బేకరీ కేక్​తో అనారోగ్య భయమా? - "రాగి బెల్లం కేక్​" ఇంట్లోనే ట్రై చేయండిలా!

- పిల్లల నుంచి పెద్దల వరకు ఇష్టంగా తినేస్తారు - తయారీ సైతం వెరీ ఈజీ

How to Make Ragi Bellam Cake at Home: కేక్​.. ఈ పేరు వినగానే చాలా మందికి ఎప్పుడెప్పుడు తినాలా అనిపిస్తుంది. ఇక పిల్లలైతే ఎంతో ఇష్టంగా తింటారు. ఎందుకంటే సాఫ్ట్​గా ఉండే ఈ కేక్​ను అలా నోట్లో వేసుకోగానే ఇలా కరిగిపోతుంది. అందుకే.. వేడుక ఏదైనా కేక్​ మాత్రం కచ్చితంగా ఉండాల్సిందే.

అయితే.. పదేపదే బేకరీల్లో లభించే కేక్​ తింటే హెల్త్​ పాడవడం ఖాయం. ఎందుకంటే.. ఆ కేక్​ తయారీకి మైదా, పంచదార, ఇంకా ఇతర స్వీటనర్లు వాడుతుంటారు. దీనివల్ల పలు ఆరోగ్య సమస్యలు వచ్చే అవకాశం ఉంటుంది. మరి ఇంట్లోనే కేక్​ హెల్దీగా తినాలనుకునేవారి కోసం అద్దిరిపోయే రెసిపీ తీసుకొచ్చాం. ఇందులో మైదా, పంచదార అస్సలు వాడటం లేదు. ఆరోగ్యాన్నిచ్చే బెల్లం, రాగి పిండి ఉపయోగించి ఎంతో రుచికరంగా తయారు చేసుకోవచ్చు. మరి ఎంతో టేస్టీగా మరెంతో హెల్దీగా ఉండే రాగి బెల్లం కేక్​కు కావాల్సిన పదార్థాలు, తయారీ విధానం ఈ స్టోరీలో తెలుసుకుందాం..

కావాల్సిన పదార్థాలు:

• చిలికిన పెరుగు - అర కప్పు
• బెల్లం తురుము - అర కప్పు
• బటర్​ - 2 టేబుల్​ స్పూన్లు
• వెనీలా ఎసెన్స్​ - అర టీ స్పూన్​
• రాగి పిండి - 1 కప్పు
• కోకో పౌడర్​ - 2 టేబుల్​ స్పూన్లు
• బేకింగ్​ పౌడర్​ - 1 టీ స్పూన్​
• బేకింగ్​ సోడా - అర టీ స్పూన్​
• పాలు - 2 టీ స్పూన్లు
• బటర్​ పేపర్​ - 1
• జీడిపప్పు - 10

తయారీ విధానం:

• ముందుగా కేక్​ ప్రిపేర్​ చేసుకునే గిన్నెలో బటర్​ పేపర్​ పెట్టి చుట్టూ నూనె అప్లై చేసుకుని పక్కన పెట్టుకోవాలి.
• ఇప్పుడు మరో బౌల్​ తీసుకుని అందులోకి చిలికిన పెరుగు, బెల్లం తురుము, కరిగించిన బటర్​, వెనీలా ఎసెన్స్ వేసి బాగా కలిపి పక్కన పెట్టాలి.
• ఓ 5 నిమిషాల తర్వాత మరోసారి కలిపిన జల్లించిన రాగి పిండి, కోకో పౌడర్​, బేకింగ్​ పౌడర్​, బేకింగ్​ సోడా వేసి ఒకే డైరెక్షన్​లో కలుపుకోవాలి.
• ఆ తర్వాత పాలు పోసి మరోసారి కలిపి ముందుగానే సిద్ధం చేసుకున్న కేక్​ మౌల్డ్​లో పోసుకోవాలి.
• ఇలా పోసుకున్న తర్వాత గిన్నెను ఓసారి టాప్​ చేయాలి. ఇలా చేయడం వల్ల పిండి మధ్య​లో గాలి లేకుండా ఉంటుంది.
• ఆ తర్వాత స్టవ్​ ఆన్​ చేసి సిమ్​లో పెట్టి కుక్కర్​ పెట్టి అందులో ఉప్పు పోసి ఓ స్టాండ్​ పెట్టి పావు గంట సేపు హీట్​ చేయాలి.
• కుక్కర్​ హీట్​ ఎక్కిన తర్వాత ఆ స్టాండ్​ మీద కేక్​ మౌల్డ్​ పెట్టుకుని ​ బెల్టు, విజిల్​ తీసేసిన కుక్కర్​ మూత పెట్టి మంటను మీడియం ఫ్లేమ్​లో సుమారు 35 నిమిషాల పాటు కుక్​ చేసుకోవాలి.
• 35 నిమిషాల తర్వాత మూత తీసి ఓ చాకు లేదా టూత్​పిక్​ను గుచ్చితే వాటికి పిండి అంటుకోకుండా ఉంటే కేక్​ రెడీ అయినట్లే.
• ఒకవేళ ఏమైనా అంటుకుంటే మూత పెట్టి మరో 5 నిమిషాలు బేక్​ చేసుకోవాలి.
• చల్లారిన తర్వాత కేక్​ను ఓ ప్లేట్​లోకి తిప్పి పైన జీడిపప్పులతో డెకరేట్​ చేసి తింటే టేస్టీగా, హెల్దీగా ఉండే రాగి బెల్లం కేక్​ రెడీ.
• నచ్చితే మీరూ మీ పిల్లలకు ప్రిపేర్​ చేసి పెట్టండి. ఇష్టంగా తింటారు. పైగా ఇది ఆరోగ్యం కూడా..