మెడికల్​ కాలేజీల్లో కన్వీనర్​ కోట సీట్లు 100 శాతం తెలంగాణ విద్యార్థులకే దక్కాలి : హరీశ్​రావు - Harishrao tweet on TS Medical Seats

Harishrao Comments on Medical Seats : రాష్ట్రంలో మెడికల్​ కాలేజీల్లో కన్వీనర్​ కోట సీట్లు 100 శాతం తెలంగాణ విద్యార్థులకు దక్కేలా రాష్ట్ర ప్రభుత్వం చర్యలు తీసుకోవాలని బీఆర్​ఎస్​ నేత హరీశ్​రావు కోరారు. వైద్య విద్య ప్రవేశాలపై ఎక్స్​ వేదికగా ఆయన ట్వీట్​ చేశారు.

Harishrao on Telangana Medical Seats : రాష్ట్రం అవతరించి పదేళ్లు పూర్తవుతున్న సందర్భంగా వైద్య విద్య ప్రవేశాలకు సంబంధించి స్థానికత అంశంపై స్పష్టత ఇవ్వాలని మాజీ మంత్రి హరీశ్​ రావు డిమాండ్​ చేశారు. అలాగే మెడికల్​ కాలేజీల్లో కన్వీనర్​ కోటా సీట్లు 100 శాతం తెలంగాణ విద్యార్థులకు దక్కేలా రాష్ట్ర ప్రభుత్వం చర్యలు తీసుకోవాలని కోరారు. ఈ మేరకు ఎక్స్​ వేదికగా ట్వీట్​ చేశారు.

జూన్​ మూడో వారంలో అడ్మిషన్లు ప్రక్రియ మొదలవుతున్న క్రమంలో ప్రభుత్వం తక్షణం స్పందించి స్పష్టత ఇచ్చేలా ఉత్తర్వులు జారీ చేయాలని బీఆర్​ఎస్​ నేత హరీశ్ ​రావు అన్నారు. లేదంటే వైద్య విద్య చదివే అవకాశాలను తెలంగాణ విద్యార్థులు కోల్పోతారని ఆందోళన చేశారు. తెలంగాణ ఏర్పాటుకు ముందున్న 20 మెడికల్​ కాలేజీల్లోని 2,850 సీట్లలో కాంపిటెంట్​ అథారిటీ కోటా కింద 1,900 సీట్లు ఉన్నాయని తెలిపారు. ఇందులో 15 శాతం అన్​ రిజర్వుడ్​ కోటా అంటే 280 సీట్లు తెలంగాణ విద్యార్థులు నష్టపోతారని చెప్పారు.

తెలంగాణ విద్యార్థుల ప్రయోజనాలు కాపాడడంలో ప్రభుత్వం విఫలం : దీంతో పాటు నిమ్స్​ సహా ఇతర మెడికల్​ కాలేజీల్లోని దాదాపు 150 పీజీ సీట్లు కోల్పోతారని బీఆర్​ఎస్​ నేత హరీశ్​రావు అన్నారు. ఎంబీబీఎస్​, పీజీ అడ్మిషన్ల ప్రక్రియ సమీపిస్తున్నప్పటికీ కాంగ్రెస్​ ప్రభుత్వం ఈ ముఖ్యమైన విషయాలను పట్టించుకోకుండా నిర్లక్ష్యం ప్రదర్శిస్తుండటం దురదృష్టకరమని చెప్పారు. తెలంగాణ విద్యార్థుల ప్రయోజనాలు కాపాడడంలో కాంగ్రెస్​ ప్రభుత్వం వైఫల్యం చెందుతోందని అన్నారు. ప్రభుత్వ తీరుతో తల్లిదండ్రులు, విద్యార్థులు తీవ్రంగా ఆందోళన చెందుతున్నారని వెల్లడించారు.

రాష్ట్ర పునర్విభజన చట్టం మేరకు 2014 నుంచి కన్వీనర్​ కోటాలో 15 శాతం సీట్లకు తెలంగాణతో పాటు ఆంధ్రప్రదేశ్​ విద్యార్థులు సైతం పోటీ పడే వెసులుబాటు కల్పించారు. ఇదే విధానం కొనసాగితే 2014 తర్వాత ఏర్పాటు చేసిన కొత్త మెడికల్​ కాలేజీల్లో కూడా 15 శాతం అన్​ రిజర్వుడు కోటా అమలు చేయాల్సి ఉంటుందని తెలిపారు. దీనివల్ల దాదాపు 520 సీట్లు తెలంగాణ విద్యార్థులు కోల్పోవాల్సి వస్తుందన్నారు. దీనిని నివారించేందుకు తెలంగాణ ప్రభుత్వం అన్​ రిజర్వుడ్ కోటాను కేవలం పాత 20 మెడికల్​ కాలేజీలకు మాత్రమే పరిమితం చేసిందని గుర్తు చేశారు.

Andhra Pradesh ReOrganisation Act 2014 : దీని కోసం ఏపీ రీ ఆర్గనైజేషన్​ యాక్టు, ఆర్టికల్​ 371డీ నిబంధనలకు లోబడి తెలంగాణ స్టేట్​ మెడికల్​, డెంటల్​ కాలేజెస్​ అడ్మిషన్​ రూల్స్​కు సవరణ చేస్తూ గత బీఆర్​ఎస్​ ప్రభుత్వం ఉత్తర్వులు జారీ చేసిందని గుర్తు చేశారు. దీని ప్రకారం 2014 జూన్​ 2 తర్వాత ఏర్పాటు చేసిన మెడికల్​ కాలేజీల్లోని కాంపిటేటివ్​ అథారిటీ కోటాలోని 100 శాతం సీట్లను తెలంగాణ విద్యార్థులకే రిజర్వ్​ చేయడం జరిగింది. ఈ నిర్ణయం వల్ల తెలంగాణ విద్యార్థులకు 520 మెడికల్​ సీట్లు అదనంగా లభించాయి. అయితే ప్రస్తుతం జూన్2 తో విభజన చట్టానికి కాలం చెల్లుతుందటంతో పాత మెడికల్ కాలేజీలోని 100% కన్వీనర్ కోటా సీట్లను కూడా తెలంగాణ విద్యార్థులకు దక్కేలా చర్యలు తీసుకోవాల్సిన అవసరం ఉంది.