Benefits Of Waking Up In Brahma Muhurta : బ్రహ్మముహూర్త సమయం.. దీన్నే అమృత కాలమనీ, బ్రహ్మ సమయమనీ అంటారు. ఇది బ్రహ్మ దేవునికి సంబంధించిన సమయం కాబట్టే ఆ పేరు వచ్చింది. వేకువ జామున మూడున్నర- మూడు ముప్పావు నుంచి అయిదు - అయిదన్నర గంటల మధ్యలో ఉన్న కాలానికే బ్రహ్మముహూర్తమని పేరు. పూర్వం మహర్షులు, రుషులు ఆధ్యాత్మిక ధ్యానం చేసేందుకు ఈ పవిత్రమైన కాలాన్నే ఎంచుకునేవారట. ఒకప్పుడు ఇళ్లల్లో పెద్దవాళ్లు కూడా సంగీత సాధనకూ, చదువుకునేందుకూ చిన్నారులను బ్రహ్మముహూర్తంలోనే నిద్రలేపేవారు.
సూర్యోదయానికి దాదాపు గంటన్నర లేదా గంటా ముప్ఫైఆరు నిమిషాల ముందుగా వచ్చే ఈ టైంలో నిద్రలేచి, కాలకృత్యాలు తీర్చుకుని.. ఆ తరువాత అరుణోదయాన్ని చూస్తే ఆరోగ్యానికి ఎంతో మంచిది. సూర్యుడి కన్నా ముందు, ప్రత్యక్ష నారాయణుడి రథసారథిగా పిలిచే అరుణుడు (అనూరుడు అనే పేరూ ఉంది) ఎర్రని రంగు కిరణాల రూపంలో దర్శనమిస్తాడు. లేలేత సూర్య కిరణాలతో కాసేపు మాత్రమే కనిపించే ఆ సుందరమైన దృశ్యం, ఆహ్లాదకరంగా అనిపించడంతోపాటు శరీరానికి విటమిన్‌ డీ కూడా పుష్కలంగా అందిస్తుంది.
ఆ సమయంలో నిద్రలేస్తే ఇన్ని ప్రయోజనాలా! : ఇక, బ్రహ్మముహూర్త సమయంలో నిద్రలేవడం వల్ల కలిగే లాభాలను గమనిస్తే ఈ టైంలో చుట్టూ ప్రశాంతంగా ఉంటుంది. ఎలాంటి సౌండ్ వినిపించదు. దాంతో దైవారాధన చేసినా, విద్యార్థులు చదువుకున్నా, ఏదయినా ఓ పనిని చేపట్టినా ఏకాగ్రతతో పూర్తిచేయవచ్చు. మనసు చేస్తున్న పనిపైనే శరీరం లగ్నం అవుతుంది. ఇంద్రియాలూ సైతం అప్రమత్తంగా పనిచేస్తాయి. అన్నింటికీ మించి మెదడు పనితీరూ చురుగ్గా ఉంటూ, మెరుగ్గా పనిచేస్తుందని శాస్త్రవేత్తలూ చెబుతున్నారు.
వీటన్నింటి ద్వారా సానుకూల దృక్పథం కూడా పెరుగుతుంది. ఆ ప్రభావం మిగిలిన రోజుపైనా పడి క్రమంగా ప్రతికూల ఆలోచనలు దూరమవుతాయని పరిశోధనల్లోనూ తేలింది. అంతేకాదు, ఈ సమయంలో గాలి కూడా స్వచ్ఛంగా ఉంటుంది. ఆ గాలిని పీల్చడం వల్ల శరీరం ఆరోగ్యంగా ఉండటమే కాకుండా, ఒత్తిడి సమస్య కూడా అదుపులోకి వస్తుంది. వీటన్నింటి కారణంగా శరీర జీర్ణ వ్యవస్థ, జీవక్రియల పనితీరూ మెరుగ్గా ఉంటుంది.ముఖ్యంగా ఏవైనా వ్యాయామాలూ, ధ్యానం వంటివి చేయాలనుకునేవారికీ, వ్యక్తిగత అభివృద్ధికోసం ఫోకస్ చేసే వారికీ ఇదే సరైన సమయమని చెబుతారు.
అర్థరాత్రి మేలుకుంటున్నారా? మళ్లీ నిద్రపట్టడం లేదా? ఈ '7' టిప్స్ పాటించి చూడండి!
