Sharmila's focus on YSRCP cadre : రాష్ట్రంలో ఎన్డీఏ కూటమి భారీ విజయంతో ప్రభుత్వాన్ని ఏర్పాటు చేసింది. గతంలో అధికారంలో ఉన్న వైఎస్సార్ కాంగ్రెస్ పార్టీ ఊహించని ఘోర పరాజయం పాలైంది. కేవలం 11సీట్లకే పరిమితమై ప్రతిపక్ష హోదా కోల్పోయింది. దీనికి తోడు జగన్పై ఈడీ కేసులు, బెయిల్పై ఉంటున్న ఆయన ఎప్పుడు తిరిగి జైలుకు వెళ్తాడో అని సొంత పార్టీ నేతలే చర్చించుకుంటున్న పరిస్థితి. వచ్చే ఐదేళ్లలో షర్మిల నాయకత్వంలోని కాంగ్రెస్ పార్టీయే ప్రత్యామ్నాయమని ఆ పార్టీ నేతలు పేర్కొంటున్నారు. ప్రస్తుత పరిస్థితులను తనకు అనుకూలంగా మలుచుకోవడంలో కాంగ్రెస్ పార్టీ పావులు కదుపుతోంది. రానున్న ఐదేళ్లలో రాష్ట్రంలో తిరిగి బలం పుంజుకోవాలని భావిస్తోంది. కాంగ్రెస్ పార్టీ అగ్రనేతలందరూ వైఎస్ షర్మిలకు మద్దతుగా ఉన్నారని ప్రజల్లోకి మెసేజ్ వెళ్లేలా విజయవాడలో వైఎస్ జయంత్యుత్సవాలు ఏర్పాటు చేశారని విశ్లేషకులు భావిస్తున్నారు.
వైఎస్ వారసులు ఎవరు? - తేల్చేసిన విజయమ్మ - Vijayamma Support Sharmila
రాహుల్ గాంధీని ప్రధాన మంత్రిని చేయాలన్నది వైఎస్ సంకల్పమని తెలంగాణ ముఖ్యమంత్రి రేవంత్ రెడ్డి హైదరాబాద్లోని పంజాగుట్ట సర్కిల్లో జరిగిన వైఎస్ జయంతి వేడుకల్లో మాట్లాడుతూ చెప్పారు. వైఎస్సార్ రెండో సారి ముఖ్యమంత్రిగా ప్రమాణ స్వీకారం చేస్తూ రాహుల్ గాంధీని ప్రధాని చేయడం తన లక్ష్యమని చెప్పారని గుర్తు చేశారు. ఇదిలా ఉండగా తాను సైతం వైఎస్ను స్ఫూర్తిగా తీసుకుని భారత్ జోడో యాత్ర పూర్తి చేశానని రాహుల్గాంధీ ట్వీట్ చేసిన వీడియోలో వెల్లడించడం గమనార్హం.
జగన్ రాజకీయ భవిష్యత్పై నీలినీడలు కమ్ముకొన్న తరుణంలో ఆ పార్టీ నాయకులు ఎంతోమంది ఇప్పటికే ఎన్నికలకు ముందు తెలుగుదేశం పార్టీలో చేరారు. మరికొందరు కాంగ్రెస్ వైపు చూస్తున్నారు. ఇక ఇదే సమయంలో షర్మిల ఆచితూచి అడుగులు వేస్తున్నారు. కొద్ది రోజుల కిందట దిల్లీ వెళ్లి సోనియా, రాహుల్, ప్రియాంక సహా కాంగ్రెస్ పార్టీ జాతీయ నేతలను షర్మిల కలిశారు. అనంతరం తెలంగాణ, కర్ణాటక రాష్ట్రాల నేతలతో వరుసగా భేటీ అయ్యారు. తెలంగాణ ముఖ్యమంత్రి రేవంత్ రెడ్డి, డిప్యూటీ సీఎం భట్టి విక్రమార్కతో పాటు ఆ పార్టీ సీనియర్ నేతలను కలిసి వైఎస్ జయంత్యుత్సవాలకు ఆహ్వానించారు. కాంగ్రెస్ అధికారంలో ఉన్న పొరుగు రాష్ట్రం కర్ణాటకకూ వెళ్లి డిప్యూటీ సీఎం డీకే శివకుమార్ను సైతం ఆహ్వానించారు. ఈ సందర్భంగా ఏపీలో పార్టీ శ్రేణుల పునరేకీకరణపైనా చర్చ జరిగినట్లు తెలుస్తోంది. ప్రస్తుత అనుకూల పరిణామాలు, భవిష్యత్ కార్యాచరణపైనా మాట్లాడినట్లు సమాచారం.
కాంగ్రెస్ పార్టీ బలోపేతం దిశగా అడుగులు వేస్తున్న షర్మిల వైఎస్సార్సీపీ ఓటు బ్యాంకుపై దృష్టి సారించినట్లు తెలుస్తోంది. "జగన్ మా మాట వినకపోవడం వల్లే ఎన్నికల్లో ఓడిపోయాం" అంటున్న వైఎస్సార్సీపీ నేతలు, మాజీ ఎమ్మెల్యేలు షర్మిలతో టచ్లో ఉన్నట్లు తెలుస్తోంది. దీనికి తోడు ఉమ్మడి ఆంధ్రప్రదేశ్లో ఎంతో మంది కాంగ్రెస్ పార్టీ నేతలు హైదరాబాద్లో వ్యాపార సంస్థలు నెలకొల్పారు. తెలంగాణలో కాంగ్రెస్ అధికారంలో ఉన్న నేపథ్యంలో వారంతా ఇప్పుడు కాంగ్రెస్వైపు చూస్తున్నారు.
