ఆరోగ్య ఐశ్వర్యాలనిచ్చే 'భాను' సప్తమి పూజ- ఎలా చేయాలో తెలుసా? - Bhanu Saptami 2024

Bhanu Saptami Puja Vidhi In Telugu : ఆదివారం రోజు సూర్య భగవానుని పూజించడం అత్యంత ఫలప్రదం అని హిందువుల విశ్వాసం. ఆరోగ్య ప్రదాత అయిన సూర్యునికి సూర్యోదయ సమయంలో ఇచ్చే అర్ఘ్యం ఆరోగ్యం, సుఖసంపదలు ఇస్తుందని విశ్వాసం. ఇక భాను సప్తమి రోజు చేసే సూర్య ఆరాధన కోటి రెట్ల ఫలవంతమైనదని అంటారు. అసలు భాను సప్తమి అంటే ఏమిటి? ఆ రోజు ఎలాంటి పూజలు చేయాలి? అనే ఆసక్తికర విషయాలను ఈ కథనంలో తెలుసుకుందాం.

Bhanu Saptami Puja Vidhi In Telugu : ఏ రోజైతే ఆదివారం సప్తమి తిథి కలిసి వస్తుందో ఆ రోజును భానుసప్తమి అని అంటారు. దానినే విజయ సప్తమి, కల్యాణ సప్తమి అని కూడా అంటారు. భాను సప్తమి రోజు చేసే సూర్యారాధన విశేష ఫలప్రదమని పండితులు చెబుతున్నారు. భానుసప్తమి సూర్యునికి సంబంధించిన పర్వదినం. ఈ రోజున చేసే పూజ, దానం, జపం, హోమం అత్యంత ఫలవంతం అని, ఈ పూజలు అనంతకోటి ఫలితాలను ఇస్తుందని శాస్త్ర వచనం.

భానుసప్తమి ఎప్పుడు?
Bhanu Saptami 2024 Date : ఆగస్టు 11 వ తేదీ ఆదివారం, సప్తమి తిథి రోజున భాను సప్తమిగా జరుపుకుంటాం. ఈ రోజు పూర్తిగా సప్తమి తిధి ఉంది కాబట్టి సూర్యోదయం నుంచి ఉదయం 9 గంటల వరకు పూజకు శుభ సమయం.

భాను సప్తమి పూజా విధానం

• భాను సప్తమి రోజు సూర్యోదయానికి ముందే నిద్రలేచి శుచియై సూర్యభగవానునికి నమస్కరించుకోవాలి.
• ఆవు పాలు పొంగించి అందులో పిడికెడు బియ్యం, బెల్లం, నెయ్యి వేసి మెత్తగా పరమాన్నం తయారు చేసుకోవాలి.
• సూర్యునికి ఎదురుగా ఉన్న ప్రాంతాన్ని శుభ్రం చేసుకొని రథం ఆకారంలో ముగ్గు వేసుకుని అందులో మధ్యభాగంలో పద్మాన్ని వేసుకోవాలి. ముగ్గుకు నలువైపులా పూలతో, పసుపుకుంకుమలతో అలంకరించుకోవాలి.
• సూర్య భగవానునికి 12 సార్లు భక్తితో సూర్య నమస్కారాలు చేసి, రాగిపాత్రలో నీరు తీసుకొని అర్ఘ్యం సమర్పించాలి.
• ముందుగా తయారు చేసుకున్న పరమాన్నాన్ని సూర్య భగవానునికి నివేదించాలి. అనంతరం ఆ పరమాన్నాన్ని ప్రసాదంగా అందరూ స్వీకరించాలి.

భానుసప్తమి పూజకు నియమాలు

• భానుసప్తమి పూజ చేసుకునే ఆదివారం రోజు ఎట్టి పరిస్థితుల్లోనూ ఉల్లి, వెల్లుల్లి, మధ్య మాంసాలు తీసుకోరాదు.
• కఠిన బ్రహ్మచర్యం పాటించాలి.

భానుసప్తమి పూజాఫలం
భక్తి శ్రద్ధలతో, నియమ నిష్టలతో భాను సప్తమి పూజ చేస్తే శారీరక మానసిక ఆరోగ్యం సమకూరుతుంది. సూర్య భగవానుని అనుగ్రహంతో అవివాహితులకు వివాహం, సంతానం లేని వారికి సంతానం కలుగుతుంది. విద్యార్ధులకు చక్కని విద్య లభిస్తుంది. వ్యాపారాభివృద్ధి జరుగుతుంది. మానసికంగా ఇబ్బందులు పడుతున్న వారికి మనశ్శాంతి చేకూరుతుంది. రానున్న భాను సప్తమి రోజు మనం కూడా సూర్యుని ఆరాధిద్దాం ఆరోగ్య ఐశ్వర్యాలను పొందుదాం. ఓం శ్రీ ఆదిత్యాయ నమః

ముఖ్య గమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.