ఆడి జట్టును విజయ తీరాలకు చేర్చారు ధ్రువ్- గిల్. దీంతో నాలుగో టెస్ట్ టీమ్ఇండియా వశమైంది.
