BRS Leader KTR Visit Rajanna Sircilla District : బీఆర్ఎస్ ప్రభుత్వం ఉన్నప్పుడు రైతులను, నేతన్నలను ఆదుకున్నామని బీఆర్ఎస్ కార్యనిర్వాహక అధ్యక్షుడు కేటీఆర్(KTR) అన్నారు. బతుకమ్మ చీరల నేసే పనిని చేనేతలకు ఇచ్చి పని కల్పించామన్నారు. తమ ప్రభుత్వంలో మంజూరైన ముస్తాబాద్ రోడ్డును కాంగ్రెస్ రద్దు చేసిందని విమర్శించారు. కాంగ్రెస్ ప్రభుత్వం వచ్చాక నేతన్న(Handloom Worker)లు రోడ్డున పడ్డారని ధ్వజమెత్తారు. కాంగ్రెస్ నేతలకు ఏం చేతకాదని ఎద్దేవా చేశారు. రాజన్న సిరిసిల్ల జిల్లా పర్యటనలో ఉన్న కేటీఆర్, కాంగ్రెస్ పార్టీపై విమర్శనాస్త్రాలు సంధించారు.
KTR Siricilla Tour : ఎల్ఆర్ఎస్పై బుధవారం రాష్ట్రవ్యాప్తంగా ధర్నా చేయాలని బీఆర్ఎస్ కార్యకర్తలకు కేటీఆర్ పిలుపునిచ్చారు. అలాగే సిరిసిల్లలో ఎల్ఆర్ఎస్పై నిరసన తెలపాలన్నారు. బీఆర్ఎస్ ఇచ్చిన ఉద్యోగాలపై కాంగ్రెస్ ప్రచారం చేసుకుంటోందని తెలిపారు. డిసెంబరు 9న అన్ని హామీలు నెరవేరుస్తానని సీఎం రేవంత్ మాట ఇచ్చి తప్పారని ఆరోపించారు. బీఆర్ఎస్ కేవలం నాలుగు లక్షల ఓట్ల తేడాతోనే మాత్రమే ఓడిపోయిందని గుర్తు చేశారు. కరీంనగర్ ఎంపీ నియోజకవర్గం సన్నాహక సమావేశం, ముస్తాబాద్లో కార్యకర్తలతో కేటీఆర్ సమావేశమయ్యారు.
కాంగ్రెస్ ఇచ్చిన హామీలు వంద రోజుల్లో అమలు కాకపోతే ఆ పార్టీని బొందపెడతాం : కేటీఆర్
"బీఆర్ఎస్ ప్రభుత్వం ఉన్నప్పుడు ఇటు రైతులను ఆదుకున్నాం. అటు నేతన్నలను ఆదుకున్నాం. బతుకమ్మ చీరల నేసే పనిని సిరిసిల్ల, గర్సకుర్తి చేనేతలకు ఇచ్చి పని కల్పించాం. ఇంకా మరికొన్ని ప్రాంతాల్లో ఉండే నేతన్నను చూసుకున్నాం. ఈ ప్రభుత్వం వచ్చిన తర్వాత అన్ని పనులను క్యాన్సిల్ చేస్తోంది. నేతన్నలు రోడ్డున పడ్డారు. కాంగ్రెస్ నేతలకు ఏం చేత కాదు. రోడ్లు నాశనం అయ్యాయి." - కేటీఆర్, బీఆర్ఎస్ కార్యనిర్వాహక అధ్యక్షుడు
మతం పేరుతో బండి సంజయ్ ఓట్లు అడగడం తప్ప ఏం లేదు : కరీంనగర్కు బండి సంజయ్ చేసిందేమీ లేదని బీఆర్ఎస్ నేత కేటీఆర్ ధ్వజమెత్తారు. మతం పేరుతో ఓట్లు అడగటం తప్ప సంజయ్ చేసిందేమీ లేదని దుయ్యబట్టారు. అయోధ్య పేరు మీద ఓట్లు దండుకోవాలని బీజేపీ చూస్తోందన్నారు. ఈ నెల 12న కరీంనగర్లో 'కదన భేరీ' బహిరంగ సభ నిర్వహించనున్నట్లు ఆయన తెలిపారు. అలాగే బస్సు యాత్రలు, రోడ్డు షోలు నిర్వహిస్తామన్నారు.
ఎల్ఆర్ఎస్ రద్దు హామీ ఏమైంది? - ఈనెల 6న కాంగ్రెస్ ప్రభుత్వ వైఖరికి నిరసనగా ధర్నాలు : కేటీఆర్
'అతికొద్ది రోజుల్లోనే కాంగ్రెస్ ప్రభుత్వంపై వ్యతిరేకత - కరీంనగర్లో బీఆర్ఎస్ - బీజేపీ మధ్యే పోటీ'
