Kadapa Municipal Meeting Today : కడప నగరపాలక సంస్థ సర్వసభ్య సమావేశం మరోసారి రణరంగమైంది. భేటీకి హాజరైన స్థానిక టీడీపీ ఎమ్మెల్యే మాధవీరెడ్డికి వేదికపై కుర్చీ ఏర్పాటు చేయలేదు. దీంతో ఆమె తీవ్ర ఆగ్రహం వ్యక్తం చేశారు. మేయర్ తీరుపై ఎమ్మెల్యే మాధవీరెడ్డి, టీడీపీ కార్పొరేటర్లు నిరసన వ్యక్తం చేశారు. గందరగోళం మధ్యే వైఎస్సార్సీపీ పాలకవర్గం అజెండా ఆమోదించుకుంది. అజెండా ఆమోదించుకుని సమావేశం వాయిదా వేసి మేయర్ సురేశ్బాబు వెళ్లిపోయారు.
మేయర్ తీరుపై ఎమ్మెల్యే మాధవీరెడ్డి తీవ్ర స్థాయిలో ఆగ్రహం వ్యక్తం చేశారు. గతంలోనూ ఇలాగే చేశారంటూ మండిపడ్డారు. వైఎస్సార్సీపీ పాలనలో ఇద్దరు ఎమ్మెల్యేలకు మేయర్‌కు చెరోవైపు కుర్చీవేసేవారని, ఎన్నికల్లో కడప, కమలాపురం స్థానాల్లో టీడీపీ గెలవడంతో పద్ధతి మార్చేశారని విమర్శించారు. మహిళా ఎమ్మెల్యేగా ఉన్న తనను అవమానిస్తున్నారని మాధవీరెడ్డి ధ్వజమెత్తారు.
గత సమావేశంలోనూ ఇదే విధంగా ప్రవర్తించిన మేయర్ సురేశ్బాబు, ఇప్పుడు కూడా తీరు మార్చుకోకపోవడం దారుణమని మాధవీరెడ్డి విమర్శించారు. కుర్చీ విషయంలో వివక్ష గురించి ప్రశ్నిస్తే అది తన విచక్షణాధికారం అంటూ మేయర్ విచక్షణ లేకుండా వ్యవహరిస్తున్నారని దుయ్యబట్టారు. మహిళను అవమానిస్తే మీ నాయకుడు సంతోషిస్తారేమోనని ఆక్షేపించారు. తన కుర్చీని లాగేస్తారని మేయర్ భయపడుతున్నారని పేర్కొన్నారు. అందుకే ఆయన కుర్చీలాట ఆడుతున్నట్లు ధ్వజమెత్తారు. కడప అభివృద్ధిని కుంటుపరిచారని, ఇక్కడ జరిగిన అవినీతిపై మాట్లాడాలని చెప్పారు. అవినీతిపై చర్చిస్తారనే సమావేశాలు జరగకుండా చేస్తున్నారని మాధవీరెడ్డి విమర్శనాస్త్రాలు సంధించారు.
ఈ నేపథ్యంలోనే మేయర్ సురేశ్ బాబు, ఎమ్మెల్యే మాధవీరెడ్డికి మధ్య వాదోపవాదాలు సాగాయి. కుర్చీ లేకపోవడంతో ఎమ్మెల్యే నిలబడ్డారు. మేయర్ కుర్చీకి ఒక వైపు టీడీపీ, మరో వైపు వైఎస్సార్సీపీ కార్పొరేటర్లు నిల్చొని నిరసన తెలిపారు. మేయర్ కుర్చీ వెనక ఇరుపక్షాల వాదోపవాదనలు సాగాయి. పోటాపోటీ నినాదాలతో సమావేశంలో గందరగోళ పరిస్థితి నెలకొంది. ఈ క్రమంలోనే తెలుగుదేశం పార్టీ, వైఎస్సార్సీపీ కార్పొరేటర్ల మధ్య తోపులాట జరిగింది. మేయర్‌కు క్షమాపణ చెప్పాలంటూ వైఎస్సార్సీపీ కార్పొరేటర్లు కింద బైఠాయించి నిరసన వ్యక్తం చేశారు.
ఏడుగురు కార్పొరేటర్లను సస్పెండ్‌ చేసిన మేయర్ : సమావేశానికి ఆటంకం కలిగిస్తున్నారంటూ వైఎస్సార్సీపీ నుంచి టీడీపీలోకి వెళ్లిన ఏడుగురు కార్పొరేటర్లను సస్పెండ్‌ చేస్తున్నట్లు మేయర్ సురేశ్బాబు ప్రకటించారు. వైఎస్సార్సీపీ కార్పొరేటర్లను కూడా సస్పెండ్‌ చేయాలని తెలుగుదేశం పార్టీ సభ్యులు డిమాండ్‌ చేశారు. గందరగోళ పరిస్థితుల్లో సమావేశాన్ని మధ్యాహ్నానికి మేయర్ వాయిదా వేశారు.
మరోవైపు ఎమ్మెల్యేకు కుర్చీ ఇవ్వకపోవడంతో నగరపాలక సంస్థ కార్యాలయం బయట మాధవీరెడ్డి వెంట వచ్చిన కార్యకర్తలు నిరసన చేపట్టారు. మేయర్ డౌన్‌డౌన్‌ అంటూ నినాదాలు చేశారు. మహిళను గౌరవించాలని డిమాండ్‌ చేశారు. నగరపాలక సంస్థ సర్వసభ్య సమావేశం సందర్భంగా పోలీసు బందోబస్తు ఏర్పాటు చేశారు. కార్యాలయ పరిసరాల్లో 144 సెక్షన్‌ విధించారు.
ధైర్యం ఉంటే రాజీనామాలు చేయండి: మధ్యాహ్నం సమావేశం ప్రారంభమైన తర్వాత కూడా యథావిధిగా ఆందోళన కొనసాగింది. మేయర్ వ్యవహార శైలిపై ఎమ్మెల్యే మాధవీరెడ్డి మరోసారి విరుచుకుపడ్డారు. ఈ గందరగోళం మధ్యనే మేయర్ సురేష్ బాబు అజెండాలోని ఆరు అంశాలను ఆమోదించినట్లు తెలిపి, సమావేశాన్ని ముగించుకుని వెళ్లిపోయారు. అనంతరం పార్టీ కార్యాలయంలో ఎమ్మెల్యే మాధవి రెడ్డి, టీడీపీ పొలిట్ బ్యూరో సభ్యుడు శ్రీనివాసరెడ్డి మీడియా సమావేశాన్ని నిర్వహించి మేయర్ సురేష్ బాబు తీరుపై మండిపడ్డారు.
మేయర్ ఏకపక్షంగా వ్యవహరించి మహిళను అవమానపరిచారని ఎమ్మెల్యే మాధవీ రెడ్డి ఆగ్రహం వ్యక్తం చేశారు. మేయర్ కడప నగరంలో సొంతంగా కాంట్రాక్టులు చేసుకుంటూ, అనుమతి లేకుండా భవనాలు నిర్మించుకుంటున్నారని ఆరోపించారు. కార్పొరేషన్ కార్యాలయం మేయర్ సొంత జాగీరు కాదని శ్రీనివాసరెడ్డి మండిపడ్డారు. టీడీపీ కార్పొరేటర్లు రాజీనామా చేస్తారని, ధైర్యం ఉంటే వైఎస్సార్సీపీ కార్పొరేటర్లు కూడా రాజీనామాకు సిద్ధంగా ఉండాలని సవాల్ విసిరారు.
కార్పొరేషన్ సర్వసభ్య సమావేశం ఓవైపు లోపల జరుగుతుండగా బయట టీడీపీ మద్దతుదారులు, అనుచరులు పెద్ద ఎత్తున గేటు వద్ద బైఠాయించి ధర్నా నిర్వహించారు. ఎమ్మెల్యేని అవమానించే విధంగా వైఎస్సార్సీపీ నాయకులు ప్రవర్తిస్తే చూస్తూ ఊరుకునేది లేదని హెచ్చరించారు. ఈ సందర్భంగా పోలీసులకు టీడీపీ కార్యకర్తలకు మధ్య తోపులాట చోటుచేసుకుంది.
టీడీపీపై వ్యతిరేకత పెంచేలా మేయర్ కుట్ర: ఎమ్మెల్యే మాధవీరెడ్డి - MLA Madhavi Reddy Fire On Mayor
