Ind Vs Eng 4th Test : రాంచీ వేదికగా టీమ్‌ఇండియాతో జరుగుతున్న నాలుగో టెస్టు తొలి ఇన్నింగ్స్‌లో ఇంగ్లాండ్ జట్టు 353 పరుగులకు ఆలౌట్‌ అయింది. ఓవర్నైట్ 302/7తో రెండో రోజు ఆట ప్రారంభించిన ఇంగ్లీష్ జట్టును కట్టడి చేసిన రోహిత్ సేన వరుస వికెట్లతో చెలరేగిపోయింది. ఆల్‌రౌండర్‌ జడేజా దెబ్బకు ఇంగ్లీష్ జట్టు డీలా పడిపోయింది. దీంతో ఓవర్నైట్ స్కోర్కు మరో 51 పరుగులు జోడించిన ఇంగ్లీష్ ప్లేయర్లు పెవిలియన్ బాట పట్టారు.
అర్ధశతకం సాధించిన రాబిన్సన్‌(58) టెస్టుల్లో తొలి అర్ధ శతకం సాధించాడు. అయితే అనూహ్యంగా జడేజా చేతికి చిక్కాడు. ఆ తర్వాత షోయబ్‌ బషీర్ను కూడా అదే ఓవర్‌లో జడ్డూ పెవిలియన్ బాట పట్టించాడు. ఆ తర్వాత వచ్చిన జేమ్స్‌ అండర్సన్‌ కూడా జడేజా బౌలింగ్‌లోనే ఎల్బీగా వెనుదిరిగాడు. ఇక ఆఖరి వరకు పోరాడిన జో రూట్ శతకంతో(122) నాటౌట్‌గా నిలిచాడు. రూట్-రాబిన్సన్‌ కలిసి ఎనిమిదో వికెట్‌కు 100 పరుగుల భాగస్వామ్యం నమోదు చేశారు. మరోవైపు భారత బౌలర్లలో జడేజా 4, ఆకాశ్‌దీప్‌ 3, సిరాజ్‌ 2, అశ్విన్ 1 వికెట్ తీశారు.
టెస్టుల్లో రూట్ రికార్డ్ : శుక్రవారం జరిగిన మ్యాచ్లో సెంచరీ బాదాడు జో రూట్. 219 బంతులు ఆడి అతడు సెంచరీ మార్క్ అందుకున్నాడు. కాగా, టెస్టుల్లో రూట్కు ఇది 31వ శతకం. అయితే దీంతో పాటు ఈ స్టార్ క్రికెటర్ ఇదే వేదికగా ఓ అరుదైన ఘనతను తన ఖాతాలో వేసుకున్నాడు. టెస్టుల్లో భారత్పై 10 సెంచరీలు బాదిన ఏకైక బ్యాటర్గా చరిత్రకెక్కాడు. ఇక ఈ జాబితాలో జో రూట్ తర్వాత ఆస్ట్రేలియా బ్యాటర్ స్టీవ్ స్మిత్ (9), వివ్ విచర్డ్స్ (8), రికీ పాంటింగ్ (8) ఉన్నారు. అయితే అన్ని ఫార్మాట్లలో కలిపి రూట్కు భారత్పై ఇది 13వ శతకం. ఈ విషయంలో రూట్ కంటే ముందు స్టీవ్ స్మిత్, రికీ పాంటింగ్ చెరో 14 శతకాలతో ముందున్నారు.
ఆకాశ్ అదుర్స్- రూట్ సెంచరీ- తొలి రోజు ఇంగ్లాండ్ ఇలా
అరంగేట్రంలోనే అదరగొట్టేస్తున్న కుర్రాళ్లు - ప్రత్యర్థి జట్టు ఢమాల్!
