ఐపీఎల్​ కాస్ట్లీ ప్లేయర్లు- ధర ఎక్కువ- పెర్ఫార్మెన్స్​ తక్కువ - COSTLY PLAYERS FLOP IN IPL

Costly Players Flop In Ipl: ఐపీఎల్​లో ప్రతి ఏడాదీ ఆయా ప్లేయర్లు వేలంలో భారీ ధరకు అమ్ముడవుతుంటారు. ఈ క్రమంలో వారిపై ప్రేక్షకుల్లో అంచనాలు పీక్స్​లోకి వెళ్లిపోతాయి. అయితే గత కొన్ని సీజన్లుగా వేలంలో భారీ ధర దక్కించుకొని, మైదానంలో ఆశించిన రీతిలో ప్రదర్శన చేయని ప్లేయర్లు వీళ్లే!

Costly Players Flop In Ipl : ఐపీఎల్ టోర్నమెంట్​లో​ టైటిల్ లక్ష్యంగా ఆయా ఫ్రాంచైజీలు పలు ప్లేయర్లపై భారీ మొత్తం వెచ్చిస్తుంటాయి. ఈ క్రమంలో గతేడాది డిసెంబర్​లో జరిగిన వేలంలోనూ ఆయా ఆటగాళ్లు భారీ ధరకు అమ్ముడయ్యారు. అయితే వేలంలో భారీ ధర దక్కించుకొని ఎన్నో అంచనాలతో బరిలోకి దిగుతున్న పలువురు ప్లేయర్లు ప్రతి ఏడాదీ నిరాశపరుస్తున్నారు. ఐపీఎల్​ హిస్టరీలో అలా భారీ ధరకు అమ్ముడై అంచనాలు అందుకోకుండా పేలవ ప్రదర్శన కనబర్చిన ప్లేయర్లెవరో ఇప్పుడు చూద్దాం.

• 2024 ఐపీఎల్: ఆస్ట్రేలియా స్టార్ పేసర్ మిచెల్ స్టార్క్ ఐపీఎల్​ చరిత్రలోనే అత్యధిక ధర దక్కించుకున్నాడు. సీజన్ 17కోసం కోల్​కతా నైట్​రైడర్స్ జట్టు గతేడాది డిసెంబర్​లో జరిగిన వేలంలో రూ.24.75 కోట్లకు కొనుగోలు చేసింది. దీంతో స్టార్క్​పై అంచనాలు అమాంతం పెరిగిపోయాయి. కానీ, వాస్తవంలో మాత్రం స్టార్క్ ప్రదర్శన ఊహించిన స్థాయిలో లేదు. ప్రస్తుత సీజన్​లో ఇప్పటి వరకూ 2 మ్యాచ్​లు ఆడిన స్టార్క్, ఒక్క వికెట్ పడగొట్టకపోగా భారీగా పరుగులు సమర్పించుకున్నాడు. రెండు మ్యాచ్​ల్లో స్టార్క్ ఏకంగా 100+ పరుగులు ఇచ్చుకోవడం గమనార్హం.
• 2023 ఐపీఎల్​: గతేడాది ఐపీఎల్​లో ఇంగ్లాండ్‌ ఆల్‌రౌండర్‌ శామ్ కరన్, ఆస్ట్రేలియా ఆల్‌రౌండర్‌ కామెరూన్‌ గ్రీన్‌ భారీ ధరకు అమ్మడయ్యారు. శామ్ కరన్​ను పంజాబ్​ కింగ్స్​ రూ.18.5కోట్లకు కొనుగోలు చేసింది. ఆ ఏడాది వరకూ ఇదే అత్యధిక ధర. మరోవైపు గ్రీన్​ను రూ. 17.5కోట్లకు ముంబయి ఇండియన్స్ దక్కించుకుంది. అయితే వీళ్లిద్దరూ అంచనాలు అందుకోవడంలో విఫలం అయ్యారు. కరన్ 14 మ్యాచ్‌లాడి 276 పరుగులకే పరిమితం కాగా, బౌలింగ్​లో 10 వికెట్లే పడగొట్టాడు. ఇక గ్రీన్ విషయానికొస్తే, 16 మ్యాచ్‌ల్లో 452 పరుగులు చేసి ఫర్వాలేదనిపించినా, బంతితో ఆకట్టుకోలేదు. అతడు బౌలింగ్​లో 6 వికెట్లు మాత్రమే పడగొట్టాడు.
• 2022 ఐపీఎల్: 2022లో ముంబయి యంగ్ బ్యాటర్​ ఇషాన్‌ కిషన్​ కోసం రూ.15.25కోట్లు వెచ్చించింది. అయితే ఆ సీజన్​లో ఇషాన్ 14 మ్యాచ్‌ల్లో 418 పరుగులు చేశాడు. సీజన్ ప్రారంభంలో ఒకట్రెండు మెరుపు ఇన్నింగ్స్‌లు ఆడినా సెకండ్ హాఫ్​లో నిరాశపరిచాడు.
• 2021 ఐపీఎల్​: 2021లో సౌతాఫ్రికా ఆల్‌రౌండర్‌ క్రిస్‌ మోరిస్‌ అత్యధిక ధర దక్కించుకున్నాడు. అతడి కోసం రాజస్థాన్‌ రాయల్స్‌ ఏకంగా రూ.16.25 కోట్లు పెట్టింది. అయితే మోరిస్​కు ఆ ధర చాలా ఎక్కువన్న అభిప్రాయం వ్యక్తమైంది. అందుకు తగ్గట్లే అతడి ప్రదర్శన చేశాడు. ఆల్‌రౌండర్‌ పాత్రలో అతడు 15 వికెట్లతో పర్వాలేదనిపించినా, బ్యాటింగ్​లో మాత్రం ఘోరంగా విఫలమయ్యాడు. మోరిస్ ఆ సీజన్​లో కేవలం 67 పరుగులే చేశాడు.