Tamil Nadu Wedding Style Kalyana Rasam: చలికాలం వచ్చేసింది. ఈ క్రమంలో చాలా మంది చలి నుంచి ఉపశమనం పొందేందుకు ఎన్నో రకాల ప్రయత్నాలు చేస్తుంటారు. ముఖ్యంగా తినే విషయంలో వేడివేడి కూరలు, రసాలు, సూప్లు వంటివన్నీ ఉండేలా చేసుకుంటుంటారు. తాజాగా అలాంటి వారి కోసం అద్దిరిపోయే రెసిపీ తీసుకొచ్చాం. అదే తమిళనాడు వెడ్డింగ్ స్టైల్ "కళ్యాణ రసం. చాలా టేస్టీగా ఉండే దీన్ని పిల్లల నుంచి పెద్దల వరకు అందరూ ఎంతో ఇష్టంగా అన్నంలో కలుపుకుని తింటారు. కేవలం తినడమే కాదు ఏకంగా తాగొచ్చు కూడా. పైగా ఈ రసాన్ని ప్రిపేర్ చేసుకోవడం చాలా ఈజీ. మరి, ఇంకెందుకు ఆలస్యం ఈ సూపర్ టేస్టీ కళ్యాణ రసాన్ని ఎలా ప్రిపేర్ చేసుకోవాలి? కావాల్సిన పదార్థాలేంటి? అనే వివరాలు ఇప్పుడు చూద్దాం.
కావాల్సిన పదార్థాలు:
- నూనె - 2 టేబుల్ స్పూన్లు
- ఆవాలు - 1 టీస్పూన్
- పసుపు - ముప్పావు టీ స్పూన్
- ఎండు మిర్చి - 4
- టమాట - 1(పెద్దది)
- ఉప్పు - రుచికి సరిపడా
- ఉడికించిన కందిపప్పు - 100 గ్రాములు
- నీళ్లు - 250ml
- చింతపండు - 100 గ్రాములు
- కరివేపాకు -4 రెమ్మలు
- మిరియాలు - 1 టీస్పూన్
- వెల్లుల్లి రెబ్బలు - 8
- కొత్తిమీర తరుగు - కొద్దిగా
- ఇంగువు - పావు టీ స్పూన్
తయారీ విధానం:
- ముందుగా ఓ పెద్ద సైజ్ టమాట తీసుకుని కడిగి ముక్కలు కట్ చేసుకుని పక్కకు పెట్టుకోవాలి.
- ఆ తర్వాత మిరియాలు, వెల్లుల్లిని కచ్చాపచ్చాగా దంచి తీసుకోవాలి.
- అలాగే కందిపప్పును శుభ్రంగా కడిగి ఉడికించి పక్కకు పెట్టుకోవాలి. చింతపండను నానబెట్టి గుజ్జు తీసి అందులో 400 ml నీళ్లు పోసి పక్కకు పెట్టుకోవాలి.
- ఇప్పుడు స్టవ్ ఆన్ చేసి పాన్ పెట్టి నూనె వేసి వేడి చేసుకోవాలి. నూనె వేడెక్కిన తర్వాత ఆవాలు వేసి చిటపటలాడించాలి.
- ఆ తర్వాత పసుపు, ఎండుమిర్చి ముక్కలు మంచి సువాసన వచ్చే వరకు వేయించుకోవాలి.
- ఆ తర్వాత కట్ చేసిన టమాట ముక్కలు, రుచికి సరిపడా ఉప్పు వేసి బాగా కలిపి మూత పెట్టి స్టవ్ను సిమ్లో పెట్టి ఓ 5 నిమిషాలు ఉడికించుకోవాలి. అంటే ఆ ముక్కలను మెత్తగా ఉడికించుకోవాలి.
- టమాటలు మెత్తగా అయ్యాక ఉడికించుకున్న పప్పు వేసి బాగా కలిపి పావు లీటర్ నీళ్లు పోసి పప్పను మెదుపుకుని మూత పెట్టి మీడియం ఫ్లేమ్ మీద ఓ పొంగు వచ్చే వరకు మరిగించాలి.
- రసం మరుగుతున్నప్పుడు చింతపండు రసాన్ని పోసి కలుపుకోవాలి. ఆ తర్వాత కరివేపాకును కాడలతో సహా వేసి దంచిన మిరియాలు, వెల్లుల్లి మిశ్రమాన్ని వేసి ఆ తర్వాత కొత్తిమీర తరుగు వేసి కదపకుండా మీడియం ఫ్లేమ్ మీద ఓ పొంగు వచ్చేవరకు మరిగించుకోవాలి.
- ఆ తర్వాత ఇంగువ వేసి మరో నిమిషం పాటు మరిగించి దింపేసుకుంటే చాలు. ఘుమఘుమలాడే తమిళనాడు పెళ్లిళ్ల స్పెషల్ కళ్యాణ రసం రెడీ. దీన్ని వేడివేడిగా తిన్నా, చల్లారిన తర్వాత తిన్నా టేస్ట్ అద్దిరిపోతుంది.
- నచ్చితే మీరూ ఓసారి ట్రై చేయండి..
వర్షాకాలంలో "పచ్చి పులుసు" ఇలా చేస్తే - టేస్ట్ గురించి చెప్పడం కాదు, ఆస్వాదించాల్సిందే!
చిటపట చినుకుల వేళ స్పైసీ స్పైసీ "పుదీనా చారు"- ఇలా ప్రిపేర్ చేస్తే తినడమే కాదు తాగొచ్చు కూడా!
నిమిషాల్లో ప్రిపేర్ అయ్యే 'పెసరపప్పు చారు'- ఇలా చేస్తే టేస్ట్ నెక్ట్స్ లెవల్ అంతే!
