చార్మినార్​ చిహ్నమంటే మీకెందుకంత చిరాకు - కాకతీయ కళాతోరణం అంటే ఎందుకంత కోపం : కేటీఆర్​ - KTR Tweet on CM Revanth Reddy

KTR Tweet on Telangana Symbol Changes : చార్మినార్​ చిహ్నంటే మీకెందుకంత చిరాకు, కాకతీయ కళాతోరణం అంటే ఎందుకంత కోపమని బీఆర్​ఎస్​ కార్యనిర్వాహక అధ్యక్షుడు కేటీఆర్​ సీఎం రేవంత్​ను ప్రశ్నించారు. ఇదేం రెండు నాల్కల వైఖరి? ఇదెక్కడి మూర్ఖపు ఆలోచన అంటూ సీఎం రేవంత్​రెడ్డిపై కేటీఆర్​ ఎక్స్​ వేదికగా మండిపడ్డారు. రాజకీయ ఆనవాళ్లను తొలగించాలన్న కక్షతో రాష్ట్ర అధికారిక చిహ్నాన్ని చెరిపేస్తే సహించమని హెచ్చరించారు.

KTR Tweet on CM Revanth Reddy : రాజకీయ ఆనవాళ్లను తొలగించాలన్న కక్షతో రాష్ట్ర అధికారిక చిహ్నాన్ని చెరిపేస్తే సహించబోమని, పౌరుషానికి ప్రతీకైన ఓరుగల్లు సాక్షిగా ప్రభుత్వ సంకుచిత నిర్ణయాలపై సమరశంఖం పూరిస్తామని బీఆర్​ఎస్ కార్యనిర్వాహక అధ్యక్షుడు కేటీఆర్​ హెచ్చరించారు. తెలంగాణ సమాజాన్ని ఏకం చేసి ప్రజా ఉద్యమాన్ని నిర్మిస్తామని చెప్పారు. ఇదేం రెండు నాల్కల వైఖరి? ఇదెక్కడి మూర్ఖపు ఆలోచన అంటూ ఎక్స్​ వేదికగా ముఖ్యమంత్రి రేవంత్​ రెడ్డిని ఉద్దేశించి ప్రశ్నించారు.

కాకతీయ కళాతోరణంపై ఎందుకంత కోపం? చార్మినార్​ చిహ్నం అంటే మీకెందుకంత చిరాకు అని ఎక్స్​ వేదికగా సీఎం రేవంత్​ రెడ్డిని కేటీఆర్​ అడిగారు. అవి రాచరికపు గుర్తులు కావని, వెయ్యేళ్ల సాంస్కృతిక వైఖవానికి చిహ్నాలు అని చెప్పారు. వెలకట్టలేని తెలంగాణ అస్తిత్వానికి నిలువెత్తు ప్రతీకలని కేటీఆర్​ పేర్కొన్నారు. జయజయహే తెలంగాణ గీతంలో ఏముందో తెలుసా అని ప్రశ్నించారు. కాకతీయ కళాప్రభల కాంతిరేఖ రామప్ప అనీ, గోల్కొండ నవాబుల గొప్ప వెలుగే చార్మినార్​ అని తెలిపారు. అధికారిక గీతంలో కీర్తించి! అధికారిక చిహ్నంలో మాత్రం అవమానిస్తారా అంటూ ప్రశ్నించారు.

చార్మినార్​ అంటే కట్టడం కాదు : చార్మినార్​ అంటే ఒక కట్టడం కాదని విశ్వనగరంగా ఎదిగిన హైదరాబాద్​కు ఐకాన్​ అన్న ఆయన, కాకతీయ కళాతోరణం అంటే ఒక నిర్మాణం కాదని సిరిసంపదలతో వెలుగొందిన ఈ నేలకు నిలువెత్తు సంతకమని కేటీఆర్​ వివరించారు. తెలంగాణ అధికారిక చిహ్నం నుంచి వీటిని తొలగించడమంటే తెలంగాణ చరిత్రను చెరిపేయడమే అని కేటీఆర్​ ఆందోళన వ్యక్తం చేశారు. నాలుగు కోట్ల తెలంగాణ ప్రజల గుండెలను గాయపరచడమేనని వ్యాఖ్యానించారు. కాంగ్రెస్​ పాలిస్తున్న కర్ణాటక అధికారిక చిహ్నంలోనూ రాచరికపు గుర్తులున్నాయని చెప్పారు. మరి వాటిని కూడా తొలగిస్తారా, లేదా చెప్పాలంటూ ప్రశ్నించారు.

అసెంబ్లీని కూల్చేస్తారా? : భారత జాతీయ చిహ్నంలోనూ అశోకుడి స్తూపం నుంచి స్వీకరించిన మూడు సింహాలున్నాయని, జాతీయ పతాకంలోనూ దశాబ్దాలుగా ధర్మచక్రం ఉందని, వాటి సంగతేంటో సమాధానం ఇవ్వండని కేటీఆర్​ సీఎం రేవంత్​ను ప్రశ్నించారు. కాకతీయుల కాలంలో నిర్మించిన చెరువులను పూడ్చేస్తారా? ఒకప్పుడు రాచరికానికి చిహ్నంగా ఉన్న అసెంబ్లీని కూల్చేస్తారా అని అడిగారు. నేడు తెలంగాణ గుర్తులు మారుస్తామంటున్నారు. రేపు కొట్లాడి తెచ్చుకున్న తెలంగాణ సరిహద్దులు చెరిపేస్తారా అంటూ ప్రశ్నించారు.

రాజకీయ కక్షతో చిహ్నాన్ని చెరిపేస్తే ఊరుకోం : గత పదేళ్లుగా ప్రభుత్వ అధికారిక చిహ్నంగా యావత్​ తెలంగాణ సమాజం ఆమోద ముద్ర ఉందని, సబ్బండ వర్ణాల మనసు గెలుచుకున్న సంతకమూ ఉందని కేటీఆర్​ పేర్కొన్నారు. రాజకీయ ఆనవాళ్లను తొలగించాలన్న కక్షతో రాష్ట్ర అధికారిక చిహ్నాన్ని చెరిపేస్తే సహించబోమని హెచ్చరించారు. పౌరుషానికి ప్రతీకైన ఓరుగల్లు సాక్షిగా మీ సంకుచిత నిర్ణయాలపై సమరశంఖం పూరిస్తామని తెలిపారు. తెలంగాణ సమాజాన్ని ఏకం చేసి ప్రజా ఉద్యమాన్ని నిర్మిస్తామని కేటీఆర్​ సీఎం రేవంత్​రెడ్డికి సవాల్​ విసిరారు.