How to Make Nellore Rasam Recipe : వేడి వేడి అన్నంలో కారంకారంగా, ఘాటుఘాటుగా ఏదైనా రసం వేసుకుని తింటే ఆ ఫీలింగ్ సూపర్గా ఉంటుంది. ఇలా తినడం చిన్నా, పెద్దా అందరికీ ఇష్టమే. అలాంటి వారికోసమే ఒక సూపర్ రెసిపీ తీసుకొచ్చాం. అదే.. నెల్లూరు స్టైల్ రసం. టేస్ట్ అద్దిరిపోతుంది! అంతేకాదు.. నచ్చితే ఎంచక్కా నేరుగానూ తాగేయొచ్చు. పైగా ఇది ఆరోగ్యానికి మేలు చేస్తుంది. ఇంతకీ.. ఈ టేస్టీ, హెల్దీ రసాన్ని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.
కావాల్సిన పదార్థాలు :
- చింతపండు - నిమ్మకాయ సైజంత
- పండిన టమాటా - 1
- నూనె - 2 టేబుల్ స్పూన్లు
- ఎండుమిర్చి - 2
- కరివేపాకు - 1 రెమ్మ
- పసుపు - అర టీస్పూన్
- ఉప్పు - రుచికి సరిపడా
- కొత్తిమీర తరుగు - కొద్దిగా
పొడి కోసం :
- మిరియాలు - 1 టీస్పూన్
- జీలకర్ర - ఒకటిన్నర టీస్పూన్
- ధనియాలు - 1 టీస్పూన్
- మెంతులు - చిటికెడు
- ఎండుమిర్చి - 3
- వెల్లుల్లి రెబ్బలు - 10
తయారీ విధానం :
- ఇందుకోసం ముందుగా ఒక బౌల్లో చింతపండును తీసుకొని శుభ్రంగా కడిగి.. ఆపై అందులో ఒక గ్లాసు వాటర్ పోసి పది నిమిషాల పాటు నానబెట్టుకోవాలి.
- ఆలోపు రెసిపీలోకి కావాల్సిన మిరియాల పొడిని ప్రిపేర్ చేసుకోవాలి. అందుకోసం మిక్సీ జార్ తీసుకొని అందులో మిరియాలు, జీలకర్ర, ధనియాలు, మెంతులు, ఎండుమిర్చి, వెల్లుల్లి రెబ్బలు.. వేసుకొని కాస్త కచ్చాపచ్చాగా గ్రైండ్ చేసుకొని పక్కన ఉంచుకోవాలి.
- ఇప్పుడు నానబెట్టుకున్న చింతపండు బౌల్లోకి పండిన టమాటాను తీసుకొని దాన్ని చేతితో మెత్తగా అయ్యే వరకు బాగా క్రష్ చేసుకోవాలి.
- ఆపై రెండింటినీ కలుపుకొని రసంలా ప్రిపేర్ చేసుకొని పక్కన ఉంచుకోవాలి.
- అనంతరం.. స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక.. ఎండుమిర్చిని తుంచి వేసుకోవాలి. ఆపై కరివేపాకు, ముందుగా మిక్సీ పట్టుకున్న మిరియాల పొడిని అందులో వేసుకొని మంటను లో ఫ్లేమ్లో ఉంచి ఒక నిమిషం పాటు వేయించుకోవాలి. అలా వేయించుకునేటప్పుడే పసుపు యాడ్ చేసుకొని వేయించుకోవాలి.
- ఇక ఆ మిశ్రమం బాగా వేగిందనుకున్నాక.. ముందుగా రెడీ చేసి పెట్టుకున్న టమాటా చింతపండు రసాన్ని అందులో వేసుకొని బాగా మిక్స్ చేసుకోవాలి. తర్వాత ఉప్పుతో పాటు తగినన్ని వాటర్ యాడ్ చేసుకోవాలి. అయితే, ఈ వాటర్ అనేవి ఒకసారి టేస్ట్ చూసుకొని పులుపుకి తగ్గట్టుగా పోసుకోవాలి.
- ఆ తర్వాత స్టౌ మీడియం ఫ్లేమ్లో ఉంచి మిశ్రమం ఒక పొంగు వచ్చేంత వరకు మరిగించుకోవాలి. అంతేకానీ.. మరీ ఎక్కువగా మరిగించుకోవద్దు.
- ఆవిధంగా మరిగించుకున్నాక స్టౌ ఆఫ్ చేసి చివరగా కొత్తిమీర తరుగు వేసి కలుపుకొని దింపుకుంటే చాలు. అంతే.. ఎంతో టేస్టీగా, స్పైసీగా ఉండే నెల్లూరు స్లైల్ రసం రెడీ!
- దీన్ని వేడి వేడి అన్నంలో పోసుకొని తింటుంటే ఆ ఫీలింగ్ సూపర్గా ఉంటుంది!
ఇవీ చదవండి :
"మైసూర్ స్టైల్ టమాటా రసం" - రుచి అమోఘంగా ఉంటుంది! - ఇలా ప్రిపేర్ చేయండి!
నిమిషాల్లో ప్రిపేర్ అయ్యే 'పెసరపప్పు చారు'- ఇలా చేస్తే టేస్ట్ నెక్ట్స్ లెవల్ అంతే!
