Ganagapur Dattatreya Temple History : బ్రహ్మ విష్ణు మహేశ్వరుల స్వరూపమైన దత్తాత్రేయునికి దేశంలో అనేక ఆలయాలు ఉన్నాయి. అయితే కొన్ని క్షేత్రాలలో స్వామి సశరీరులుగా నడయాడినందున ఆ క్షేత్రాలకు పవిత్రత చేకూరింది. అలాంటి వాటిల్లో ఒకటిగా భాసిల్లుతున్న గాణగాపురం క్షేత్ర విశేషాలను ఈ కథనంలో తెలుసుకుందాం.
శ్రీ క్షేత్రం విశిష్టత
శ్రీ దత్తాత్రేయుని బ్రహ్మ విష్ణు మహేశ్వరుల స్వరూపంగా, భూత భవిష్యత్ వర్తమాన కాలాలకు ప్రతీకగా భావిస్తారు. ఆ దత్తాత్రేయుడు కొలువు దీరిన శ్రీ క్షేత్రమే గాణగాపురం. దత్తాత్రేయుని రెండవ అవతారమైన శ్రీ నరసింహ సరస్వతి స్వామి వారు స్వయంగా నడయాడిన ఈ ప్రాంతం ప్రసిద్ధ దత్త క్షేత్రంగా విరాజిల్లుతోంది.
గాణగాపురం ఎక్కడ ఉంది?
కర్ణాటకలోని గుల్బర్గా జిల్లాలో గాణగాపురం క్షేత్రం ఉంది.
ఆలయ స్థల పురాణం
అత్రి మహర్షి భార్య మహా సాధ్వి అనసూయమ్మ పాతివ్రత్యాన్ని పరీక్షించడానికి వచ్చిన త్రిమూర్తులను అనసూయ పసి బాలురుగా మార్చి వేయగా లక్ష్మి సరస్వతి పార్వతి అనసూయను ప్రార్ధించి తమ పతులను తిరిగి పొందగా అప్పుడు త్రిమూర్తుల అనుగ్రహంతో అత్రి అనసూయలకు త్రిమూర్తుల అంశగా దత్తుడిగా జన్మిస్తాడు. ఆ దత్తాత్రేయుని రెండవ అవతారమే శ్రీ నరసింహ సరస్వతిగా అవతరించినట్లుగా కథనం. అలా అవతరించిన శ్రీ నరసింహ సరస్వతి కాశీకి వెళ్ళి కృష్ణ సరస్వతి స్వామి దగ్గర సన్యాస దీక్షను చేపట్టి దేశమంతా తీర్ధ యాత్రలు చేస్తూ చివరకు కర్ణాటకలోని గాణగాపురంకు వచ్చి 23 సంవత్సరాలు అక్కడే ఉండి చివరకు తన పాదుకలను అక్కడే వదిలేసి శ్రీశైలంలోని కదళీ వనంలో అవతార పరిసమాప్తి గావించాడని పురాణగాథ.
పాదుకలకు పూజ
అలా నరసింహ సరస్వతి స్వామి వారు గాణగాపురంలో విడిచి వెళ్లిన పాదుకలను నిర్గుణ పాదుకలు అని అంటారు. నిర్గుణం అంటే ఎలాంటి ఆకారం లేనిదని అర్ధం. ఇలాంటి నిర్గుణ పాదుకలు ఒక్క గాణగాపురంలో తప్ప ప్రపంచంలో ఎక్కడ చూడలేం. ఈ పాదుకలనే స్వామిగా భావించి పూజలు జరుపుతారు.
ఒళ్లు గగుర్పొడిచే నిజం
గాణగాపురం లోని స్వామి పాదుకలు రాతితో తయారు చేసినవాని భావిస్తారు కానీ నిజానికి ఈ పాదుకల లోపల ఏముందో ఎవరికీ తెలియదు. ఇప్పటి వరకు వాటిని పరీక్షించడానికి కూడా ఎవరూ సాహసించలేదు. అందుకు కారణం ఏమిటంటే ఆ పాదుకలు ముట్టుకుంటే మెత్తగా దూది వలే ఉంటాయని, పాదుకలను స్పృశిస్తే నిజంగా మనిషి పాదాలు ముట్టుకున్న అనుభూతిని చెందుతారని విశ్వాసం.
పరమ పవిత్రం సంగమ స్నానం
గాణగాపురంలో దర్శనం చేయడానికి ఒక పద్ధతి ఉంది. క్షేత్రానికి చేరుకున్న భక్తులు ముందుగా ఇక్కడ ప్రవహించే బీమా - అమరాజ నది సంగమం లో స్నానం చేయాలి. ఇక్కడ ఒడ్డున గురుచరిత్ర పారాయణ చేసుకోవడానికి వీలుగా బల్లలు అమర్చి ఉంటారు. సంగమ స్నానం అనంతరం నరసింహ సరస్వతి నిర్గుణ పాదుకలను, స్వామిని కిటికీలో నుంచి దర్శనం చేసుకోవాలి. ఆ తర్వాత కల్లేశ్వరస్వామిగా పిలిచే పరమేశ్వరుని దర్శించుకోవాలి.
ఇతర ఉపాలయాలు
గాణగాపురంలో నరసింహ సరస్వతి ఆలయం ప్రాంగణంలో పంచముఖ గణపతి, ఆంజనేయుడు, నవగ్రహాలు తదితర దేవతామూర్తులను దర్శించుకోవచ్చు.
కుజ దోషం నాగ దోషం శని దోష నివారణ క్షేత్రం
నాగ కుజ ఇతర గ్రహ దోషాలున్నవారు, మానసిక సమస్యలతో ఇబ్బంది పడేవారు ఈ ఆలయంలో పూజలు జరిపించి ఒక రాత్రి నిద్రిస్తే అన్ని దోషాలు తొలగిపోతాయని విశ్వాసం. అలాగే ఏలినాటి శని, అర్ధాష్టమ శని వంటి దోషాలున్నవారు ఈ ఆలయ ప్రాంగణంలో స్వయంభువుగా వెలసిన శనీశ్వరునికి తైలాభిషేకం చేయించుకుంటే సకల శుభాలు చేకూరుతాయని విశ్వాసం.
అయిదిళ్ల భిక్ష
గాణగాపురంలో ఈ నాటికీ నరసింహ సరస్వతి స్వామి వారు ఏదో ఒక రూపంలో సరిగ్గా మధ్యాహ్నం 12 గంటలకు భిక్షకు వస్తారని అక్కడి ప్రజలు నమ్ముతారు. అందుకే ప్రతి ఇంట్లో తమ శక్తి కొద్దీ రొట్టెలు, కిచిడీ, పాయసం వంటి పదార్థాలు తయారు చేసి సిద్ధంగా ఉంచుతారు. ఈ క్షేత్రాన్ని దర్శించడానికి వెళ్లిన భక్తులు కూడా అయిదు ఇళ్లలో భిక్షను స్వీకరించడం కూడా ఆనవాయితీ. భక్తుల రూపంలో స్వామే భిక్షకు వచ్చారని అక్కడి గృహస్తులు నమ్ముతారు.
ఎలా చేరుకోవాలి?
దేశంలోని అన్ని ప్రాంతాల నుంచి కర్ణాటకలోని గుల్బర్గా కు రైలు, బస్సు సౌకర్యాలున్నాయి. దత్త జయంతి సందర్భంగా గాణగాపురం నరసింహ సరస్వతి క్షేత్రం గురించి చదివినా విన్నా సమస్త గ్రహ దోషాలు తొలగి మానసిక శాంతి చేకూరుతుందని గురు చరిత్రలో వివరించారు. ఓం శ్రీ దత్తాత్రేయ స్వామినే నమః
ముఖ్యగమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.
