'మా వారు అప్పుడే కోపంగా, అంతలోనే ప్రశాంతం​గా మారిపోతారు!'- ఆయన సమస్య పిల్లలకు వస్తుందా ?

-పెళ్లికి ముందు సమస్య దాచి పెట్టారని ఓ మహిళ ఆందోళన - ఆవేదనతో మానసిక నిపుణుల సహాయం

Psychiatrist Advice for Family Problem : జీవితంలో మనం అనుకున్నవన్నీ అనుకున్నట్టుగా జరగవు. కొన్నిసార్లు మన ప్రమేయం లేకుండానే నిర్ణయాలు జరిగిపోతుంటాయి. మన చుట్టూ సమస్యలున్నాయని బాధపడకుండా.. ఆ చిక్కుల నుంచి ఎలా బయటపడగలమో ఆలోచించాలి. అప్పుడే జీవితం సాఫీగా ముందుగా సాగిపోతుందని మానసిక నిపుణులు చెబుతుంటారు. అయితే, ఓ మహిళ.. తన భర్తకు ఓ అనారోగ్య సమస్య ఉందని తెలిసి కూడా ఆ విషయం దాచి పెళ్లిచేశారని ఆందోళన చెందుతోంది. ఇంతకీ ఆమె సమస్య ఏంటో ఇప్పుడు చూద్దాం.

ఇదీ సమస్య

'నాకు ఏడాదికిందట మ్యారేజ్​ అయింది. మాది పెద్దలు కుదిర్చిన పెళ్లి. మా వారు ఒక్కోసారి కోపంలో ఏవేవో మాట్లాడుతుంటారు. మళ్లీ అంతలోనే అసలు ఏమీ జరగనట్లు చాలా కూల్​గా ఉంటారు. మొదట్లో ఇది ఆయన తత్వం అనుకుని పెద్దగా పట్టించుకోలేదు. కానీ, ఆయన 5 ఏళ్ల నుంచీ బైపోలార్‌ డిజార్డర్‌తో బాధపడుతున్నారని ఇటీవలే వాళ్ల బంధువుల్లో ఒకరిద్వారా నాకు తెలిసింది. పెళ్లికి ముందు మా దగ్గర నిజం దాచారు. ఇప్పుడు నేను గర్భవతిని. పుట్టబోయే బిడ్డకు కూడా ఈ డిజార్డర్​ వస్తుందేమో అని భయంగా ఉంది. ఏం చేయాలో చెప్పండి' అంటూ.. మానసిక నిపుణుల సహాయం కోరుతోంది ఓ మహిళ. ఈ ఫ్యామిలీ ప్రాబ్లమ్​కు ప్రముఖ మానసిక నిపుణురాలు 'డాక్టర్​ మండాది గౌరీదేవి' చక్కటి పరిష్కారం చెబుతున్నారు. అదేంటో ఇప్పుడు చూద్దాం.

నార్మల్​గానే కొంతమంది భావోద్వేగాల్లో మార్పులు ఉంటుంటాయి. బైపోలార్‌ డిజార్డర్‌తో బాధపడేవారిలో ఇలాంటివి ఇంకా ఎక్కువగా ఉంటాయి. ఇది ఒకరకమైనటు వంటి మానసిక వ్యాధి. ఏదిఏమైనా కూడా.. ఇప్పటికే మీ వారు ఈ వ్యాధిని గుర్తించి, చికిత్స తీసుకున్నట్లు తెలుస్తోంది. అయితే, దీనికి శాశ్వత పరిష్కారం లేనప్పటికీ, మెడిసిన్​ ద్వారా నియంత్రించుకోవచ్చు.

"ప్రస్తుత కాలంలో అధునాతన వైద్యం అందుబాటులోకి వచ్చింది. అతను జాబ్​ చేసుకుంటూ, నార్మల్​ లైఫ్​ గడుపుతుంటే దీని గురించి దిగులు పడాల్సిన అవసరం లేదు. మీ అత్తమామలు, ఫ్యామిలీ మెంబర్స్​ సహాయం కూడా తోడైతే ఈ పరిస్థితిని ఎదుర్కోవడం మీకు ఈజీ అవుతుంది."-డాక్టర్​ మండాది గౌరీదేవి (మానసిక నిపుణురాలు)

మీ వారికి ఉన్న ఈ డిజార్డర్‌ పుట్టబోయే పిల్లలకు కచ్చితంగా వస్తుందని చెప్పలేం. ఎందుకంటే, పిల్లలకు పేరెంట్స్​ ఇద్దరి జీన్స్‌ వస్తాయి. ఫ్యామిలీలో ఈ వ్యాధి చాలామందికి ఉండి, ఆ జీన్‌ పిల్లలకు సంక్రమిస్తేనే.. ఇది వచ్చే ఛాన్స్​ ఉంటుంది. కాబట్టి, వస్తుందో రాదో తెలియనిదాని గురించి పదేపదే ఆలోచించి మనసు పాడుచేసుకోకండి. మీ ఆరోగ్యంపైన పూర్తి శ్రద్ధ పెట్టండి. మీ ఆయన క్రమం తప్పకుండా మెడిసిన్​ వాడేలా చూసుకోండి. అప్పుడు ఆనందంగా ఉండగలుగుతారు.