రంజీలో స్టార్ క్రికెటర్లు ఫెయిల్​! - సింగిల్ డిజిట్​కే రోహిత్, గిల్, జైస్వాల్ ఔట్​

మళ్లీ అదే రిపీట్- రంజీ మ్యాచ్​లో రోహిత్ విఫ‌లం - జైస్వాల్, గిల్, పంత్ కూడా!

Rohit Sharma Ranji Trophy : టీమ్ ఇండియా కెప్టెన్ రోహిత్ శ‌ర్మ త‌న పేలవ ఫామ్‌ తో మరోసారి నిరాశపరిచాడు. 10 ఏళ్ల త‌ర్వాత రంజీ ట్రోఫీలో ముంబయి త‌ర‌పున ఆడుతున్న రోహిత్ కేవలం మూడు పరుగులే చేసి పెవిలియన్​కు చేరాడు. ఓపెన‌ర్​గా బ‌రిలోకి దిగిన రోహిత్ ఆరంభం నుంచే జ‌మ్ముకశ్మీర్ బౌల‌ర్ల‌ను ఎదుర్కొవ‌డానికి ఇబ్బంది ప‌డ్డాడు. దీంతో 19 బంతులు ఎదుర్కొని 3 పరుగులకే ఔట్​ అయ్యాడు. అలాగే యశస్వీ జైస్వాల్(5), గిల్ (4) సైతం ఈ మ్యాచ్​లో విఫలమయ్యారు.

దారుణంగా విఫలమైన రోహిత్
రెడ్​బాల్ క్రికెట్​లో రోహిత్ శర్మ గతేడాది దారుణంగా విఫలమయ్యాడు. గత 15 టెస్టు ఇన్నింగ్స్​ల్లో 10.93 సగటుతో 164 పరుగులు మాత్రమే చేశాడు. బంగ్లాదేశ్, న్యూజిలాండ్, ఆస్ట్రేలియాతో జరిగిన సిరీస్​ల్లో పేలవ ఫామ్​ కనబరిచాడు. దీంతో తిరిగి ఫామ్​ను అందుకునేందుకు దేశవాళీ క్రికెట్ వైపు మొగ్గు చూపాడు. దాదాపు 10 ఏళ్ల (3,365 రోజులు) తర్వాత గురువారం నుంచి జమ్ముకశ్మీర్​తో జరుగుతున్న రంజీ మ్యాచ్​లో రోహిత్ ఆడుతున్నాడు. ఓపెన‌ర్​గా బ్యాటింగ్ దిగిన రోహిత్ శ‌ర్మ 19 బాల్స్ ఎదుర్కొని కేవ‌లం 3 ప‌రుగులు మాత్ర‌మే చేసి ఔట్ అయ్యాడు. ఉమ‌ర్ న‌జీర్ బౌలింగ్​లో క్యాచ్ ఇచ్చి వెనుదిరిగి మరోసారి విఫలమయ్యాడు.

టాస్ గెలిచిన ముంబయి కెప్టెన్ అజింక్య రహానే ముందుగా బ్యాటింగ్ తీసుకున్నాడు. ఆ తర్వాత, భారత ఓపెనింగ్ జోడీ అంటే యశస్వీ జైస్వాల్, రోహిత్ శర్మ ముంబయి ఇన్నింగ్స్​ను ప్రారంభించారు. 6 అడుగుల 4 అంగుళాల పొడవు ఉన్న ఉమర్ నజీర్ బౌలింగ్​లో రోహిత్ ఇబ్బందిపడ్డాడు. అతడి ఓవర్లోనే ఆఖరికి ఔట్​ అయ్యాడు.

జైస్వాల్ సైతం విఫలం
అయితే, రోహిత్ శర్మతో ఓపెనర్​గా వచ్చిన యశస్వీ జైస్వాల్ మంచి ఫామ్​లో ఉన్నాడు. ఆసీస్​తో జరిగిన సిరీస్​లో 5 మ్యాచ్​ల్లో 43 సగటుతో 391 పరుగులు స్కోర్ చేశాడు. అందులో ఒక సెంచరీ, 2 హాఫ్ సెంచరీలు ఉన్నాయి. అలాగే జమ్ముకశ్మీర్‌ పైనా జైస్వాల్​కు మంచి రికార్డులు ఉన్నాయి. కానీ, ఈ మ్యాచ్‌లో జైస్వాల్ 8 బంతుల్లో 5 పరుగులు చేసి పెవిలియన్​కు చేరాడు.

గిల్ పేలవ ఫామ్ కొనసాగింపు
అలాగే దేశవాళీ క్రికెట్‌ కమ్​బ్యాక్​లో టీమ్ ఇండియా యంగ్ బ్యాటర్ శుభ్​మన్‌ గిల్‌ కూడా నిరాశపరిచాడు. పంజాబ్‌ తరఫున రంజీ బరిలోకి దిగిన గిల్ సింగిల్‌ డిజిట్​కే ఔట్ అయ్యాడు. కర్ణాటకతో తాజాగా జరిగిన మ్యాచ్​లో 8 బంతుల్లో 4 రన్స్ మాత్రమే చేసి పెవిలియన్ బాటపట్టాడు. కాగా, పంజాబ్ టీమ్​కు కెప్టెన్ ప్రస్తుతం గిల్ ఉన్నాడు.

పంత్ సైతం
సౌరాష్ట్రతో జరుగుతున్న మ్యాచ్​లో దిల్లీ బ్యాటర్ రిషభ్‌ పంత్ (1) నిరాశపరిచాడు. 10 బంతులు ఎదుర్కొని ఒక్క పరుగు మాత్రమే చేసి ఔటయ్యాడు.