Vivaha Panchami 2024 : హిందూ పండగల్లో వివాహ పంచమికి విశేష ప్రాముఖ్యత ఉంది. వైవాహిక జీవితం సుఖ సంతోషాలతో నిండటానికి దంపతులిద్దరూ కలిసి చేసుకునే పండుగ వివాహ పంచమి. ఈ సందర్భంగా ఈ ఏడాది వివాహ పంచమి ఎప్పుడు జరుపుకోవాలి? వివాహ పంచమి రోజు ఎలాంటి ఆచారాలు పాటించాలి? అనే విషయాలు తెలుసుకుందాం.
వివాహ పంచమి ఎప్పుడు?
ప్రతి ఏడాది మార్గశిర మాసం శుక్ల పక్షంలో వచ్చే పంచమి తిథి రోజు వివాహ పంచమి జరుపుకుంటారు. ఈ ఏడాది మార్గశిర శుద్ధ పంచమి డిసెంబర్ 5వ తేదీ గురువారం మధ్యాహ్నం 12:50 గంటల నుంచి మరుసటి రోజు డిసెంబర్ 6వ తేదీ శుక్రవారం మధ్యాహ్నం 12:08 గంటల వరకు ఉంది. సాధారణంగా పండుగలు సూర్యోదయం తిధి ఆధారంగా జరుపుకుంటారు. అందుకే డిసెంబర్ 6న శుక్రవారం రోజునే వివాహ పంచమి జరుపుకోవాలని పంచాంగకర్తలు సూచిస్తున్నారు. వివాహ పంచమి పూజకు ఈ రోజు ఉదయం 6 నుంచి 12 గంటల వరకు శుభసమయం.
వివాహ పంచమి విశిష్టత
వైవాహిక జీవితం సుఖంగా, సంతోషంగా ఉండాలని దంపతులు, నూతన వధూవరులు ఆనందంగా జరుపుకునే పండుగ వివాహ పంచమి. వాల్మీకి మహర్షి రచించిన రామాయణం ప్రకారం ఈ రోజునే శ్రీరాముడు సీతా దేవికి వివాహం చేసుకున్నాడని తెలుస్తోంది. ఈ రోజున నూతన వధూవరులు, దంపతులు భక్తితో పూజలు, వ్రతాలు చేస్తే దాంపత్య జీవితంలో ఎలాంటి సమస్యలు రావని విశ్వాసం. ఈ రోజున చేసే పూజలు భార్యభర్తల మధ్య ప్రేమ, సానుకూలత, సామరస్యాన్ని పెంచుతాయని భక్తులు విశ్వసిస్తారు.
వివాహ పంచమి పూజ విధానం
వివాహ పంచమి రోజున తెల్లవారుజామున నిద్రలేచి తలస్నానం చేయాలి. శ్రీరాముడు సీతాదేవిల అన్యోన్య దాంపత్యాన్ని గుర్తుచేసుకుంటూ వారి చిత్రపటాలను పసుపు, కుంకుమలతో అలంకరించాలి. ఆవునేతితో దీపారాధన చేయాలి. పసుపు రంగు పూలతో అష్టోత్తర శతనామాలతో సీతారాములను పూజించాలి. పులిహోర, పాయసం, గారెలు నైవేద్యంగా సమర్పించాలి.
ఆలయాల్లో ఇలా
కొన్ని ప్రాంతాలలో ఈ రోజు రామాలయాలలో సీతారాముల కల్యాణం వైభవంగా జరిపిస్తారు. ఈ సందర్భంగా దంపతులు ఆలయంలో రాముల వారి కల్యాణ వేడుకలు కనులారా వీక్షించి తలంబ్రాలు అక్షింతలుగా శిరస్సున ధరించాలి.
ఈ దానాలు శ్రేష్టం
వివాహ పంచమి రోజున భార్యాభర్తలు ఇద్దరూ కలిసి దానధర్మాలు చేసిన సుఖసంతోషాలు లభిస్తాయి. అనాథలకు, పేదవారికి ఆహారం, బట్టలు, ఆర్థిక సహాయం చేయడం మంచిది.
వివాహ పంచమి రోజు అరటి చెట్టును ఎందుకు పూజిస్తారు?
జ్యోతిష్య శాస్త్రం ప్రకారం వివాహం అయిన 5వ రోజున అరటి చెట్టును పూజించడం వలన బృహస్పతి గ్రహానికి సంబంధించిన దోషాలు తొలగిపోతాయి. దేవ గురువు బృహస్పతి అరటి చెట్టు రూపంలో ఉంటాడని పురాణాలు చెబుతున్నాయి. వివాహ పంచమి రోజు బృహస్పతిని అరటి చెట్టు రూపంలో పూజించడం వలన వైవాహిక జీవితంలో ఏమైనా సమస్యలు, అడ్డంకులు ఉంటే తొలగిపోయి సత్సంతానం సిద్ధిస్తుందని శాస్త్రవచనం.
అరటి చెట్టు పూజ ఇలా చేయాలి
వివాహ పంచమి రోజు సూర్యోదయంతో అభ్యంగన స్నానం చేసి పసుపు బట్టలు ధరించి, అరటి చెట్టుకు పసుపు తాడు కట్టాలి. అరటి చెట్టుకు పసుపు, చందనంతో పాటు పుష్పాలు సమర్పించిన తర్వాత ధూపం వేసి నెయ్యి దీపం వెలిగించాలి. లక్ష్మీనారాయణుని భక్తితో ధ్యానిస్తూ అరటి చెట్టును పూజించాలి. పంచామృతం, తమలపాకులు, అరటి పండ్లు, పువ్వులతో పూజ చేసి కొబ్బరి కాయను అరటి చెట్టుకు నైవేద్యంగా సమర్పించాలి. తర్వాత అరటి చెట్టుకు 21 ప్రదక్షిణలు చేసి, అరటి చెట్టు ముందు పెళ్లి కాని వారు త్వరగా పెళ్లి కావాలని, పెళ్ళైన వారు అన్యోన్య దాంపత్యం సిద్ధించాలని కోరుకోవాలి.
కుటుంబంలో వివాహ కార్యక్రమాలు ఉన్నవారు వివాహ పంచమి రోజున కుటుంబ సభ్యులకు, స్నేహితులకు పెళ్లి శుభలేఖలు ఇవ్వడం శుభసూచకంగా భావిస్తారు. రానున్న వివాహ పంచమి రోజును మనం కూడా భక్తిశ్రద్ధలతో జరుపుకుందాం. సుఖసంతోషాలతో ఉందాం శుభం భూయాత్!
ముఖ్యగమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.
