Sanju Samson ICC Champions Trophy 2025 : ఈ ఏడాదికిగానూ ఛాంపియన్స్ ట్రోఫీ కోసం బీసీసీఐ టీమ్ఇండియా తుది జట్టును ఇంకా ప్రకటించాల్సి ఉంది. ఐసీసీ షెడ్యూల్ ప్రకారం జనవరి 12 కల్లా ప్రకటించాల్సింది. కానీ, టీమ్ఇండియా కోరిక మేరకు ఈ వారంతం వరకు టైమ్ ఇచ్చింది. అప్పుడు టీమ్‌ను వెల్లడించినప్పటికీ ఫిబ్రవరి 13 వరకు ఏదైనా మార్పులు ఉంటే చేసుకొనే అవకాశాలు ఉన్నాయి.
అయితే జనవరి 19న బీసీసీఐ సెలక్టర్లందరూ స్క్వాడ్‌ను వెల్లడిస్తారనే వార్తలు వస్తున్నాయి. ఈ క్రమంలో ఇప్పుడు అందరి దృష్టి సంజు శాంసన్‌పైనా పడింది. చివరిసారిగా వన్డేలో (సౌతాఫ్రికాపై) సెంచరీ సాధించి మంచి ఊపుమీద ఉన్నాడు ఈ స్టార్ క్రికెటర్. అయితే ఛాంపియన్స్ ట్రోఫీ కోసం తనను ఫస్ట్ ఫ్రిఫరెన్స్గా భావించట్లేదని క్రికెట్ వర్గాలు అంటున్నాయి. అసలు తనను కనీసం స్క్వాడ్‌లోనైనా తీసుకునే అవకాశం రాకపోవచ్చనేది వారి మాట.
పంత్‌కు బ్యాకప్‌గా ఆ ఇద్దరూ?
ఇదిలా ఉండగా, రెగ్యులర్ వికెట్ కీపర్‌గా యంగ్ క్రికెటర్ రిషభ్‌ పంత్ జట్టులో ఉండటం ఖాయమే అని అనిపిస్తోంది. ఇంగ్లండ్‌తో వన్డే సిరీస్‌కు రెస్ట్ ఇచ్చి ఛాంపియన్స్ ట్రోఫీ కల్లా రెడీగా ఉండేలా చూస్తారని తెలుస్తోంది. గత వన్డే ప్రపంచ కప్‌లో కేఎల్ రాహుల్‌ వికెట్ కీపింగ్‌ బాధ్యతలు కూడా నిర్వర్తించాడు. కానీ, ఈసారి మాత్రం తనను స్పెషలిస్ట్‌ బ్యాటర్‌గానే తీసుకొనే అవకాశం ఉంది. అందుకే పంత్‌కు బ్యాకప్‌గా ఎవరిని ఎంచుకుంటారనేదే ఇప్పుడు ప్రశ్నార్థకంగా మారింది. అయితే ఆ పొజిషన్ కోసం ముగ్గురు రెడీగా ఉన్నారు. వారిలో సంజు శాంసన్‌తో పాటు ధ్రువ్‌ జురెల్, ఇషాన్ కిషన్. దేశవాళీ క్రికెట్‌లో ఇషాన్ కిషన్ అదరగొట్టేయడంతో బీసీసీఐ సెలక్టర్ల దృష్టిని ఆకర్షించాడు.
మరోవైపు సంజు కూడా ఏమాత్రం తక్కువగా ఆడలేదు. అంతర్జాతీయ మ్యాచుల్లోనూ భారీగా పరుగులు సాధించి సిద్ధమని చెప్పకనే చెప్పాడు. అయితే, మేనేజ్‌మెంట్ మాత్రం సంజును కేవలం టీ20 ప్లేయర్‌గానూ చూస్తోందనే వ్యాఖ్యలు క్రికెట్ వర్గాల్లో వినిపిస్తున్నాయి. గతేడాది పొట్టి ఫార్మాట్‌లో మూడు సెంచరీలు బాదేశాడు. ధ్రువ్‌ జురెల్ ఇప్పటివరకు వన్డే అరంగేట్రం చేయలేదు. ఐసీసీ టోర్నీకి అతడిని ఎంపిక చేసే అవకాశాలు దాదాపు లేనట్లే. ఇక ఈ ముగ్గురిలో ఇషాన్‌నే పంత్‌కు బ్యాకప్‌గా తీసుకుంటారని క్రీడా పండితుల విశ్లేషణ.
అప్పుడు పృథ్వీ షా - ఇప్పుడు సంజు శాంసన్‌!- విజయ్ హజారే స్క్వాడ్ నుంచి స్టార్ క్రికెటర్ ఔట్!
ఛాంపియన్స్ ట్రోఫీ ఫైనల్ స్క్వాడ్లో సంజూ లేనట్లేనా? అన్యాయమంటూ ఫ్యాన్స్ ఫైర్!
