BRS Ex Minister Mahmood Ali Fires on CM Revanth : రాష్ట్రంలో ముస్లింలు అనాథలు అయ్యారని, మైనార్టీలకు రేవంత్ రెడ్డి ఒక్క మంత్రి పదవి కూడా ఇవ్వలేదని మాజీ మంత్రి, బీఆర్ఎస్ ఎమ్మెల్సీ మహమూద్ అలీ అన్నారు. మైనార్టీల కోసం కేసీఆర్ చాలా మంచి కార్యక్రమాలు చేశారన్న ఆయన, కాంగ్రెస్ పార్టీ తెలంగాణకు ఎప్పుడూ అన్యాయమే చేస్తుందని ఆరోపించారు. మైనార్టీలకు కూడా హస్తం అన్యాయం చేసిందని, లౌకికవాదం అని చెప్పుకుంటుంది కానీ, ఏమీ చేయదని అన్నారు.
గులాబీ ఎప్పటికీ కమలంతో కలవదు : దేశంలో లౌకికవాదాన్ని పాటించేది ప్రాంతీయ పార్టీలు మాత్రమే అన్న మహమూద్ అలీ, లౌకికవాదాన్ని పూర్తి స్థాయిలో అమలు చేసింది కేసీఆర్ మాత్రమేనని పేర్కొన్నారు. కాంగ్రెస్ నేతల మాటలు విని మోసపోయామని పలువురు ముస్లింలు చెప్తున్నారని తెలిపారు. బీఆర్ఎస్, బీజేపీ కుమ్మక్కు అని దొంగ ఆరోపణలు చేస్తున్నారని ఆక్షేపించిన మహమూద్ అలీ, గులాబీ పార్టీ ఎప్పటికీ కాషాయ దళానికి మద్దతు తెలపదని స్పష్టం చేశారు.
"సార్వత్రిక ఎన్నికల నేపథ్యంలో కాంగ్రెస్ పెద్ద పెద్ద అబద్ధాలతో ప్రజలను మభ్యపెడుతోంది. హామీల వాగ్ధానాల అమలుపై మాట్లాడకుండా, లేనిపోని మాటలతో జనాలను అయోమయానికి గురి చేస్తోంది. బీఆర్ఎస్, బీజేపీ కుమ్మక్కు అని కాంగ్రెస్ దొంగ ఆరోపణలు చేస్తోంది. అదే నిజమైతే ఎమ్మెల్సీ కవిత అరెస్ట్ ఎందుకు జరుగుతుంది. గులాబీ పార్టీ ఎప్పటికీ బీజేపీకి మద్దతు తెలపదు." -మహమూద్ అలీ, బీఆర్ఎస్ మాజీమంత్రి
BRS Focus on MP Elections : హైదరాబాద్ బీజేపీ అభ్యర్థి ఏం మాట్లాడుతున్నారో అర్థం కావడం లేదని అన్నారు. సీఏఏకు వ్యతిరేకంగా పార్లమెంట్లో మాట్లాడేది బీఆర్ఎస్ మాత్రమేనని, ముస్లిం మైనార్టీలు గులాబీ పార్టీకి అండగా నిలవాలని మాజీ మంత్రి కోరారు. కేసీఆర్ హయాంలో 12 మసీదులను కూల్చారని రేవంత్ రెడ్డి చెప్పడం సబబు కాదని తోసిపుచ్చారు. బీఆర్ఎస్ హయాంలో ఫ్రెండ్లీ పోలీసు ఉండగా, ఇప్పుడు ఎందుకు ఇలా మారిందని అందరూ అనుకుంటున్నారని తెలిపారు. నార్సింగి ప్రాంతం దుబాయ్ను మించి అభివృద్ధి చెందుతోందని, విజయవంతమైన తెలంగాణ మోడల్ను నాలుగు నెలల్లోనే కాంగ్రెస్ దెబ్బ తీసిందని మహమూద్ అలీ ఆరోపించారు. ప్రజల్లో మార్పు మొదలైందన్న ఆయన, ఈ ఎంపీ ఎన్నికల్లో గులాబీ పార్టీ 12 ఎంపీ స్థానాలు గెలుచుకుంటుందని విశ్వాసం వ్యక్తం చేశారు.
అలా చేస్తే నేను ముక్కు నేలకు రాస్తా : ఆరు గ్యారంటీలు అమలు చేసినట్లు ముఖ్యమంత్రి రేవంత్ రెడ్డి చెప్పడం పూర్తిగా అబద్ధమని, రాహుల్, సోనియాపై ఒట్టు వేస్తే తాను ముక్కు నేలకు రాస్తానని బీఆర్ఎస్ నేత దాసోజు శ్రవణ్ అన్నారు. వాగ్దానాలు అమలు చేయమంటే, సీఎం రోజూ కేసీఆర్పై పడి ఏడుస్తున్నారని ఎద్దేవా చేశారు. దుర్భాషలు, అబద్దాలతో ప్రజలను మభ్యపెట్టే ప్రయత్నం చేస్తున్నారని, నమ్మినోళ్లను నట్టేట ముంచేలా నయవంచనకు పాల్పడుతున్నారని మండిపడ్డారు.
కర్రు కాల్చి వాత పెడతాం : రైతులు అష్టకష్టాలు పడుతుంటే రేవంత్ రెడ్డి మాత్రం ఇతర రాష్ట్రాల్లో ప్రచారం చేస్తున్నారని శ్రవణ్ ఆరోపించారు. ఓటుకు నోటు కేసులో ఉన్న రేవంత్ రెడ్డి, ప్రధాని అభ్యర్థి అంటూ రాహుల్ గాంధీకి ప్రచారం చేయడం ఏ మేరకు సబబని ప్రశ్నించారు. లోక్సభ ఎన్నికల ప్రచారంలో రేవంత్ రెడ్డి ప్రజలకు ఏం చేస్తారో చెప్పాలని, లేదంటే కర్రు కాల్చి వాత పెడతారని దాసోజు శ్రవణ్ తెలిపారు.
కడియంను రాజకీయంగా భూ స్థాపితం చేయడమే లక్ష్యం : బీఆర్ఎస్ నేత రాజయ్య - BRS Rajaiah Fires On Kadiyam
