పసుపు మరకలు పోవడం లేదా? - ఇలా చేస్తే కొత్తవాటిలా!

రోజూ ఉపయోగించే పాత్రలపై పసుపు మరకలు సహజం - మరకలు ఇలా మాయం చేయండి!

Remove Turmeric Stains : రోజూ మనం ఇంట్లో రకరకాల కూరలు వండుతుంటాం. ప్రతి కర్రీలోనూ పసుపు తప్పకుండా వేస్తాం. ఈ క్రమంలో కొన్నాళ్లకు ఆ గిన్నె లోపలి వైపు పసుపు పచ్చగా మారిపోవడం, మెరుపు కోల్పోవడం వంటివి గమనిస్తుంటాం. గిన్నెలపై ఏర్పడిన పసుపు మరకలు స్టీల్ స్క్రబ్బర్‌తో ఎంత రుద్దినా ఓ పట్టాన వదలవు. అయితే, కొన్ని టిప్స్​ పాటించడం వల్ల ఈజీగా పసుపు మరకలను తొలగించుకోవచ్చని నిపుణులు చెబుతున్నారు. ఆ చిట్కాలు మీ కోసం.

Baking Soda (ETV Bharat)

బేకింగ్‌ సోడా :

ముందుగా గిన్నెలోకి 2 టేబుల్​స్పూన్ల బేకింగ్‌ సోడా తీసుకుని ఇందులో కొద్దికొద్దిగా నీళ్లు పోస్తూ పేస్ట్‌లా తయారుచేసుకోవాలి. దీన్ని పసుపు మరకలున్న గిన్నె లోపలి వైపు పూయాలి. అరగంట తర్వాత స్క్రబ్బర్‌తో రుద్దాలి. ఇప్పుడు సాధారణ డిష్‌వాష్‌ లిక్విడ్‌తో శుభ్రం చేస్తే మరక వదిలిపోతుంది.

Lemon (ETV Bharat)

నిమ్మరసం :

నిమ్మలోని ఆమ్ల గుణాలకు ఎలాంటి మరకనైనా తొలగించే లక్షణం ఉంటుంది. అందుకే దీన్ని నేచురల్​ క్లీనర్‌ అని పిలుస్తారు. ఇందుకోసం వేడినీళ్లలో కొంచెం నిమ్మరసం కలిపి ఆ మిశ్రమాన్ని పసుపు మరక ఉన్న గిన్నెలో నింపాలి. నైట్​ మొత్తం అలాగే ఉంచి ఉదయాన్నే అన్ని గిన్నెలతో పాటు సాధారణంగా శుభ్రం చేస్తే సరిపోతుంది. ఇక్కడ నిమ్మరసానికి బదులు వెనిగర్‌ కూడా ఉపయోగించవచ్చు.

హైడ్రోజన్‌ పెరాక్సైడ్‌ :

హైడ్రోజన్‌ పెరాక్సైడ్‌ పాత్రలపై పడిన పసుపు మరకల్ని తొలగించడానికి చక్కగా ఉపయోగపడుతుంది. ఇందుకోసం మరక ఉన్న చోట కొన్ని చుక్కల ఈ ద్రావణాన్ని వేసి పావుగంట పాటు అలా వదిలేయాలి. అనంతరం సాధారణంగా కడిగేస్తే ఫలితం కనిపిస్తుంది.

టూత్‌పేస్ట్‌ :

మనం డైలీ ఉపయోగించే టూత్‌పేస్ట్‌ కూడా పాత్రపై పడిన పసుపు మరకలను తొలగిస్తుంది. ఈ క్రమంలో కొద్దిగా పేస్ట్‌ను మరక ఉన్న పాత్రలోపల మందంగా పూయాలి. కొద్దిసేపటికి పొడి క్లాత్‌తో రుద్ది నార్మల్​ డిష్‌వాషింగ్‌ లిక్విడ్‌తో శుభ్రం చేయచ్చు.

బ్లీచ్‌-నీళ్లు :

ముందుగా ఒక గిన్నెలో బ్లీచ్‌-నీళ్లు సమానంగా మిక్స్ చేసుకోవాలి. ఈ లిక్విడ్​ని పసుపు మరకలున్న పాత్రలో పోసి అరగంటపాటు అలా వదిలేయాలి. ఆపై స్క్రబ్బర్‌తో రుద్ది కడిగేస్తే సరిపోతుంది.

గ్లిజరిన్‌, లిక్విడ్‌ సోప్‌తో :

ముందుగా రెండు కప్పుల నీటికి, పావు కప్పు గ్లిజరిన్‌, మరో పావు కప్పు లిక్విడ్‌ సోప్‌ను కలిపి మిశ్రమంగా తయారుచేసుకోవాలి. ఇందులో ఒక క్లాత్‌ ముంచి దాంతో పసుపు మరక ఉన్న గిన్నె లోపలి భాగంలో ఈ మిశ్రమాన్ని పూయాలి. 15 నిమిషాల తర్వాత డిష్‌వాషింగ్‌ లిక్విడ్‌తో ఒకసారి రుద్ది వేడి నీటితో క్లీన్​ చేస్తే మరక వదిలిపోతుంది.

White Vinegar (ETV Bharat)

వెనిగర్‌ లేదా బ్లీచ్‌ :

రెండు వంతుల వేడి నీటికి ఒక వంతు వెనిగర్‌ లేదా బ్లీచ్‌ పోసి బాగా కలపండి. ఈ లిక్విడ్​ని పసుపు మరక ఉన్న పాత్రలో నింపాలి. నైట్​ మొత్తం అలాగే వదిలేసి ఉదయాన్నే సాధారణ సోప్‌తో కడిగేస్తే ఫలితం ఉంటుంది. ఈ టిప్​ గ్లాస్‌, సెరామిక్‌ వంటి పాత్రలకూ వర్తిస్తుంది.