Simple Tips to Unpacking Bags after Vacation : నేటి ఉరుకుల పరుగుల జీవితంలో పని నుంచి కాస్త విరామం తీసుకొని ఏదైనా పర్యాటక ప్రదేశం లేదంటే వెకేషన్కి వెళ్లడమంటే ఎవరికైనా సరదానే! ఈ క్రమంలోనే చాలా మంది ఎంతో ఉత్సాహంగా బ్యాగులు సర్దుకుంటారు. అయితే, అలా వెళ్లేటప్పుడు బ్యాగులు సర్దుకోవడం ఒకెత్తయితే.. తిరిగొచ్చాక వాటిని ఎక్కడివక్కడ నీట్గా సర్దడం మరో ఎత్తుగా చెప్పుకోవచ్చు.
ముఖ్యంగా చాలా మంది రోజువారీ బిజీ లైఫ్స్టైల్లో పడిపోయి వెకేషన్ నుంచి తిరిగిరాగానే ఈ పనిని వాయిదా వేస్తూ ఉంటారు. మీరూ ఏదైనా వెకేషన్కి వెళ్లొచ్చాక బ్యాగులు సర్దడం వాయిదా వేస్తున్నారా? అయితే, మీకోసమే కొన్ని సింపుల్ టిప్స్ తీసుకొచ్చాం. వాటిని ఫాలో అయ్యారంటే నిమిషాల్లో ఎలాంటి ఒత్తిడి లేకుండా ఈజీగా లగేజీ బ్యాగుల్ని అన్ప్యాక్ చేయవచ్చంటున్నారు నిపుణులు. మరి, అవేంటో ఈ స్టోరీలో తెలుసుకుందాం.
- ఏదైనా వెకేషన్కి వెళ్లేటప్పుడు కొంతమంది లగేజీ బ్యాగులో యాక్సెసరీస్‌, ఇతర బ్యూటీ ఉత్పత్తులు.. అవసరమైనవన్నీ డైరెక్ట్గా వేసేస్తుంటారు. తద్వారా అవసరమైనప్పుడు అవి వెంటనే దొరక్కపోవడం అటుంచితే.. తిరిగొచ్చాక వాటిని ఒక్కొక్కటిగా తీసి సర్దడమూ చిరాకే. అందుకే అలాంటి వస్తువుల్ని వేటికవే సెపరేట్గా చిన్న చిన్న జిప్లాక్ బ్యాగుల్లో వేసుకొని తీసుకెళ్లడం మంచిది. ఫలితంగా ఇంటికొచ్చాక ఆ బ్యాగుల్ని నేరుగా ఎక్కడివక్కడ సర్దుకుంటే పని ఈజీ అవుతుందంటున్నారు నిపుణులు.
- ఇంకొందరు వెకేషన్కి వెళ్లేటప్పుడు బ్యాగుల్లో అవసరం ఉన్నవి, లేని వస్తువులను పెట్టుకొని తీసుకెళ్తుంటారు. దీనివల్ల లగేజీ తడిసి మోపెడవడం తప్ప మరే ఉపయోగం ఉండదనే విషయాన్ని గమనించాలి. పైగా ఇంటికొచ్చాక వాటిని సర్దడం ఇబ్బందిగా ఉంటుంది. కాబట్టి ఎవరైనా టూర్ లేదా వెకేషన్లో బాగా యూజ్ అవుతాయన్న వస్తువులు, దుస్తులు మాత్రమే తీసుకెళ్లేలా చూసుకోవాలి. ఈ క్రమంలో వచ్చాక వాటిని సర్దుకోవడమూ తేలిక అవుతుందంటున్నారు.
- కొన్ని సందర్భాల్లో ఇల్లు, ఆఫీస్‌ హడావిడితో తీసుకెళ్లిన లగేజీని ఒకేసారి నీట్గా సర్దుకోవడం కుదరకపోవచ్చు. అలాంటి టైమ్లో రోజుకు కొన్ని వస్తువుల చొప్పున సర్దేయాలి. ఈ క్రమంలో ఓరోజు వెకేషన్ నుంచి కొని తెచ్చిన వస్తువుల్ని సరైన ప్రదేశంలో సెట్ చేసుకోవడం, ఇంకో రోజు బట్టలు వాష్ చేసుకోవడం.. ఇలా రోజుకో పని చేస్తే సర్దడం ఈజీగా కంప్లీట్ అవుతుందని చెబుతున్నారు నిపుణులు.
- కొందరు పర్యటక ప్రాంతానికి వెళ్లిన చోట అది బాగుంది.. ఇది బాగుంది అంటూ కనిపించిన వస్తువునల్లా కొనేస్తుంటారు. దీనివల్ల లగేజీ బరువు పెరిగిపోవడమే కాదు.. తెచ్చినవి సర్దడానికి కూడా నీరసం వచ్చేస్తుంది. అలాగే.. ఇంట్లోనూ చెత్త పేరుకుపోతుంది. అందుకే టూర్కి వెళ్లినప్పుడు మీకు నచ్చిన ఒకటి లేదా రెండు వస్తువుల్ని వెంట తెచ్చుకోవడం బెటర్ అంటున్నారు.
- వెకేషన్కి వెళ్లొచ్చాక దుస్తుల వాషింగ్ పెద్ద పని అని చెప్పచ్చు. దీంతో టైమ్ కూడా వృథానే! అయితే టూర్లోనే ఈ పనిని కంప్లీట్ చేసుకోవచ్చంటున్నారు నిపుణులు. అదెలా అంటే.. మీరుండే హోటల్‌లో మీ బట్టల్ని లాండ్రీకి పంపిస్తే.. ఇంటికొచ్చాక ఆ పని చాలావరకు తగ్గుతుందంటున్నారు.
- టూర్కి వెళ్లొచ్చాక లగేజీని తిరిగి ఒక్కరే సర్దేయాలంటే కాస్త కష్టమైన పనే. కాబట్టి, ఈ పనుల్లో మీవారిని, పిల్లల్ని భాగం చేస్తే పని ఈజీ అవుతుంది. పైగా మీపై ఒత్తిడి కూడా తగ్గుతుంది. ఈవిధంగా అందరూ కలిసి కబుర్లు చెప్పుకుంటూ, వెకేషన్ అనుభవాల్ని/సరదాల్ని నెమరు వేసుకుంటూ పని చేస్తే అసలు సమయమే తెలియకుండా సులభంగా పనులూ పూర్తవుతాయి.
- వెకేషన్కి వెళ్లొచ్చాక ఇలా లగేజీని తిరిగి ఎక్కడివక్కడ సర్దడం పూర్తయ్యాక ఇల్లు నీట్గా కనిపిస్తుంది. తద్వారా మనసుకూ ఒక రకమైన రిలాక్సేషన్‌ లభిస్తుంది. ఇదే తిరిగి ఉత్సాహంగా కెరీర్‌లో కొనసాగేలా, వ్యక్తిగత జీవితంలో ముందుకు సాగేలా చేస్తుందని సూచిస్తున్నారు నిపుణులు.
ఇవీ చదవండి :
అలర్ట్ : కారులో లగేజీ ఇలా స్టోర్ చేస్తే - ప్రయాణమే ప్రమాదంలో పడొచ్చని మీకు తెలుసా?
ప్రెగ్నెన్సీలో ప్రయాణాలు చేస్తున్నారా? - ఈ జాగ్రత్తలు తీసుకుంటేనే సేఫ్!
